عقيمة ولكن

الجزء 01

*شوووفي هنا ، قلة ادبك واستحملتها ّ

اتطاولتي علي و استحملتها ، مشيتي نومتي في غرفة نومي و في سريري و مع راجلي واستحملتها ، لكن تمدي يدك علي ! هناا انا حأتحول لوحدة انتي للاسف ما بتعرفيها ، المرة دي مسكت يدك قبل تصلني ، لكن المرة الجاية بسكرا و اخليكي تكريها وراك ،، وقع ليكي ؟

_تكسري يد منووو يا عا....... هاهاهاهاها

صراحه قلبي ما طاوعني اتمها خفت اجرحك

* لالا تميها

_حابة تسمعيها شديد كداااااا !

*لانك ما حتفرقي مني في حاجة

_اعوز بالله منك ومن حقدك يا وهاد ياخ اتمني لي الخيير ما تبقي #عاقر و حاقدة في نفس الوقت .

*ااااي ، انا #عاقر ، ابقي مرة انتي وجيبي ليهو الولد وانا بحلق شعري دا صلعه ،و ابوي ما يبقى جابني لو حملتي منووو ........

*جزئية معلقة*ّ

_ مبرووووك

*اممم الله يبارك فيكي ،عقبالك

_مبروك حبيبتي تتهنو

*تسلمي يا خالتو الله يبارك فيكي

_اوووه وهوده ماشاءالله تبارك الله طالعه حلوة شديد ، مبروووك

*دا من زوقك ، الله يبارك فيكي

( يارب انا تعبتا من التبريكات والجوطة والله اعلم المنتظرني لسه شنو ) .. جاتني امي :

_يلاا يا وهاد فكي وشك دا

*حاضر يا امي

_مالك انتي جعانه ولا شنو ؟

*لالا اكلتا ، بس وريني ختيتي لي الحقنة وين ؟

_في الشنطه الصغيرة

*بتبوظ لكن

_وهاد انا ما غبية ، ختيتا في حافظة صغيرة انتي بعدين لامن تصلي ختيها في التلاجه و حتلقي تلاته امبولات ارفعيهم ف الفريزة

*طيب تمام

_و زي ما وصيتك فاهمه

*ان شاءالله يا امي

_يلااا ابوك قدام ودعهيو ، و الجدلة والقرمصيص انا بكرة بجي اشيلهم ، اوعك تجيبي لي ريحه في الجدله دي اعملي حسابك ..

*حاضر ..

_يلااا ...

مشيت بالزغاريت والاغاني ، سيروني لحد العربيه، ودعت اهلي و ركبت ، ركبت العربيه وانا ما قادرة احدد احساسي صراحه هل انا مبسوطة ؟ ولا ولا ،،طيب يا وهاد في كل الاحوال خلاص انا بقيت مرة الراجل دا ، دي بداية جديده وحياة جديدة ، هسي انا دوري بس انفذ وصية امي ، امسك راجلي علي و اسمع كلامو واخدم اموو ،و ما اقول غير طيب و حاضر ، دموعي نزلت ،، فجاة حياتي اتغيرت و بقيت في عصمة راجل ،اي انا وافقتا علي الزواج دا بي ارادتي لانو دا مصيري و ما بيفرق معاي اذا كان زواج تقليدي ولالا المهم السترة علي قولة امي ، وانا اسي لازم ابتسم واضحك واحاول اتعرف عليهو واكسب رضاهوو ، هو راجل برضو في النهاية، وامي بتقول احترام الراجل واجب ... مع كلامي الجواي دا فجأة لقيتو فاتح لي الباب و مادي لي يدو ومبتسم ، بيقول لي انزلي يا أميرة .. صراحه فرحتا فرحه ما عادية حسيت بشي حلو ، رغم بساطة الكلمة الا انها رسخت جواي كدا يمكن عشان اول مرة في حياتي راجل يقول لي كلمة حلوة ، مشا قدامي فتح باب البيت و جا مسكني من يدي و قال لبتاع العربيه ارجع انت ،، و متماسكين و انا م قادرة اتحكم في مشاعري البسيطه فاضحاني بأبتسامة علي وشي، للحظة دموعي الكانت في خدي اتلاشت بحاجات بسيطه وعفوية منو ...

يلاا البيت دا اصلا بيت ناس عثمان ، ااي عثمان دا راجلي ، ما مشينا شهر عسل ولا انا طالبتا بحاجة زي دي و البعرفو انه امه مرة كبيرة محتاجة خدمة و بناتها كلهن معرسات تقريبا ما عدا وحدة غايتو لحد اسي ما اتداخلتا فيهم ،و من يوم ما جو اتقدمو لي كلامهن كان مع ابوي و اخواني ، كل العرفتو اني حأعيش معاهم في نفس البيت و لي جزو مفصول منهم ، بالنسبه لعثمان عمرو 30 سنه او 31 سنة ، علي حد علمي في اللحظه دي، بالاضافة ل انه عنده محل الالمونتال وقزاز ورخام ، ماشاءالله وضعو حلو شديد يعني حتي البيت دا فخم شديد ، و حتي عرسي و شيلتي الناس كانت بتتحاكى بيها للقريب والغريب ، و زواجنا دا زواج صالونات زي ما ببقولو ، يعني زواج تقليدي بحت ، تم في فترة صغيرة ، خطبتني ليهو وحدة من نساوين الحلة الجمبنا بتشرب مع ناس امي الجبنة ، بس يعني .... نتعرف عليهو من هنا ...

دخلنا للصالة الكبيرة الفيها الجلوس و كانت ضلام ، قام فك يدي و مشى ولع نور واحد بيضوي علي السلاام البتطلع فوق للغرف ، طلع قدامي و انا فضلت واقفه ، قام قالي ، اتفضلي يا عروس و مد لي يدو علي اساس الفستان مجرجر ومنفوش و ممكن اقع اذا دوستا عليهو ، مسكت يدو يدي الكانت بترجف ، و طلعنا فضل ماسكني لمن وصلنا غرفة اللي هي غرفتنا ، اشر لي بي يدو ، ان دي غرفتنا ، و جمبها حمام ،. قالي ، انا طالع استحمى ، واغير واحصل الصلاة ، قلت في سري معقول الفجر قرب يأذن .. قلت ليهو تمام ، قالي انتي غيري و اخدي راحتك ،واكيد دا بيتك خلاص يعني ، وجاا علي باسني في راسي ، قالي مبروك علينا يا وداد ،، سكتت من الخجل و قلت ليهو وهاد ، اسمي وهاد ..

قالي اهااا ، و مشى علي الدولاب ، شال غيار و طلع ..

يتبع....