True Star (Myanmar Translation )

Ch.3 ကို့ယို့ကားယား အိပ်မက်တစ်ခု

ဇိမ်ရှိတဲ့ အိပ်ရာတစ်ခုဟာ ဘယ်သူ့ကိုမဆို သက်တောင့်သက်တာဖြစ်စေတဲ့ ခံစားချက်ကို ပေးစွမ်းနိုင်စွမ်းရှိတယ် ။ ရက်ပေါင်းများစွာ ဆေးရုံကုတင်ထက် နေခဲ့ရပြီးတဲ့နောက် အခုလိုမျိုး အန့ံအသက်ကင်းတဲ့ အခန်း ၊ နွေးထွေးတဲ့ အိပ်ရာတစ်ခု ၊ ရေချိုးဇလုံ အသင့်ပါတဲ့ ရေချိုးခန်းတစ်ခုဟာ သူ့စိတ်ကို အပြည့်အဝ ကျေနပ်မူရစေခဲ့တယ်ဆိုတာ အရိုးသားဆုံး ဝန်ခံရမှာပဲ ။

အဝတ်အစားတွေကို အကုန်ချွတ်ချပြီး ရေချိုးဇလုံထဲ ဝင်စိမ်နေလိုက်တယ် ။ အိမ်ဖော်အမျိုးသမီးက ဒီတစ်အိမ်လုံးမှာ ရှိသမျှ အရာအားလုံး သူ့စိတ်ကြိုက် အပြည့်အဝ အသုံးပြုနိုင်တယ်လို့ ပြောထားမှတော့ အားနာစရာ မလိုတော့ဘူးလေ ။ ဒီအိမ်မှာ ရှိတဲ့ တခြားအရာတွေကိုတော့ ထိလည်း မထိဘူး ။ ကိုင်လည်း မကိုင်ဘူး ။ ဒီအခန်းထဲမှာရှိနေတဲ့ ကိုယ်ပိုင်ရေချိုးခန်းကိုတော့ စိတ်ကြိုက် ကောင်းကောင်းကြီး အသုံးပြုပစ်လိုက်မယ် ။

ရေနွေးနွေးလေးနဲ့ စိမ်ချိုး ၊ ကောင်းကောင်း အနားယူပြီးတဲ့နောက် ၊ အိမ်ဖော်အမျိုးသမီး အသင့်ပြင်ဆင်ပေးထားတဲ့ ပျော့ပြောင်းနူးညံတဲ့ ညအိပ်ဝတ်စုံ လဲဝတ်လိုက်တယ် ။ ကုတင်ခေါင်းရင်းဘေးက စားပွဲထက်မှာတော့ သူ့အတွက် ညစာကိုပါ အသင့်ပြင်ဆင်ပေးထားတယ် ။ တစ်ချက်ကြည့်လိုက်တာနဲ့ အရမ်းကို အရသာရှိနေမယ်ဆိုတာ သိသာနေတယ် ။

ဒီအိမ်တော်ရဲ့ ပိုင်ရှင်ကို ကြည့်ရတာ တော်တော်လေးကို သဘောမနော ကောင်းမယ့်ပုံစံပဲ ။ အခုချိန်ထိ တစ်ကြိမ်တစ်ခါမှ မဆုံဖူးသေးပေမယ့် လက်ခံရထားတဲ့ ဝန်ဆောင်မူလေးတွေကြောင့် သူ့ရဲ့ Charles အပေါ် အမြင်ကတော့ ဂုဏ်ထူးမှတ်ပဲ ။

အရမ်းကြီးလည်း မဆာတာကြောင့်မို့ နည်းနည်းလေး စားပြီးတာနဲ့ ဗိုက်ပြည့်သွားတယ် ။ အချိန်အနည်းငယ်ကြာတော့ အပြင်ကနေ အခန်းတံခါးခေါက်ပြီး အိမ်ဖော်အမျိုးသမီးဟာ အတွင်းကို ဝင်လာပြီး သူစားထားတဲ့ ပန်းကန်တွေ လာသိမ်းဆည်းပေးတယ် ။ ညမအိပ်ခင်သောက်ဖို့ နွားနို့ တစ်ခွက်ကိုပါ ယူလာပေးသေးတယ် ။ ပြီးတော့ Mr. Charles ဟာ အလုပ်ကိစ္စတွေ မပြီးပြတ်သေးတာကြောင့် အိမ်ပြန်လာတာ နောက်ကျမှာဖြစ်လို့ Tang Fang ကို စောစောအနားယူဖို့ ပြောပြတယ် ။