فدار عبد الله وبالضبط فالبيت فين كانت كتنعس ليلى كانت سمية مع سلمى، هاذ الزوج جلسو كيهدرو مع ليلى للي قالت لهم بلي هي شدات الطريق لأصيلة مع عمر والبنات فذاك الصباح.
غير قطعت معاها سمية حتى جاها اتصال اخر من رقم اول مرة تشوفه، ترددت فالأول تجاوب ولكن جاوبت :
_السلام عليكم..
دورت راسها عند سلمى للي كانت كتشوف فيها كتساءل شكون؟ بانت لها سمية متفاجئة وهي كتقول:
_السي توفيق؟! لاباس الحمد لله..سمحلي ولكن ماعقلتش بلي انا عطيتك النمرة لا؟
سمعاته كيضحك قبل مايجاوبها:
_اه غير سمحيلي..واش عقلتي نهار الخطبة فاش طلبت منك تڤيپي عليا باش نلقا تيليفوني؟ بصراحة غير كذبت عليك باش ناخذ نمرتك، سمحيلي.
سولاته مستغربة وهي كتجلس جنب سلمى للي كانت لاصقة لها حدا وذنيها كتسمع:
_قولي كذبتي باش تشد نمرتي؟ ممكن نعرف علاش؟
_بصراحة كنت بغيت نتعرف عليك كثر...ماتفهمينيش غلاط ولكن كتعجبيني! وكنت كنتسنى غير دوز هاذ المدة باش تكوني مسالية ونعيط ليك..
بقات سمية ساكتة ماعارفة ماتقول، هو حس بها وقال:
_واقيلة زبلتها ياك؟ مهم انا جيتك صريح وقلت ليك على للي فقلبي، غير خاصك تعرفي بلي ناوي المعقول وماناويش التفلية، ذاكشي علاش بغيت نعرفك وتعرفيني كثر، وإلا تفاهمنا ندوزو لمعقول، أش قلتي؟
سلمى كانت فاتحة فمها وهي كتسمع لكلام توفيق، هزت راسها بالإيجاب لسمية للي عاد فاقت وقالت وهي كتلعن الشيطان:
_اه ماعرفتش..خلي لي شوية دالوقت ونرد عليك اوك؟
_اوك مشات، نهارك مبروك.
قطعت وهي تسول سلمى:
_واش سمعتي للي سمعت؟ السيد زعما طبيب و كيطلب مني نتصاحب معاه ولا شنو؟
_قالك كتعجبيه وناوي المعقول...ولكن باغي يعرفك شوية عنده الحق، مسكين ماعرفش مع من طاح.
قالت سلمى بالضحك وهي تعاود تسول سمية بجدية:
_اه واش غتوافقي؟ عارفاك انتي معقدة شوية وتوفيق بصراحة يستحق فرصة، ولد غزال وكيبان ظريف.. انا بعدا عجبني والله غير فكري مزيان قبل ماتجاوبيه.
***
كانت ليلى راكبة حدا عمر فسيارته متوجهين لمدينة أصيلة، لور كانت ذكرى وأريج للي شادة فواحد الطابليت طالقة فيه أناشيد ديال الصغار.
طلت عليهم ليلى وضحكت لها ذكرى وهي كتصفق فرحانة، دارت ثاني وهي كتبتسم وبقات مراقبة الطريق وعمر مركز مع الطريق وساكت.
وصلوا لوجهتهم بالضبط فواحد الحومة شعبية، ديور ديالها مصبوغين بالبيض والأزرق وزناقيها مزينين بالحبق والورد.
هز عمر ذكرى فحين ليلى شدت لأريج فيدها، هاذ الأخيرة شيرت لليلى لواحد الدار كتبان لهم من مور واحد الصور كيفرق بينها وبين واحد الساحة صغيرة.
أنت تقرأ
نبض الحب (بالدارجة)
Romanceهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
