Under the Sky

Part 04

මම එදින පාසල නිම වී නිවසට පැමිණෙන අතරතුර ද මම නැවතත් සිතුවේ මම ගත් තීරණය නිවැරදි ද කියායි. මම සාමාන්‍යයෙන් ගත් තීරණයක් පිළිබඳ පසුතැවෙන පුද්ගලයෙකු නො වූ බැවින් මෙය දෙතුන් වතාවක් සිතිය යුතු අවස්ථාවකි. නමුත් මම තීරණය වෙනස් නො කළෙමි.

" මොකෝ කල්පනාව... "

අම්මාගේ හඬින් මම තිගැස්සුණු අතර හිස සලා ඇය වෙත සිනහවක් පෑවෙමි.

" ආ.. අම්මා... කැන්වස් දෙකකුයි සුදු ටී ෂර්ට් එකකුයි ගන්න ඕනි... "

"  ඒ මොකට ද ඒ... "

" ප්‍රැක්ටිස් වලට "

" හෙට තාත්තත් එක්ක පන්ති ගිහින් එන ගමන් ගන්න... "

මම ඇය ව පසුපසින් ගොස් වැළඳ ගතිමි. ඇය සිනහව මුවේ රඳවාගෙන බොරු කෝපයක් මා වෙත අත් හැරියා ය.

" මල කෝලං... "

" ඔයත් එක්ක නැතු ව වෙන කවුරු එක්ක හුරතල් වෙන්න ද... "

ඇය සිහින් පහරක් මාගේ හස්ථයට එල්ල කළ අතර මම ඇය අතහැර කාමරයට වැදුණේ හෙට දිනයේ ගණිත පන්තිය සඳහා කළ යුතු වැඩ අවසාන කිරීමටයි. මන් ද යත් එසේ නො වුණ හොත් පොතත් සමඟ ම නැවත නිවස බලා පැමිණීමට සිදුවන බැවිනි.

පසුදිනයේ දී ශේන් ලකීෂ් ද සමඟ පන්තිය වෙත පිවිසි අතර එයින් පසු ව ලකීෂ් සවස තිබූ පන්තියට ද සහභාගී වන බැවින් ශේන් ඔහුගේ තාත්තා ද සමඟ නිවස වෙත පැමිණියේ ය.

ඒ පැමිණෙන අතරතුර සුදු ටී ෂර්ටයක් ද සයිස් 5 කැන්වස් ජෝඩුවක් ද මිල දී ගැනීමට අමතක නො කළේ ය.

සඳුදා දින අපේක්ෂා නො කළ තරම් වේගයෙන් පැමිණියේ ය.

" අවුලක් ගන්න එපා... මමත් ඉන්නවානේ... ඒත් සීනියර්ස්ලාත් එක්ක කටගහගෙන යන්න නම් එපා... "

තරමක් නො සන්සුන් ව මෙන් සිටි ශේන් ලකීෂ් පාසලට යන අතරමඟ දී අස්වැසුවේ ය. ශේන් හිස සැළුවේ ය.

" අවුලක් වෙන එකක් නැහැ... "

ඔවුහු පාසල වෙත පැමිණීමෙන් අන්තුරු ව කෙලින් ම ක්‍රීඩා පිටිය වෙත පිවිසියෝ ය. ඒ වන විට පුහුණුවීම් ආරම්භකර නො තිබුණු අතර ලකීෂ් ඔහුවත් ඇදගෙන ශිෂ්‍යභට කාමරය වෙත ඇවිද ගියේ ය.