عقيمة ولكن

الجزء 05

قاليها امي لا اله الا الله ،معقول وصلت بيكي المواصيل للكلام دا ؟

وياتو يوم دي كانت عاداتنا ولا تقاليدنا ؟

قالت ليهو انا امك ما غريبه ، اثبت لي انها بنت وتعال وريني ، الا اذاااا انت عارف حقيقتا وداير تتستر عليها ..

قاليها امي البت دي انتي وخالتي الجبتوها لي ،لا هي اختياري ولا انا بعرفا ، بس كمان عرفت بنات وبعرف المحترمة من الما محترمة ، والبت دي بت ناس ، و ما تظلميها ساي. انتي كمان عندك بنات .. قالت ليهوو كلامي واحد و الله واحد يا عثمان ، وإلا غضابنة عليك ليوم الدين ..... سكت منها و تاني ما سمعت شي .. بقيت برجف و باكل بشراهه غصب عني لاني جسمي محتاج للاكل ، برجف و دموعي دي نازله عشرة عشرة في وشي ، حاسة بالخوف للحظة اول يوم في زواجي اتحول ل كابوس ، ااي انا زي اي بت خايفه من ليلة زواجها و من زوجها و من كونها فجاة تعيش حياة جديذة وسط ناس جداد عليها ، لكن الكابوس هنا ام زوجي ، ااي انا بسمع بالحموات والمشاكل لكن ما للدرجة دي ، وانا ما زولة شدايد ولادايرة مشاكل ، اتوقعت حياتي تكون اسهل ، اني اخدما و اساعداا و ابقى ليها زي اي وحدة من بناتها .... من هنا عرفت ان قدامي خيارين ، يا اتغير و اخد حقي و ما اسكا ، يا اما اسمع وصية امي ( قدمي السبت تلقي الاحد ) حماتك هي امك ، احترميها وشيليها و ساعديها وخافي الله فيهاا ...

اكلت ، قمتا ، طلعت اسدال الصلاة ، دخلت الحمام الجمب غرفتي ، غسلتا ، فتحت دولابي ، طلعت لي جلباب خليجي راقي بنفسجي ، لبستو ، و سرحت شعري عملتو ضنب حصان ، اخدت لي بختين ريحه ، شلت صينيتي و طلعتا ..

( في جانب تاني )

_مافي حاجة

*لالا في انا ما بعرفك يعني

_قلت ليكي ماااافي ، حتقعدي تسأليني كتير بقفل فيكي ، انا متصل بيكي عشان اروق دمي ما تزيديها علي انتي كمان !

*طيب حبيبي اسفة حقك علي بس خليك عارف انا ما برضى فيك الهبشه ، اليزعل حبيبي بخنقووو ، ايوااا كلو الا سمنو حبيبي

_ كنت عارف انك تقدري تروقي لي مزاجي

*كويس ان لي فايدة

_مالي غنى عنك

*ماليك غنى عني ! هه و كسرت بخاطري ومشيت عرستها ليه ؟

_تاني حنتكلم في الموضوع دا ؟

*ليه كل ما افتح معاك الموضوع دا بتتهرب مني

_عشان انا عند كلمتي ، كلها مسألة وقت !

*علاقتكم شكلها كيف ؟

_اففففففففف اففففف ياخ تاني

*طيب اسفه بس والله بغير عليك غصب عني اسوي شنو يعني يا ربي

_اديني شوية وقت ، و ما تزعلي انتي عارفه انا بحبك ، عايزك تروقي كداا ، انا حولت ليكي قروش ، عزي نفسك ودلعي نفسك اعتبريها هدية مني اراضيك بيها ..

*يا روحي انت عارف انا القروش دي اخر همي و حبي ليك دا ما ببدلو بي مال قارون عارف كدا انت صح ولالا ؟

_عارف ، اسمعيني انا وصلت البيت ، بعدين بكلمك

*اتصل انا ولا تتصل انت ؟

_بتصل انا

*ما تتاخر علي بنتظرك حبيبب ، يلا باي

_بااي ....

شايلة ، صينيتي و نازله ، ماشة علي المطبخ ، لقيت ام عثمان قاعده وتتفرج في التلفزيون و بتودود في التلفون ..

عاينت ليها بأبتسامة ، و دخلت المطبخ ، لملمت الصينية ، و غسلتا حاجاتي ،، ختيت لي فحمايتين في النار .. و شديت البراد علي النار ، بفتح في الدولايب بشوف اماكن الحاجات ، لمن لقيتها وجهزت الصينية ، وبسوي في الشاي ،. ختيتو في الصينية ، و طلعت بيهو براا

ختيتو قدامها في التربيزة ، و رجعت المطبخ شلت الفحم ، و طلعت غرفتي جبت البخور و نزلتا ، ختيتو في الفحم و بقيت بنفخ فيهو ، خليتو يبخر ، ومشيت قعدت جمبهاا ..

كبيت الشاي ، قلت ليها كم معلقه ؟ ماردت علي ، كررتا ليها ، تاني ، كم معلقة ؟ م ردت علي ، قلت ليها علي العموم السكرية موجودة لو حابة تطعمي بنفسك ، اتفضلي .. وسكت بكل حسن نية ،

فجأة م حسيت الا بيدها دي في شعري جاراني منو بي قوتاا ،، قالت لي اوووووعك تطاولي و تحسسيني انك مالكة البيت داا و تعملي بيها الآمر و الناهي ، هنا ، فاهمه ولالا ، و ما انتي التوريني مكان السكرية ، انتي الزيك خدامة تحت رجولي كا بيسوى ، يشتغل .. قلت ليها فكي شعري بعد اذنك ، قالت لي ليه وجعك ؟

( انا هنا وصلت مرحله واول مرة احس اني متعصبه للدرجة دي و لو استمرت كدا انا ما عارفه كيف ممكن اتصرف معاها ) ..

بس لمن هي بقت مصرة و بتزيد في قوتا وحسيت اني صدعتا من مسكتا ، مسكت يدها بي يدي ، بي قوتي كمان زفيتا بكل غضب ، قلت ليها ، لمن انتي ما دايراني جيتي عرستيني لي ولدك ليه ؟؟

مع كلامي و حركتي العملتها ، عثمان جا داااخل ......

يتبع.....