بداية اسبوع جديد بداها عمر بنشاط بعدما رتاح شوية فاليومين للي دوزها مع عائلته الصغيرة فمدينة الرباط، يومين دازت فجو عائلي خلاته يحس وكأنه قضاها بين عائلته والأم دياله.
خارج المكتب كانت لينا دخلت لشركة كتسلت كتحاول انها ماتلاقاش بذاك الشخص للي على بالكم، دقت الباب وهو يأذن لها عمر تدخل، حيدت الكاسكيط وخشاتها فالصاك وهي تدخل لعنده.
وقف عمر كيوريها شي مخطط وهو كيشرح بالتفصيل، توقف عن الكلام ودار شاف فيها لقاها ساهية فالورق وعقلها ماشي معاها. عيط لها باسمها مرة زوج والو مارداتش وهو يحركها من كتفها بشوية خلاتها تقفز مخلوعة.
اعتذرت منه وهي كتقاد فنظاظرها كتحاول ترجع اهتمامها لكلامه، ولكن هو تفكر الشي للي وقع ذيك المرة بخصوص السكر وقال لها:
_لينا ياك لاباس ياكما السكر ثاني طايح ولا شنو.
هزت راسها بلا وهي كتهدر وعينيها على الوراق:
_لا والو غير مشطونة شوية وصافي، السكر مابيه والو غير خلينا نكملو.
حيد الورق على جنب وقال:
_اشنو لي شاطنك ياكما عندك شي مشكل؟ زعما الا عندك شي مشكل فالشركة نقدر نعاونك..جلال راه موصيني عليك.
تبسمت بشوية من اهتمامه بها وكانها اخته الصغيرة وردت:
_بارك الله فيك ميسيو عمر، كاين مشكل صغير هنا ولكن ماتخافش غنعرف كيفاش نوقفو عند حده.
تجاهلت الامر ولكن هو عاد مازاد تشطن عليها بالخصوص ان المشكل عنده فالشركة، جلس قبالتها وشير لها باش تجلس وتكلم:
_شوفي الا عندك شي مشكل مع شي حد غير هدري باش نقدرو نحلو المشكل من دابا، حيت حتى واحد هنا ماعنده الحق يفرض عليك شي حاجة ولا يضايقك غير حيت انتي متدربة وكتسايري كلشي فخدمتك.. فين كاين المشكل ألينا؟
بقات ساكتة مدة كتفكر واش تعاود ليه ولا ولا، واش ممكن بالفعل يوقف فطريق غيث ويخليها عليه فالتقار تكمل تدريبها ولا غتزيد غير تفاقم الوضع. شافت حتى عيات وقررت تعاود لعمر على الشي للي كاين باش بعدا ماتبقاش ساكتة وتخلي غيث يزيد فسوء الظن بيهم.
عاودت ليه كلشي من نهار الباركينگ حتى لنهار للي جاها نيشان وقال شكوكه وسوء ظنه بيها وعلى العرض الصريح دياله ذاك، بلاما تقوله ان غيث كيشك فيه حتى هو باش ماتوصلهمش لشي حاجة ماشي هي هذيك.
تبدلت ملامح وجه عمر للغضب ناض من الكرسي كيهدر بانفعال:
_هذا وصل لهاذشي كاقنل وباقي ساكتة ليه؟ اش كيحسب راسه باش يعاملك بذيك الطريقة قليل الحيا.. بلحق انا للي غنوقفه عند حده..
ناضت بزربة من على الكرسي ملي شافته ناوي يمشي يواجه غيث بذاكشي للي عرفه دابا، وقفت فطريقه وهي كتقول مترجية:
_عفاك اسي عمر لاما خليها لوقيتة اخرى.. انت راه معصب وتقدر تخرجو لكلام العيب وانت عارف غيث كثر مني ماكيخاف لا من شوهة ولا من تشوه سمعته.. انا للي غنمشي فيها الا صداعكم تسمع فالشركة مافيهاش.
أنت تقرأ
نبض الحب (بالدارجة)
Romantizmهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
