True Star (Myanmar Translation )

Ch.25 Auditions ( Part 1)

ကောင်းကင်ပြင်ကျယ်ကြီးဟာ အစောပိုင်းကတော့ ကြည်လင်သန့်ရှင်းနေပေမယ့် ချက်ချင်းပဲ မိုးသားတိမ်လိပ်တွေ တရိပ်ရိပ် တက်လာတော့တယ် ။ မှောင်မဲနေတဲ့ မိုးတိမ်တွေ ကောင်းကင်တစ်ခွင် ဖုံးအုပ်နေပြီး ၊ ကြီးမားတဲ့ မိုးစက်ပွင့်တွေ မြေပြင်ထက်ဆီ တစ်ပေါက်ပြီး တစ်ပေါက် ကျရောက်လို့လာတယ် ။ မြေသင်းရနံ့ ခပ်သင်းသင်းဟာ လေထုထဲမှာ ပျံနှံ့သွားလေတယ် ။

လေတွေ တဟူးဟူး တိုက်ခတ်နေပြီး ၊ မိုးစက်တွေ အဆက်မပြတ် ရွာသွန်းဖြိုးနေလေတယ် ။ နောက်ထံပါးကနေ လျှပ်စစ်နွယ်ပန်းတွေနဲ့ မိုးခြိမ်းသံတွေပါ အတူယှဉ်တွဲ ပါလာခဲ့တယ် ။ ခုလို မိုးသည်းသည်းမည်းမည်း ရွာသွန်းနေတဲ့ အချိန်မှာ Director Li နဲ့ တွေ့ဆုံဖို့ အပြင်ထွက်ခဲ့မိတာ ၊ ကံမကောင်းလို့ မိုးကြိုးပစ်လိုက်တဲ့ စက်ကွင်းထဲ သူပါသွားမိလို့ရှိရင် နောက်တစ်နေ့ သတင်းခေါင်းစီးပိုင်းမှာ တော်တော်အုပ်အော်သောင်းနင်း ဖြစ်သွားမှာပဲလို့ Ge Chen တစ်ယောက် တွေးမိလိုက်တယ် ။ ဖက်ရှင်ကျကျဝတ်စားဆင်ယင်ထားတဲ့ မန်နေဂျာ Perry ဟာ အရှေ့ Passenger ခုံနေရာမှာ ထိုင်နေရင်းကနေ သူ့နောက်မှာ အဖြူရောင်ဝတ်စုံပြည့် ထိုင်နေတဲ့ Ge Chen ကို ပြုံးရွှင်တဲ့ အမူအယာနဲ့ လှည့်ကြည့်လိုက်တယ် ။

" Perry... လူရွေးပွဲမှာ ဝင်ပြိုင်မှာ ငါတစ်ယောက်တည်းပဲ မဟုတ်လောက်ဘူးထင်တယ် ။ "

Ge Chen တစ်ချက် မျက်မှောက်ကြုတ်လိုက်တယ် ။ အခု လူရွေးပွဲဟာ သူ့ဘဝမှာ ဒုတိယအကြိမ်မြောက် ဝင်ရွေးခံခြင်းပဲ ။

" ဒီတစ်ခေါက် စပွန်ဆာ လုပ်ပေးမယ့်လူတွေက နိုင်ငံရပ်ခြားကလို့ ကြားထားတယ် ။ ဒီနေ့အထိ ဒါရိုက်တာ Li ရိုက်ကူးမယ့် ရုပ်ရှင်အကြောင်းနဲ့ ပတ်သတ်ပြီး ဘာမှ သေသေချာချာ မသိရသေးပေမယ့်လည်း ၊ ဒီနေ့ ဒါရိုက်တာကြီးက မင်းကို တွေ့ဖို့ချိန်းလိုက်တဲ့ အကြောင်းရင်းက ဇာတ်ညွှန်းနဲ့ ပတ်သက်ပြီး ပြောပြဖို့ဖြစ်မယ်ထင်တယ် Ge Chen ။ ဒါရိုက်တာကြီးဘက်က မင်းကို ရွေးထားလိုက်တယ်ဆိုတာ ၊ မင်းက သူ့ရုပ်ရှင်ထဲက ဇာတ်ရုပ်နဲ့ အသင့်တော်ဆုံး ဖြစ်နေတယ်ဆိုတဲ့ သဘောပဲ ။ ဇာတ်လမ်း အကြောင်းအရာက ဘယ်လိုပဲ ဖြစ်နေဖြစ်နေ ၊ ကုမ္ပဏီဘက်ကနေ ဒီဇာတ်လမ်းရဲ့ အဓိကမင်းသားနေရာကနေ မင်း သရုပ်ဆောင်ရအောင် လုံးဝ ထောက်ပံ့ပေးမှာပဲ ။ "