သတိရလာပြီးတဲ့နောက် သူဌေးကြီးရဲ့ ဒုတိယရင်သွေးကို ကိုယ်၀န်လွယ်ထားရတယ်

AFTER REBIRTH [ EPISODE 29 ]

Unicode

"ဒါဆို အန်ကယ်တို့ ကလေးတွေရဲ့ ကိစ္စကိုဆွေးနွေးပြီးပြီလို့သတ်မှတ်လိုက်ပြီနော်၊ မြေးလေးကို မွေးပြီးမှ လက်ထပ်ကြမယ် ဒီလိုမဟုတ်လား"

ဦးစတီဗင်ကမုတ်ဆိတ်မွှေးကိုသပ်ကာ ပြောလာသည်။ တစ်ဖက်က ခမည်းခမက်တွေက သူတို့ အပေါ်အားနာသမှုနဲ့ မို့ ရိုင်းရိုင်းပြပြဘာတစ်ခုမှပြောလာခြင်းမရှိပေမယ့် သားဖြစ်သူ စတီဗင်ဟိန်းအပေါ်မှာတော့ သဘောကျခြင်းအလျှင်းမရှိကြောင်း သူတို့မြင်နိုင်ပါသေးသည်။

"ဟုတ်ပါတယ်၊ လက်ထပ်မယ့်ကိစ္စကိုတော့ ကလေးမွေးဖွားပြီးမှပဲဆက်ဆွေးနွေးကြတာပေါ့ အန်ကယ်"

ဦးရိုးရာက စကားကိုသတိထားပြောလိုက်သည်။ မြေးလေးမွေးပြီးလို့ အချိူးမပြေရင် ဒီအိုကြီးအိုမ,ကောင်ကို ခြည်ခြည်နဲ့ ခွဲဖို့ သူ့မှာ အတွေးရှိထားသည်။

ဒါကြောင့်ပင် လက်ထပ်ပေးပါမည်၊ ကတိပေးပါသည် ဆိုတာမျိုးကို ဦးရိုးရာစကားမကျွံစေဘဲ အထူးသတိပြုခဲ့သည်။

"ကောင်းပါပြီ မောင်ရိုးရာ၊ စိတ်ချပါ အန်ကယ်တို့သားဘက်ကရော အန်ကယ်တို့ဘက်ကရော မောင်ညီညာရိုးခြည် နဲ့ ရင်သွေးလေးကို အလေးထားပြီး တန်ဖိုးထားသွားမှာပါ၊"

"ဟုတ်ကဲ့ပါ"

"ဒါနဲ့ မောင်ရိုးရာက သားနဲ့ တစ်နှစ်ပဲကွာတာဆိုတော့ တက္ကသိုလ်နဲ့ အထက်တန်းတွေ ဘယ်မှာတက်ခဲ့တာလဲ၊ မပြောနိုင်ဘူးလေ ဗဟိုမြို့တော်မှာပဲဆိုရင် စီနီယာ ဂျူနီယာတွေဖြစ်နိုင်တာပဲ"

ဖခင်ကြီးပီပီသားဖြစ်သူအပေါ်အဆိုးမြင်နေတဲ့ တစ်ဖက်ကသူ့ယောက္ခလောင်းလျာတွေ အမြင်ကြည်စေဖို့ ဆွေမျိုးစပ်နေပေမယ့် ဒီတစ်နှစ်ပဲကွာတယ်ဆိုတဲ့ အချက်ကပဲ ဦးရိုးရာကို တီဆားနဲ့ တို့သလို ဆတ်စလူးခါစေသည်။ သားဖြစ်သူကို သူနဲ့မတိမ်းမယိမ်းကောင်နဲ့ပေးစားလိုက်ရမှာကို တွေးလိုက်ရင် ရူးမတတ်ပါပဲ။

ဦးရိုးရာ ဒီတစ်ခါတော့ပြန်မဖြေဘဲ မျက်မှောင်ကြီးကြုပ်ကာ ကော်ဖီခွက်ကိုကိုင်မော့လိုက်သည်။

ဒေါ်ဘေဘီမင်းခင်ကတော့ မျက်နှာ မပျက်ချင်တာမို့ ခင်ပွန်းဖြစ်သူအစားဖြေပေးလိုက်သည်။