فاقت ليلى فالصباح بكري بسبب شي وجع بسيط فكرشها، فتحت عينيها وهي تلاقا مع وجه عمر للي كان ناعس حداها وعاطيها بوجهه. بعد ثواني قليلة عاد استوعبت بلي هاذي هي حياتها الجديدة.
تبسمت ابتسامة صغيرة وهي باقي ناعسة على جنبها كتشوف فوجه عمر، هذيك كانت فرصة لها باش تعرف على تقاسيم وجهه مزيان لأول مرة على راحتها..
فاقت من تأملها فيه وهي كتلعن الشيطان فنفسها، ضارت لجنب لاخر ناوية تخرج من النموسية بشوية باش ماتفيقوش، حطات رجليها على الأرض المزلجة ولبست بلغتها البيضة وناضت بشوية بلا حس. غير ضارت لبلاصتها وهي كتبان لها بقعة ديال الدم على الناموسية شدت فمها ما فاهمة والو...
بقات كتضور فعينيها وكتشوف فالفراش للي بان عليه ذاك الدم مزيان مع ليزار للي كانو مفرشين بيه النومسية بيض، شافت وراها وهي كتشد ذيك الكسوة البيضة للي نعست بيها حتى كتبان لها الحالة ولات حمرا عاد فهمت اش كاين.
جرات بالخف للماريو كتفتحو وهي كطل على عمر لايفيق، جبدت حوايج جداد وفوطة صحية باش تبدل ولكن مازعمتش تبدل فالبيت نيت حيت يقدر يفيق فأي لحظة، وقررت تمشي للحمام وعلى الله ماتلاقا بحتى واحد.
عمر بدا كيفتح عينيه بشوية بشوية من الحس للي فالبيت مع نعاسه خفيف، شاف بلاصتها لقاها خاوية وهو ينوض مسند بيديه على الفراش، بانت ليه ليلى يلاه كتحل الباب ناوية تخرج وهو يصبح عليها:
_صباح الخير ليلى.
ضارت عنده مخلوعة بحال الا شي شفار تشد كيسرق، بقات شوية عاد جاوباته وبان لها كيتفوه وباقي كيحاول يفتح عينيه واحتمال مايكونش شاف ديك الخريطة وراها:
_صباح الخير .. ياكما فيقتك لا؟
هز راسه بالنفي وهو حاط يده على فمه كيتفوه، تلفت لبلاصتها فين بانت ليه الطبعة:
_اه ليلى..واش انتي؟
شير لفراش وهو كينوض بشوية فحين هي جات كتجري وغطاتها بالغطا وهي كتهرب بعينيها منه:
_اه غير سمحلي فصراحة غفلاتني هاذ المرة...
جاوبها وهو كيهز كتافه:
_لا عادي ماكاين لاش تطلبي السماحة شيء عادي. وفصراحة هاذ البقعة جات فوقتها نيت!
شافت فيه بواحد الشوفة متساءلة وهو يكمل ضاحك:
_نخليوها باش الوالدة تيقن نيت راحنا مزوجين!
سدت فمها وهي مخرجة فيه عينيها:
_ويلي حشومة! انت غير كضحك ياك؟
تبسم هو ورد عليها:
_غي ضاحك ماتخافيش، وحتى الوالدة مكتديهاش فذاكشي..انت كنتي ماشا تبدل فالحمام ولا؟
شيرت لحوايج للي فيدها وهزت راسها بنعم، شد لها فكتفها وقال:
_غير بدلي فالبيت انا غنخرج، خوذي راحتك.
جا هو خارج وهي تدور بالخف باش ماتعطيهش بالظهر لا يشوف ذاك الفيضان للي فاض تحتها.
حطت حوايجها على ناموسية وتأففت وهي كتحيد فذيك الكسوة:
_هاذي للي بقات، جات قبل من وقتها ومالقات امتى غير وانا ناعسة فرشاتني مع السيد..لا حول ولا قوة الا بالله.
***
أنت تقرأ
نبض الحب (بالدارجة)
Romanceهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
