Under the Sky

Part 30

" මොකක්!!! "

" ඔව් එයාට කෑම්ප් යන්න එන්න වෙන්නෙ නැහැ. ඉරිදා එයාගේ කකුලට මොකක් ද වෙලා ලිස්සලා වැටිලා. "

" එතකොට එක්කෙනෙක් අඩුයි නේ ද? කොහෙන් ද තව ළමයෙක් ව හොයන්නේ? "

අලුතෙන් ම පැමිණෙන තවත් සිසුවෙක් හට මේ පුහුණු වූ සියල්ල නැවත ඉගැන්වීමට කෙතරම් කාලයක් ගතවනු ඇත් ද...මා හට ඒ පිළිබඳව සිතීමට පවා ඇවැසි නො වීය. එසේ ම කඳවුරුගතවීම සඳහා තවත් පැවතියේ මසකට අඩු කාලයකි. එය ඒ සඳහා කොහෙත් ම නො සෑහෙයි.

" මම හිතන්නේ එයාලා කවීන් අයියාට එන්න කියන්න හදන්නේ. "

" කවු ද ඒ? "

මා විමසූව ද ඒ පුද්ගලයා පිළිබඳ ව මා හට හොඳක් දැනුනේ නැත. අභිමාන් අයියා පවා ඔහු පැමිණෙනවාට එතරම් අකමැතිවීමට ද හේතුවක් තිබිය යුතු ය.

" සාජන්ලගේ වයසේ අයියා කෙනෙක්. එයා ඉස්සරත් නිතර ම වගේ ප්‍රශ්න දැම්මා. ඒකයි එයා එනවට කවුරුත් ඒ තරම් කැමති නැත්තේ... "

" අයියෝ... දැන් ඉතින් එයා එයි ද? "

ලකීෂ් විමසුවේ කලකිරීමට පත්වූ හඬකිනි. ඔහු ද කවීන් අයියා ව තරමක් දුරට දැනසිටියේ ය.

" දන්නේ නැහැ. අයියලා කතාවෙලා තීරණයක් ගනී... "

ඒ වන විට අප පුහුණු ඇඳුමට මාරු වී අවසන් වී තිබිණි. අපගේ කතාබහට එත් සමඟ ම තිත තැබීමට සිදුවූයේ අභිමාන් අයියා අපට ක්‍රීඩා පිටියවෙත යාමට අණකළ බැවිනි.

" කියව කියව ඉන්නේ නැතුව යනවලා පිට්ටනියට... "

උදෑසන පුහුණුවීම් පමණක් තිබූ බැවින් දවසේ ඉතිරි කාලය ම අධ්‍යාපන වැඩකටයුතු සඳහා යෙදවීමට ඉතිරිවිය. එබැවින් ටියුශන් පන්ති යාමට අමතර ව මම නිවසට වී තනිව අධ්‍යාපන කටයුතුවල නිරත වූයෙමි. එය ඉදිරි සතියේ පැවැත්වෙන වාර විභාගය සඳහා අතිශයින් වැදගත්වන කාරණාවකි. මෙම වාර විභාගය උදෙසා පෙරටත් වඩා මහන්සි වී කටයුතු කිරීමට සිදුවූයේ මා හට වූ කාලය සීමාසහිත වූ බැවිනි.