الم احل لك بعد

بارت ٥٢

&:
ألم_احـل_لـك_بعـد
الجزء الثاني بارت ٥٢
بقلم.... المـيࢪزا بتـــول
@user80208178

قالت فاطمة الزهراء (عليها السلام ):

  أما والله لو تركوا الحق على أهله واتبعوا عترة نبيه، لما اختلف بعد خلف حتى يقوم قائمنا، التاسع من ولد الحسين(عليه السلام).

......ركضت امي الما بيها حيل صار بوگتها كل الحيل بيها وعت عمي عتاد ونزل يركض زين ما انجفى على وجهه الزلمة هي نص ساعـة وصرت بنص المستشفى ودخلت صالة الولادة وشفت العجايب والغرايب من صدمتي حلجي انسد وما فجيته ولا حسيت بعد بألم ولا شي كمت بس اعاين وفاجه عيوني على حيلهن حطت الي الممرضة مغذي بيدي وحطت بي ابرة وامي واجفه فوك من راسي وجف ايدها على بطني والثاني على راسي وتقرأ قـران وتتنخئ بأهل البيت يسهلون عليه امر ولادتي لجن انا بالعالم الموازي موش يمها وكل شوي اريدن اغفى وما تخليني توعيني لـحد ما الله سهـل عليه وجـبت

......ولحد هاي الساعة انا ما اتذكر شون جبت
رحمة الله ودعاء امي وتوسلها بأهل البيت خلى ولادتي اسهل واسرع ولادة بالعالم غمضت عيني بطني منفوخة رديت فجيتها بطني مفشوشة ومامش الي بطن وامي تضحك فوك من راسي وتمسح بكصتي وعمتي كريمة واجفه حذاي هم وتبارك الي وانا تك عين مغمضة والثاني مفتحة وحجاية اسمعها والثانية لا لجــن سمعت حجايه من كالت

.....ولج مليكه يمه فرحي اجتج بنيه هااي الدكتورة حولة ماا تشوف وما تعرف لوليد من البت

.....بوكتها صدك ضحكتها على چلمات امي لجـن ما صدكت جبت بت شون موو الدكتورة كالتلي وليد وكلما اروحن الـها تكلي ولد وانا زهبـت هديمات وغراض وليد

.....لجـن من صحيت ووعيت على روحي لكيت حجي امي صـدك والمولود بـت من فرحتي بوكتها حاضنتها بكل حيلي ودموعي تصب ماا مصدكة
هاي القطعة هسه بين اديه جانت بداخلي وعاشت بين احشائي مامصدكة صارت عندي بت واخـت كضيت عمري اتخيل عدي اخت زغيرونه العب وياها ومن اضوج اروحن الها بساع والله كريم رحيم ماقصر وياي انطـاني مرادي

.....يـومين انـا وعگاب عـرك وممالخ خاطر انا اسميها يو هـو لجـن تـالي الحجـي وارث اجـه هو وسماها "هبة الـرحمن " لا انا سميت ولا عگاب لجـن اثنينا جنا راضـيين على هذا الاسم

.... جنت اسمع النسوان من تجيب تضل عشر ايام لا تريد ابنها ولا تكبله من التعب والألم اليجري عليها وي الولادة الا انا اختلفت عن النساوين جـنت افـزن كل ليلة بـ ليل اتسحب من يم امي واروحن اكعد يم كاروكها اصفن عليها واضحك لوحدي لو مرات اتلمس خدودها وشعرها يو ما اكعـدها وتضل تتنغوص ضايجة اخذها بـحضني وارضعها وانا مكيفة بروحي انجـازي بهل دنيه هي بتـي "هبة الـرحمن"

......مرات بـ ليل امي من تفز من نومها وتلكاني كاعده ما ترضئ عليه وترزلني تكول فال موش زين تضل صافنة بوجهها لجـن انا اذن تسمع الحجي والاذن الثانية اطلعه فاصلة عن الدنيا كلها بس انا وبتـي