فتحت ليلى باب الدار بعدما عرفت شكون، كانت زهور للي كتدق فذاك الوقت للي ماظنتش ليلى انها غتجي فيه.
دخلت زهور وقبل ما تسولها ليلى على شنو جابها فبحال ذاك الوقت تكلمت زهور:
_بنتي ليلى عمر راه عيط وكما قلتي لي انتي انا قلت ليه الحقيقة، طلب مني نجي لعندك باش يهدر معاك من تيليفوني حيث ديالك طافي.
مدت لها زهور التيليفون بعدما عاودت الاتصال بعمر وبانت ليها ليلى مترددة تهدر معاه وهي تقول زهور منبهة:
_قال اذا مابغيتيش تردي عليه غيشد الطريق هاذ الليلة لعندك..حتى انه وصاني مانخليكش تخرجي من دار!
عقدت ليلى حجبانها وهي كتاخذ تليفون من يدها:
_هذا حمق مافيهاش!
_حمق نيت بعد ذاكشي للي عملتيه!
جاها صوت عمر كيقول قبل حتى ما تحط التيليفون على وذنها، شيرت هي لزهور تجلس وبقات كتقول وهي كتمشى فأنحاء الدار:
_شنو بغيتي اعمر؟ انا ماشي بنت صغيرة باش تقلب عليا ولا توصي عليا شي حد فهمتي!؟
_ليلى كلنا هنا خايفين عليك، الطريقة باش خرجتي منها واش ما تدخلش الخوف لقلوبنا؟ وعلاش مشيتي لكازا بالضبط البعد ومشقة الطريق واش نسيتي راسك بلي انتي نفيسة؟
ترددت فالإجابة وتحركت ناحية بيتها وهي ترد:
_كنت بغيت شي بلاصة للي نرتاح فيها..ومالقيت حسن من داري!
حست بضحكة صغيرة خرجت من فم عمر قبل ما يقول:
_دارك؟ هي مازال كتحسبي داري دارك؟ وعلاش ما ترجعيش دابا لدارك وتخلينا نفكو حريرتنا بزوج؟
حست براسها حصلت وما بغاتش تبان كما قال هو، وضحت بهدوء:
_قصدت بلي هذي من ورا طلاقنا غتولي داري! ولا انت كتخطط تخليني فالشارع بعد الطلاق للي ما واخذوش انت بشكل جدي؟
تعطل عمر فالرد حتى ضافت هي:
_عمر ما فيا للي يهدر بزاف ذاكشي علاش كنترجاك تسمعني..انا بغيتك تدفع الطلاق من غدا، ما غنرجع حتى يحين موعد الجلسة ذاكشي علاش بلاما تحاول تماطل معايا الله يخليك..كل ما زربنا فهاذ الشي كان احسن.
_علاش اليلى مصرة على هاذ الطلاق؟!
توترت شوية وجلست على الفراش كتفكر فشي جواب مقنع، سمع هو تنهيدتها قبل ما تجاوبه:
_ما بقيتش قادرة اعمر، عفاك كن معايا راجل كما كنتي من ديما ودير ذاكشي للي طلبت منك..ما تحاولش تجي عندي ولا تصيفت شي حد حيث هاذ الساعة بغيت نبقى بحدي.
_مانقدرش نخليك بحدك تما اليلى، واش ما كتحسيش بخطورة الوضع للي انتي فيه؟
_ما تخافش ما غيوقع والو، ما حدي بعيدة عليك ما غيوقع لي والو!
دام صمتهم للحظات كان كل واحد كيتخيل الطرف لاخر قدامه كيخاول يفهم فاش كيفكر لاخر، تكلم عمر اولا:
_واخا اليلى..ملي تأكدت بلي انتي بخير وعرفت فينك دابا بعدا غيتهنى خاطري من جهتك.. ما غنجيش عندك وغندفع لطلاق ولكن خلي زهور تبات معاك هاذ اليام، راه هدرت معاها وقبلات وملي غتكون متواجدة لعدا غنرتاح عليك كثر.
أنت تقرأ
نبض الحب (بالدارجة)
Dragosteهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
