عقيمة ولكن

الجزء 19

وانا طالعه ، ابوي وقفني ،، قالي ، مرتاحه في حياتك الجديدة ؟

قلت ليهو اكيد بس بشتاق ليكم شديد ، قالي مع الايام حتتعودي ،بس ما داير منك اكتر من انك تخلي بالك علي نفسك و تاخدي علاجاتك و ما تهملي متابعتك و تحاليك فاهمه ؟ قلت ليهو اكيد يا ابوي م تشيل هم ، قالي خلي بالك من راجلك وامو ما تقصري عليهم في حاجة ، قلت ليهو زي ما ربيتني يا ابوي وانا بتك ، قالي دي ثقتي فيكي برضو ،،

فتح لي يدي و خت لي قروووش ، قلت ليهو انا عندي عثمان م مقصر مني في حاحة وعندي قروش واصلا ما محتاحة لقروش ، قالي ما قصة محتاجة ولا محتاجة ، زي ما كنتي في بيتي بديكي مصروفك اسي مافي حاجة اتغيرت برضو ليكي مصروفك ،حقي براهو وحق عثمان براهووو ، يلااا عشان ما توقفي راجلك براا ،، بوستو في راسووو و طلعتاا ... بالجد كنت مبسوطه ما عارفه زيارتي دي غيرتني ، حاسة بي طاقة ايجابية حاسه ان حياتي حلوة شديد بس انا مقيدة نفسي و مستكئبة و ما شايفه الجوانب الحلوة فيهااا ... سرحت في تفكيري لدرجة ما حسيت بوجود عثمان دا نهائي ، و لو اتكلم زي الما اتكلم ... ما انتبهتا الا لمن وقف العربيه ، جمب الصراف ،، نزل اظن سحب قروش ، فتح درج قدام ختا القروش ، وحرك ،، شوية و وصلنا البيت كانت 9 مساء ..

دخلنا البيت ، شوفو المفاجأة ،، لقينا السفرة مليانه بما لذة و طاب ، اتخيلوووو ..

عثمان بقي ينادي في امووو ، جات طالعه من المطبخ بي ابتسامة ، قالت لينا اخيراً جيتوو ، عثمان قاليها انا قبل شوية طلعت منك ما كانت في الحاجات الجميلة دي ، قالت ليهو مفاجاة ،و وهاد من جاتنا ما اتلمينا في سفرة وحدة ،اطلعي ي وهاد غيري وتعالي الاكل حيبرد ، وانت يا عثمان اتحرك واقف كدااا ..طبعا انا في ذهول ما عادي ..

طلعتاا ، غيرتا سرعه سرعه ،و نزلتا ، قلت ليها في حاجة ناقصه اتمم عليها ؟

قالت لي لالا بس تعالي اكلي ،، قعدت في كرسي قالت لي لا دا بتاع عثمان ، تعالي اقعدذ بي جاي ، قلت ليهو تمام وحولتا مكاني ،جا عثمان هو كمان قعد ..

لقيتا مجهزة لي صحني و اكلي قدامي بي كباية العصير ،حتي عثمان قاليها عارفاني بحب العصير مع الاكل ، ليه كبيتي لي وهاد بس و ما كبيتي لي ؟

ارتبكت ، قالت ليهووو معليش اتلخمتاا ، قلت ليهو هاك كبايتي انا اسي ما حاشرب ،، قالت لي بي خلعه لالالالالااالااااالا انا حاجيب ليهو ، لا م تشرب ،اااا قصدي دي كبايتك والعصير راقد حأكب ليهو اسي ،، اتخلعتا في ردة فعلهاا ، قلت ليها تمام ...كبت ليهو و قعدنا اتعشينا ، وابت تخليني الم معاها حاجة ، طلعت صليت و رقدتا .. بقيت بستغفر لمن نمتا ، و ما صحيت للصلاة الصبح بالمنبه ، طلعت صليت و سامعه عثمان بيتونس و يضحك بالتلفون ، ما اشتغلت بيهو رجعت سريري ، نمت و ما صحيت الا الصباح زي الساعه 9 ،

قمتا رفعتا الفرش حقي ،و نفضتا و فرشتو تاني ، دخلت استحميت ..

نزلت ، ما لقبت زول في البيت ، شربت شاي واخدت علاجي ، استنيت لحد الساعه 11 جات ، اتصلت علي الحنانة ادتني العنوان ، لبست عبايتي و شلت شنطتي و مشيت ، و حمدت ربنا انه مافي زول في البيت .. طوالي علي الشارع ركبت لي اقرب امجاد ، اديتو العنوان وصف لي ....

ما قادرة اوصف ليكم جمال المركز يفتح النفس ،دخلتا رحبو بي شديد ،و و تني رسومات كمية اخترت وحدة احلا من حنة عرسي ،، خلصنا من الرسم الساعه 1:30 لمن نشفتاا دخلنا علي تلاته ..

عملو لي الماسكات والتقشير و الحاجات والحواجب ، و شعري استشوار و مكوة كيرلي كبار .. خلصتا كانت 5:30 ، اتصلت بي ياسمين ، وصفت ليها عنوان البيت لمن انا وصلتا ، هي كانت وصلت ،، من شفت عرلية عثمان برا مافي عرفتو ما رجع ، دخلت ولقيت امو ككمان ما جات ، دخلت ياسمين غرفتي ،،

طلعت حاجاتي ، و مكياجاتي ، و قعدنا للونسه والنضمي ....

( في جانب تاني )

*اسمعي هناااا انا ساكته ليكي ومتحملاكي و كل مرة تقولي دايرة قروش وانا بديكي اكتر من حقك ،المرة دي دايرة حاجة من الاخر ..

_عيب عليكي انتي بس نفذي البقولو ليك بالحرف الواحد

*نفذتو كل حاجة قلتيها سويتا

_اهم شي البدرة تكبيها زي ما وريتك

*كبيتا والله

_بعد اسبوع حتشوفي البيحصل

*منتظرة ، نشوف اخرتك شنوووو

_اخرتي خييييير

*انا ماشه

_ماشه العرس

*اناريك ما هينة كمان عرفتي العرس

_عيب عليكي اسيادي ما هينين ، الليله غايتو منتظراك حاجة في العرس ما قدرتا احددا

*زي شنو ؟

_ما ظاهرة لي لكن حاجة واعرة خلي بالك

*طيب انا بقوم اتاخرتا ، اجيك متين تاني واجيب ليك سنو معاي ؟

_الجبتيهو لي كفايه ، تاني بعد اسبوع

*تمام ، يلاااااا ....

انا هنا ، استحميت وصليت و قعدتا لياسمين تعمل لي مكياج خفيف و ناعم ، صراحه زبطتني ، لمن جات 8 ،عثمان جا البيت ، خبط الباب ، قلت ليهو معاي صحبتي ما حينفع تخش ، قالي انا حالبس في الاوضه التانيه ، قلت ليهو عايز حاجة من هنا ؟ قالي ريحتي بس من التواليت بعد اخلص ناوليني ليها و ياريت تخلصي عشان الوقت اتاخر ، قلت ليهو تمام .. ياسمين لفت لي توبي الاسود مشغول بالفضي. ، و لبست اكسسوارتو ، و رفعت شعري من ورا بتسريحه زي ضنب الحصان عشان التوب شيفون طول شعري ظاهر من ورا لي اخر ضهري ملفوف ، و لبست كعب عالي رغم اني طويله بس زبط معاي ، و اتعطرتا ، و ما خليت جيهه ما اتجيهتا ، لمن بعاين في المراية لمن خفت اسحر نفسي ..

* في الحلقة الجاية *

لا ، ما بصدق لالالا مستحيل ، هي بشر برصو واكيد لالالا ، انا فاهمه غلط ، انا ما اذيتها بي حاجة والله ،لالا ما للدرجة دي طيب طيب بسم الله ، بسم الله ، يا رب بيحصل معاي شنوو اناا ....

طيب البت ديك منوووو،و وليه قالت كدا قدام الناس ،وليه هو ما سكتااا !

لا البيحصل دا مستحيل ، يا رب تساعدني يااا رب ، يا اضعف يا اقوى .......#انتقم ؟ 

يتبع....