သတိရလာပြီးတဲ့နောက် သူဌေးကြီးရဲ့ ဒုတိယရင်သွေးကို ကိုယ်၀န်လွယ်ထားရတယ်

AFTER REBIRTH [ EPISODE 32 ]

Unicode

အနက်ရောင်အခိုးအငွေ့များက ညီညာရိုးခြည်၏ လည်တိုင်ကို လှည့်ပတ်နေရင်းမှ တစ်ရစ်ပြီးတစ်ရစ်ပြီး တင်းကျပ်သွားသည်။ ၎င်းတို့က ညီညာရိုးခြည် ၏ ခေါင်းအစခြေအဆုံးကို ကာရံထားပြီး လှုပ်မရအောင်ချုပ်ထားသေးတာမို့ ညီညာရိုးခြည်တစ်ယောက် ရုန်းကန်ချင်ပါလျှင်တောင် စိုးစဉ်းမျှ လှုပ်ရှားမရပေ။

ဖျတ်ခနဲ ပွင့်လာသည့် မျက်၀န်းတစ်စုံနှင့်အတူ ခြည် အိပ်ယာမှ နိုးလာခဲ့သည်။ လည်ပင်းကတင်းကျပ်တဲ့နာကျင်မှုကြောင့် ခြည်လက်နဲ့ စမ်းဖို့လက်မြှောက်လိုက်တော့ လက်က ကုတင်နှင့် အသေဖိကပ်ခံထားရသကဲ့သို့ တုပ်တုပ်မျှလှုပ်မရ။ အသက်ရှူလို့မရလောက်အောင်အထိ တင်းကျပ်လာသည့် အခိုးအငွေ့များက ခြည့်လည်ပင်းကို အဆုံးအထိ ဖိညှစ်ပစ်ကြသည်။

ခြည့်မျက်၀န်းတွေပြူးကျယ်လာပြီးနောက် အားကုန်အော်ဟစ်ဖို့ကြိုးစားကာ လက်တွေ ခြေထောက်တွေကို လှုပ်ဖို့ကြိုးစားပေမယ့် အချည်းအနှီးသာဖြစ်သည်။ ခြည် နောက်ဆုံးမြင်လိုက်ရတာက မြူလိုအခိုးအငွေ့များကြားမှ ကြောက်မက်ဖွယ်ရာ မျက်နှာကြီးတစ်ခုဖြစ်သည်။

ခြည် ဒုတိယအကြိမ် အသတ်ခံလိုက်ရပြန်ပါပြီ။

စတီဗင်ဟိန်းမနက်စောစော အိပ်ယာ နိုးလာတာနဲ့တစ်ပြိုင်နက် မျက်လုံးမဖွင့်သေးဘဲ ဘေးနားကချာတိတ်ကို လက်နဲ့စမ်းကာ ဖက်လိုက်သည်။ ချာတိတ်က အိပ်နေဆဲဖြစ်ပြီး မနိုးသေး။

စတီဗင်ဟိန်း မျက်လုံးဖွင့်ကာ ချာတိတ်ကို ခိုးနမ်းဖို့လုပ်သည်။ သို့ပေမယ့် ချာတိတ်ရဲ့ သွေးမရှိသလို ဖြူဖျော့နေ‌တဲ့ မျက်နှာလေးနဲ့ အတူ တောင့်တင်းနေတဲ့ ခန္ဓာကိုယ်လေးကြောင့် စတီဗင်ဟိန်း မျက်လုံးတွေပြူးကျယ်ကာ နှလုံးသားတစ်ခုလုံး ပြုတ်ကျသွားသလို ခံစားလိုက်ရသည်။

စတီဗင်ဟိန်း ချာတိတ်ရဲ့ နှာခေါင်းရှေ့ကို လက်ထားလိုက်သည်။ လက်တွေကတုန်ရီနေလွန်းလို့ စတီဗင်ဟိန်း ကျန်လက်တစ်ဖက်နဲ့ထိန်းကာ ချာတိတ်အသက်ရှူမရှူကို စစ်ဆေးလိုက်သည်။

၀င်သက်ထွက်သက်သေးသေးလေးကလက်ထိပ်ကိုလာထိမှ စတီဗင်ဟိန်း စိတ်သက်သာရာရသွားခဲ့သည်။