حتى حاجة ما ممكن تتصلح بعدما تنكسر، حتى ذوك الافكار الإجابية للي كانت كتقولهم شحال هذا على التفاؤل والأمل ولاو كيبانو لها كيف شي كذبة كتقال لطفل صغير مازال ما ذاق من مرارة الحياة.
فكرت ليلى مع راسها وهي جالسة وسط الجردة الصغيرة فالعشية بحدها، كانوا جاو لطنجة هاذي 10يام على أمل ان تغيير البلاصة يفيد أريج ويفيدهم هما نيت. ولكن بالنسبة لها حتى حاجة ما تبدلت، مازال الحزن مخيم على الاجواء رغم ان كل واحد كيحاول يدير شي حاجة للي تخرجهم من ذاك الجو.
سندت راسها على الكرسي كتشوف فالسما وهي كتقول بصوت منخفض لراسها:
_شنو مازال كديري هنا أليلى؟ مابقات عندك بلاصة بيناتهم هنا.. كيفاش كتقدري مازال تشوفي فوجه كل واحد فيهم بلا ماتمناي تشق الأرض وتبلعك؟
العودة للماضي
بعد يومين لوصولهم لطنجة وبينما كانوا كيحاولوا يرتبوا امورهم فهاذ المدينة، فبيت الحاجة فين كانت كتنعس مع أريج كانوا مجموعين، ما خرج عمر وليلى من عندهم حتى شافو أريج غمضت عينيها ونعست.
خرجت هي وياه وطلعو لفوق فين بيتهم وجات هي بغات تتجه لبيت حتى وقفها صوت عمر:
_ليلى بقاي بغيت نهدر معاك.
دارت عنده وبلاما تسوله على اي شيء تبعاته لصالون. هنا هي حست بلي عمر كشف امرها، وحتى الا ماكانش الشي للي غيهدر فيه معاها ذاك الامر فهي للي غتكون المبادرة فأنها تهدر معاه وتصارحه بكلشي. خوفها للي كان مانعها حست بيه طار ومابقات حتى حاجة كتخوفها، حتى فراقها معاهم الا كان غيكفر على خطأها فهي مستعدة ليه.
وقف عمر جنب الشرجم كيطل منه ورا الزاج وهو ساكت كيفكر كيفاش يجبد معاها الموضوع بلا ما يزيد يأزم الأمور كثر ما هي مأزمة. دار عندها شافها وهي كتدوز يدها على ذراعها كتشوف فالارض ساهية، وللي بيها كافيها ولكن من حقه حتى هو يحاسبها.
قال بلا مايقرب عندها وبنبرة هادئة:
_واش عارفة علاش قررت نخلي امر اختطافك من طرف مروان انتي وذكرى بعيد على العائلة أليلى؟
هزت فيه عينيها الذابلة وشيرت بلا وهي كتقرب كثر منه، كمل عمر :
_حيث مابغيت حتى واحد يلومك او يحملك اي مسؤولية منهم انا! مابغيتش كل مرة يجبدو مروان وماضيك معاه ويخرجوا عليك شي هدور يقدر ما يكون منها والو..كنت كنفكر فيك حتى فمصيبتي أليلى!
حدرت راسها حشمانة منه كثر، هو للي فأصعب ظروف حياته كان مازال كيفكر فيها، وهي حست براسها انانية فكرت غير فراسها وخافت من ردة فعله الا هو عرف شنو كاين.
كمل عمر بنفس النبرة للي كانت حاملة معاها كمية من اللوم والخيبة:
_وانتي اليلى؟ غير ماكتزيدي تعقدي الامور بعدم ثقتك فيا... عدم ثقتك فيا كيخليني نحس بلي غير كنكب الما فالرملة سمعتي؟!
أنت تقرأ
نبض الحب (بالدارجة)
Romanceهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
