Under the Sky

Part 09

" ගොඩක් ම මේ උපදෙස් දෙන්නේ අළුතින් ආව අයට. තාම ප්ලැටූන් එකේ හැම ළමය ව ම හැමෝ ම අඳුරන්නේ නැති ව ඇති ඒත් ඉස්සරහට අඳුර ගනී. තාම කෑම්ප් එකක අත්දැකීමක් නැති ගොඩ දෙනෙක් ඉන්න්වා. දොළහ වසරට අළුතින් ඉස්කෝලෙට ආව තුන් දෙනයි, දහය වසරේ දෙන්නයි, නවය වසරේ නම දෙනෙක්.....

අරන් එන්න ඕනි දේවල් ගැන වැඩි විස්තර ගෘප් එකේ ඇති. ඊට අමතර ව විශේෂයෙන් ම කියන්න ඕනි දේවල් කියන්න තමා ෆෝන්, ලැප්ටොප් වගේ දේවල් ගේන්න බැහැ. වැඩිමහල් ළමයිට විශේෂයෙන් කියන්නේ.... මත්ද්‍රව්‍ය මොකුත් ගේන්න හිතන්නවත් එපා මේක පාටියක් නෙවෙයි. පිස්සු කෙලින්න ලෑස්තිවුණොත් නම් එවලෙම ගෙදර යවනවා වගේ ම ඕනි නම් ප්‍රින්සිපල් දක්වා ම යන්නත් පුළුවන්.... ඊට අමතර ව ඉතින් සතියකට හරියන්න කියලා තියන ඔක්කොම ඇඳුම් උස්සන් එන්න එපා මේකෙ විසිපහක් ඉන්න ඕනි ඉඩ නැහැ තඩි බෑග් තියන්න. ඇඳුම් දෙකක් මාරුවෙන් මාරුවට හෝදන් අඳින්න බැරි තරම් පොඩි ළමයි නැතුව ඇතිනේ මෙතන. ප්‍රශ්න තියනව ද? "

" නැහැ අයියේ... "

ඔහු පැවසූ අයුරෙන් නම් ප්‍රශ්නයක් තිබුණ ද කිසිවෙකුත් එය විමසන්නට උත්සහ නො කරනු ඇත.

" කෝ අපේ සීනියර්ස්ලා.... ඔයාලගේ ඩියුටීස්වලට අදාල මොනවහරි දේවල් තියනවා නම් දැන් ම කියන්න. "

ඉන් අනතුරු ව විහඟ අයියා ඉදිරියට පැමිණියේ ය.

" ඔව් යශේන් අයියේ.... ලොකු දෙයක් නම් කියන්න නැහැ. එක දවසේ කෑම්ප් එකක්නේ.... ෂූ පොලිෂ්, ස්නැක්ස්, බිස්කට්, ප්‍රථමාධාරවලට ඕනිවෙන පොඩි පොඩි දේවල් එහෙම මම ලිස්ට් එකක් හදලා දැම්මා. ඒවා හැමෝ ම ගේන්න ඕනි. අනිත් කෑමවේල් නම් හොස්ටල් එකෙන් දෙනවා කිව්වානේ. හැබැයි කැමති කෙනෙක් ඉන්නවා නම් තමන්ගේ ගෙදරින් කෑමවේලක් හැමෝට ම ඇතිවෙන්න දෙන්න පුළුවන්, පොඩ්ඩක් නෙත්මික මල්ලිගෙන් ඒ ගැන විස්තර අහලා බලන්න. ආ... තව වැඩිපුර කැන්වස් සපත්තු තියන අය ඒවා අරන් එන්න."