Unicode
"ခြည်ကလေး ဆုံးပြီ "
ဘေဘီမင်းခင် တစ်ကိုယ်လုံးတောင့်တင်းသွားကာ ခေါင်းတစ်ခုလုံးချာချာလည်သွားခဲ့သည်။ကြားလိုက်ရတဲ့စကားလုံးကသိပ်မများပေမယ့် သူမဦးနှောက်က အဆိုပါစကားလုံးတွေရဲ့ အနက်အဓိပ္ပာယ်ကိုဖွင့်ဆိုနိုင်ဖို့ရာ မစွမ်းသာတော့ပါပဲ "ဆုံးပြီ" ဟူသည့်စကားနှစ်လုံးကိုသာ အကြိမ်ကြိမ်ကြားယောင်နေမိသည်။
"မမာလာ ရှင်ဘာပြောလိုက်တာလဲ"
ဘေဘီမင်းခင် အသက်ကိုဖြည်းဖြည်းရှူသွင်းလို့ သူမနားကြားမှားတာပဲဖြစ်ပါစေဆိုတဲ့ စိတ်နဲ့ထပ်မေးလိုက်သည်။ သို့ရာတွင် ဖုန်းတစ်ဖက်ကမှအသံက သူမ၏ မှုန်ပြပြမျှော်လင့်ချက်လေးကို ရိုက်ချိုးပစ်လိုက်သည်။
"ခြည်ကလေး ဆုံးသွားပြီ၊ အသက်မရှိတော့ဘူး မခင်၊ မခင်တို့ပြန်လာခဲ့ပါဦး"
ဒေါ်မာလာ့အသံက တုန်တုန်ရီရီနဲ့ ငိုထားမှန်းသိသာလှသည်။ ပြောနေတဲ့စကားလုံးတွေကတောင် မထစ် ငေါ့ အောင်စိတ်ထိန်းပြီးပြောနေခဲ့ရသည်။
ဘေဘီမင်းခင် ဖုန်းကိုကိုင်ထားရာမှလွတ်ကျသွားခဲ့သည်။ သူမ ငိုချင်ပေမယ့် မငိုနိုင်ဖြစ်နေသည်။ မျက်ရည်လည်းမကျတော့သလို အသံလည်းမထွက်။ ရင်ဘတ်ထဲက စူးခနဲ စူးခနဲအောင့်တက်လာတာမို့ အံကိုတင်းတင်းကြိတ်ထားမိသည်။
"ခင် ဘာဖြစ်တာလဲ၊ သတိထားပါဦး ခင် ခင် "
ဦးရိုးရာ တောင့်တင်းကာမူးမိုက်မလိုဖြစ်နေတဲ့ ဇနီးဖြစ်သူကို ထိန်းမတ်ပေးကာ ပွေ့ဖက်လိုက်သည်။
"အကို "
"ကိုယ်ရှိတယ် ခင်"
"ခြည်ခြည် ဆုံးပြီတဲ့ "
ခင့်ကို ကိုင်ထားတဲ့ ဦးရိုးရာရဲ့လက်တို့ပြေလျော့သွားကာ ဟင်ခနဲ ဖြစ်သွားသည်။ ဦးနှောက်တစ်ခုလုံးဗလာကျင်းမတတ်ဖြစ်ကာ ကြားလိုက်ရတဲ့စကားကို ပကတိ နား ကပင် လက်မခံနိုင်ဖြစ်သွားရသည်။
"အကို ! ခြည်ခြည် ဆုံးပြီတဲ့ အကိုရဲ့ "
ဘေဘီမင်းခင်၏ တင်းခံထားသည့် မျက်ရည်တို့က မှီခိုစရာ ရင်ခွင်တစ်စုံကို တွေ့ရှိသည်နှင့် တသွင်သွင်စီးကျလာခဲ့သည်။ တစ်ဦးတည်းသော ရင်သွေး၊ အချစ်ရဆုံးသော ဖြစ်တည်မှု၊ ဇနီးမောင်နှံရဲ့ ပေါင်းစပ်မှု ပြယုဂ်ကလေး၊ ခြည်ခြည်က ဆုံးပြီတဲ့လေ။
YOU ARE READING
သတိရလာပြီးတဲ့နောက် သူဌေးကြီးရဲ့ ဒုတိယရင်သွေးကို ကိုယ်၀န်လွယ်ထားရတယ်
Romance𝙲𝚘𝚖𝚎𝚍𝚢 | 𝚁𝚘𝚖𝚊𝚗𝚌𝚎 | 𝚁𝚎𝚋𝚒𝚛𝚝𝚑 | 𝚁𝚎𝚟𝚎𝚗𝚐𝚎 | 𝙼-𝙿𝚎𝚛𝚐
