نبض الحب (بالدارجة)

27 (خداع)

كانت لينا مقررة انها تنسحب من السطاج تفاديا لأي مشكل ممكن يوقع من هنا لفوق، وحيت كانت عارفة ان بمجرد ماغيسيق باها الخبار غيدير جهده باش يمنعها تحط رجلها مرة اخرى فذيك الشركة.

جلست على كرسي قدام مكتب عمر، وبلا أي مقدمات بخصوص الموضوع قالت:
_سي عمر أنا جيت اليوم باش نقولك بلي احتمال نخلي السطاج هاذ السيمانة، ولكن خيرك معايا عمري مانساه..

تعجب عمر من الخبر وسولها:
_ولكن علاش ألينا؟ شنو وقع لك حتى قررتي بهاذ السرعة تحبسي هنا؟ واش غيث رجع يت..

قاطعاته:
_لا لا غيث ماعنده حتى شي دخل، غير هو بصراحة صعيب نكمل معاكم بسبب شي مشاكل عائلية،

زاد عمر تشطن عليها وهي كتهدر بانكسار غير معهود منها، ناض من بلاصته وجا جلس فالكرسي قبالتها وقال:
_لينا واش كاين فاش نعاونك؟ موهبتك ومستقبلك راه هما الحاجة للي كيخليوك تواجهي كلشي على ماقال لي خالك..غتجي حتى لنهاية وتستلمي بهاذ السهولة لضغوطات العائلة ؟

تنهدت بمرارة وردت:
_انت ماعارفش شنو كاين اسي عمر..وانا الا بغيت نخرج من هنا راه حيت..
سكتت شوية كتحاول تبين منين تبدا وهي تكمل وهي كتشوف فيه:
_انا من نهار لول للي جيت هنا خبيت على كلشي بلي انا مخطوبة، وبلي عائلتي مافخبارهمش بهاد السطاج من غير خالي وماما..

التزم الصمت و هو الشي للي خلاها تكمل:
_ول لبارح خطيبي للي هو ولد عمتي عرفني كنجي هنا وكان باغي يدير شي مشكل، وملي قلت ليه كلشي باش على الله يدوزها على خير وماوصلهاش لبا هو خيرني بين نسبقو موعد الزواج ولا يقولها ليه..

مال عمر بظهره حتى سند ذراعه على ركبته وهو يسولها:
_وانتي قررتي تزوجي بيه باش مايفضحكش قدام باك؟ علاش أش من عيب درتي باش تخبي عليهم؟

_بابا ماغيتقبلش هاذشي، انا باش نقدر نكمل قرايتي وافقت على خطوبتي من شخص مابقيتش نحملو بسبب افعاله، وانا دابا بين نارين يا اما نتزوج بيه ونكمل السطاج معاكم هانية ولا نرفض ويحبسوني فالدار..

هزت فيه عينيها للي بانت عليهم ملامح الحزن وكملت:
_كنت قادرة نخرج من دار ونمشي عند خالي ونكمل حياتي عادي، نخلي ورايا كلشي منهم سيطرة با واهماله، ولكن بسبابي ماما هي للي غتخلص عليه...فحين ان كلشي ممكن يتعوض من بعد ملي يحن الله.

عقد عمر حجبانه كيحاول يستوعب ذاكشي للي كسيمع، واش باقي شي حد كيتعامل مع بناته ومراته بذيك الطريقة؟ واش باقي شي واحد كيتمنع من ممارسة حق من حقوقه بدون أي ذريعة او سبب!؟

ماعرف شنو يقول فذيك الموقف بالذات، ماعندو باش يفيدها او غير يخفف عليها. شاف فيها حادرة راسها وكتلعب بصباع يديها بتوتر، طلق نفس قصير وقال لها:
_وخالك او شي واحد من عائلتك مايهدرش مع باك عل وعسى يهديه الله على هاذشي للي كيدير فيه؟