شافها عمر ساهية فذكرى وهي كتاكل مع ختها وحط يده فوق يدها باش تنتبه ليه، شافت فيه ليلى وتبسمت وهي تهز زيتونة كحلة من الطبسيل ومداتها بيدها لفمه. كلاها وقال:
_فين سهيتي؟
_غير هنا احبيبي.. كنفكر فالوقت للي كيدوز دغيا، تقول غير لبارح حطيت أول خطوة لي فهاذ الدار..غير لبارح تلاقيتكم..
_هاذي هي الدنيا، الوقت كيطير ولكن الاهم هو ندوزوه مع الناس للي كنبغيو.
قال عمر وغمزها وهي تضحك قبل ماتلتفت جهة ذكرى كتقول:
_حبيبة ديالي العمر.. واقيلة شبعات؟
رمشت لها أريج بطريقة حفظاتها ليلى:
_و أنا ماكاين لا حبيبة لا حبيبي لا عمري؟ بغيتيني نبدا نغيير؟
وسعت ليلى عينيها بلعاني وهي تجبد لأريج خدها:
_انتي هي الحب والعمر.. انتي هي الحلاوة ديال الدنيا كاملة.
قاطع هدرتهم رنين تيليفون ليلى على الفوطوي، وقبل ماتنوض تجيبو ناضت أريج من الكرسي باش تجيبه لها. مدات أريج التيليفون لليلى للي غير شافت اسم المتصل حتى ردت:
_صباح الخير نعيمة كيف صبحتي لاباس؟
بقات كتسمع رد نعيمة وملامحها كتبدل، حطت يدها على فمها ودارت شافت فعمر للي كان كيشوف فيها كيحاول يعرف سبب تغير ملامح مراته. نطقت ليلى بصعوبة:
_الله يعوضكم اختي نعيمة..الله يرزقك الصبر والحمد لله على سلامتك..انتي بعدا لاباس؟
شير عمر لها بيده زعما اش طرا وهي تهز راسها بأسف بلاما تقول والو. ملي قطعت معاها حطت التيليفون فوق الطابلة وقالت لعمر بصوت منخفض:
_نعيمة مسكينة طاح لها البيبي للي كانت حاملة بيه فشهرين، بانتلي منهارة مسكينة بالبكاء غير الله يصبرها وصافي.
ناضت مع عمر لكوزينة كيجمعو فالماعن، حطت الماعن فوق البوطاجي ودارت كتشوف فعمر للي قال:
_دابا واش هي فالسبيطار ولا فدارها؟
_فدارها، الاجهاض وقع لبارح مسكينة.. غيخصني نمشي نشوفها راها بحدها هنا.
هز عمر راسه وقرب عندها كيحيط ظهرها بيده:
_احسن حاجة ديري أليلى..نديو البنات نوصلك ونرجعو موراك من بعد اش بان ليك؟
شيرت ليه بلا:
_لا بلاش غير خليك معاهم اليوم عطلتهم..فالعشية نخرجوهم شوية دابا غير خليكم مرتاحين راه حتى انت باقي ضاربك البرد تكايس على راسك.
***
عنقت ليلى نعيمة وهي جالسة فوق ناموسيتها ودموعها شلال، طبطبت ليلى على كتفها كتصبر فيها حتى تهدنت نعيمة على خاطرها. حطت يدها فوق يد ليلى وقالت:
_ربي يخليك اختي ليلى حاسة براسي تفاجيت الله يفاجيها عليك.. كنت بغيت غير نبكي ونخوي قلبي حيث حاسة براسي مخنوقة.
مسحت لها ليلى دموعها وهي كتقول:
_مابيناتناش اختي نعيمة راه انا ختك قبل مانكون صحبتك.. المهم هو تكوني بخير ربي كبير غيعوضك ان شاء الله، دابا غير كوني انتي بخير.
أنت تقرأ
نبض الحب (بالدارجة)
Romanceهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
