Under the Sky

Part 21

" එක සැරයක් කිව්වම තේරෙන්නේ නැත් ද? "

ඒ කළු පැහැ දෙනෙත මා හට තර්ජනය කරන්නට වූයේ ය.  මම ද පෙරලා ඔහු වෙත රැවුමකින් අභියෝග කළ ද මේ මොහොතේ දී මා හට අඩියක් පසුපසට ගැනීමට සිදුවිය. මම අභිමාන් අයියා ආසන්නයට ගොස් යටැසින් ඔහු දෙස බැලුයෙමි.

" බලන් ඉන්නේ ඉඳගන්නවා... මම තමුසෙ ව ගිලින්නේ නැහැ.... "

" කමක් නැහැ සාජන්..... "

නමුත් එම වැකිය සම්පූර්ණ කිරීමට ප්‍රථම මාගේ අතකින් ඇද ඔහුගේ උකුළ මතින් මා ඉන්දවා ගත්තේ ය. ඛණ්ඩභාර ගුරුතුමා අප ඇමතීම ආරම්භකල බැවින් මා හට නැවත හැරීමක් නො වීය.

මාගේ පාද දෙකක් තරම් වූ අභිමාන් අයියාගේ එක් කළවයක් මත මම අසුන්ගෙන සිටියේ හැකිතරම් ඔහුගෙන් ඈතට වන්නට හා පොළවට බර දැනෙන ලෙසයි. අභිමාන් අයියා මා නො තකා සිටීම එක්තරා ආකාරයකින් සහනයක් වූයේ ය.

" හරි පුතාලා... ඔයාලාගේ ප්‍රැක්ටිස් ශෙඩියුල් එක දැනටමත් ලැබිලානේ ඇත්තේ. ඒකේ විදිහට ම දිගට ම පුහුණුවීම් තියේවි. ඒ වගේ ම අපිට අලුතින් එකතුවෙන කම්පෙටිශන්, ඒ කියන්නේ ඩ්‍රාමා එකක් හදන්න තියනවා... තව ඇශුවල් දුවන්න ෆිට්නස් හදාගන්න ඕනි. තව වෙපන් ඩ්‍රිල් කොටසකුත් එකතු වෙනවා. ඊට අමතරව කෑම්ප් ගෙනියන්න ඕනි දේවල් සූදානම් කරගන්නත් තියනවා. ඒවා නම් සීනියර්ස්ලා පොඩි ළමයි එක්ක වැඩ බෙදාගෙන කරන්න. මේ පාර තේරුණ ඉස්කෝල ඔක්කොම වගේ දක්ශයි. ඔයාලා ෆස්ට් කියලා අනිත් අයව අවතක්සේරු කරන්න එපා. මේ පාර අනිවාරෙන් කප් එක ඕනි... අවුරුදු දහයකින් තාම අපිට සමස්ථ ලංකා ෆස්ට් ප්ලේස් එක ගන්න බැරිවුණා. මේ ප්ලැටූන් එක ගැන තමයි දැන් හැමෝ ම බලාපොරොත්තු තියාගෙන ඉන්නේ... යශෙන්, ෆන්ඩ්ස්වල තත්ත්වය කොහොම ද? "

යශේන් අයියා කුමක් හෝ පවසා ඔහුට පිළිතුරු ලබා දුන්නත් මම සිටියේ අභිමාන් අයියාගේ කළවයේ කෙළවරින් පහළට ලිස්සායමිනි. මම නැවත නිසි ලෙස අසුන් ගැනීමට තැත්කළ ද අනවශ්‍ය අවධානයක් මා වෙත ලබා නො ගෙන එය සිදුකළ නො හැකි වූයේ ය. නමුත් මා හුන් තත්ත්වය තේරුම් ගත්තාක් බඳු වූ අභිමාන් අයියා එක්වර ම මාගේ ඉණෙන් ඔසවා නිසිලෙස මා උකුළ මතින් තබා ගත්තේ ය.