نبض الحب (بالدارجة)

الحلقة43:(سوء نية)

أثناء جلوسهم مجموعين حول الطابلة فالجو الطلق صونى تيليفون لنادية وهي تهزه كتشوف شكون، غير شافت سمية المتصل حتى قطعت وهي كتشوف من حولها واش شي حد رد البال لها.

لاحظت ليلى توترها وهي تلتفت لها مكتفية ببتسامة خفيفة بادلتها نادية نفسها بزز، جاها ميساج من نفس المتصل وهي تهز تيليفونها كتقراه وكان مكتوب فيه بحروف لاتينية:" غتجاوبي دابا ولا نجي نخرجك من وسطهم"

بلعت ريقها بخوف وهي كتقول مع راسها ان عتيق يقدر يديرها بصح، هاذشي غير ماقالتش ليه فين هي صدق عارف. استأذنت منهم وبعدت عليهم، رجعوا هما لهدرة فحين بقات ليلى متبعاها وهي كتمشى بزربة حتى غبرت.

تمشت نادية لقدام باب الدار الخارجي وهي تجاوب على مكالمة عتيق للي عاود عيط عليها، ردت بصوت ناعم كيخفي توترها:
_سلام حبيبي..

_مرة اخرى غتقطعي فوجهي غيكون لي معاك حساب واحد اخر، بغيتك تجي دابا.

شافت نادية حولها كتطمأن من حتى واحد تما وهي ترد بنفس النبرة:
_حبيبي غير سمحلي قطعت عليك ولكن كنت معاهم وتوترت وانا نقطع بالغلاط!

دخلت ليلى لصالة كتقلب على تيليفونها للي ماعرفت فين غطس، بدات كتقلب بين الخدادي ديال الصالة حتى بانت لها نادية قدام الباب كتهدر وهي كتبسم كأنها مراهقة كتهدر مع حبيبها. الشي للي خلاها تشك فأن نادية كتعيش قصة حب ربما، وماعرفتش هي علاش استحسنت الفكرة حاليا، وكأن بسبب ذاك الحبيب هي غتبعد على عمر شوية!

****

بعد ايام من شهر العسل رجعوا لعرسان لدارهم، كان توفيق باغي مازال يدوز شي ايام فعطلته مع مراته ولكن جاهم خبر قلب كلشي. ماماه غضبانة عنده فداره للي فطنجة بحدها!

شاف فسمية وهو كيفتح الباب بسوارت وقال:
_غير الله يستر اوصافي.

ما جاوبتش هي وكتفت بابتسامة مطمأنة وشدت ليه فيده، غير دخلو وسدو الباب حتى بانت ليه ماماه جاية عندهم وهي كتقول وكأنها توحشت ولدها للي مادازت حتى 15ليوم على زواجه:
_الله اولدي شحال توحشتك..

عنقاته بحرارة كما دار هو وهي تشوف فسمية مرحبة وهي كتسلم عليها:
_مرحبا بولدي وعروسته مرحبا...جيتو بكري ياك قلتو غتدوزو شي شهر علاش زربتو؟

رد عليها توفيق وهو كيزيد يده فيد سمية ناحية المرح:
_ماهنانيش خاطري نخليك بحدك فمديمة غريبة وانا فشهر العسل، وحتى سمية كانت كتقولي غير نمشيو مانخليوهاش بحدها..

شاف فسمية وطبطب على يدها كأنه كيشكرها فحين ماماه قالت بتنهيدة:
_اييه اولدي غي سمحولي، ماشتيش باك مدوزها عليا غير شد التقاعد وولا راجل اخر غير ينگر ينگر ينگر..اوا ملي تهنيت عليك انت طلع لي فراسي وقلت نغضب حتى انا فدار ولدي شوية بحرا يحس بقيمتي...