عقيمة ولكن

الجزء 08

خليتو يشحن ..

و راقدة ، فجأة باب الغرفة فتح ، قمت ناطة علي اساس انه عثمان ، لقيتا امو ، قالت لي راقدة ليها شنو ؟ معرسنك عشان تترقدي من مكان لمكان ، يومي اتلحلحي ، عندي غسيل دايراك تغسليهو ليهو !ّ

استغربتا ، تاني قلت ما مشكله اساساً الغسالة اتوماتيك ما حتتطلع لي حنتي ، قمت علي حيلي و قلت ليها أبشري عيوني ليكي ، م عارفه ليه هي بتتغاظ لمن ارد ليها رد حلو ومحترم ما عارفه هي دايراني اكون كيف صراحه مستغربة فيها ،وعلي فكرة هي اصلاً مفروض تكون اول اسبوع دا قاعده عند اختها في الاماب ، ع اساس عرسان يعني هئ ، قمتا و هي واقفه لي في الباب ، قالت لي طالعه قبل تطفي التلفزيون ، بعدين ابوك حيجي يدفعا لينا ؟

رجعت طفيتو واتجاوزتا كلامها المهين ، وهي واقفه تتفحص كل حته في الغرفه ، اصلو ما اتكلمتا ، قالت لي انزلي الحمام تحت ، و عندك الطشت والصابون ،، قلت ليهاا طشت ! بس انا عروسه وحنتي حتطلع !!ّ

قالت لي سمعتيني قلت شنو ؟ قلت ليها ايوة ، نزلتاا و متضايقه من الموقف ، مشيت الحمام لقيت سبت الملابس ملان لمن موقع في الارض ، شكيت ان الملابس دي نضيفة ، بقيت بقلب فيهم لدرجة ان في حاجات بي تطبيقتا انتو متخيلين ، ملابس نضيفه من الدولاب ، قلت يمكن اتلخبطت ولا حاجة !

طلعت من الحمام لقيتا في الصالة ، قلت ليها انا عايزة اقوليكي حاجة بس خايفه تفهميني غلط والله او تحصل مشكله من غير قصد .. وقفت و ربعت لي يدينا ، يعني احكي ..

قلت ليها بصراحه ، انا شفت الملابس في السبت و الملابس نصها نضيف و مطبق ، انا بس حبيت اوريكي يمكن تكوني لخبطتي و اذا عايزاني اعيد عليهم ولا اغسلهم مرة تانيه انا ماعندي مشكله ، بس قلت يمكن تكوني ما انتبهتي ، قالت لي ، ما دايرة تغسليهم ؟

قلت ليها انا ما قلت كدا ، انا بس ..........لقيتا مشت بعيد و شالت التلفون ، ختتو مسافة في اضانها ، بس فجأة انفجرت بكى ، ما شفت مرتك يا عثمان و العملتو فيني كل دا عشان قلت ليها غسلي لي شوية الهدوم ديل ، كوركت و هاجت فيني ،و جدعت لي الهدوم في الحمام، تعال حصلني يا عثمان ،تشيل و تبكي ......

طبعاً انا قعدت في اقرب كرسي و مسكت راسي ، من البيحصل معاي داا ،، بعاين فيها بحاول افهم طينتا شنو بالضبط، دي لا يمكن تكون بشر ، استحاله .... والله خشمي وعندي اصلو لا اتكلمت معاها ولا سألتها ، لقيتا دخلت الحمام و قفلت الباب من برا بالقفل ، وانا بعاين فيها ، او بمعنى اصح ، بتفرج في الدراما الحاصلة دي ، لقيتا بتفرفر في البيت رايحه جايه ، قريب نص ساعه ، انا قلت اكسر الشر و اقوم اغسلهم احسن ما عايزة مشاكل ، بس العرفتو ان ما لي عيشة في البيت داا ..

مشيت علي الحمام ، بحاول افتح الباب لقيتو مقفول بالقفل شبه متربس من برا و هي شايله مفتاحو ولا قفلتو كيف ما بعرف ، خفت اتكلم معاها ولا اقوليها افتحيهو ،دي الكلام معاها بحساب ..

رجعت قعدتا في محلي ، الا شوية و سمعنا صوت عربية عثمان ، مع صوت العربية ، بالله المرة دي قامت ناطه متر علي الحمام ، فتحت الباب وجرت رقدت في الكنبة ، و تتآوي و تأه اه .. و العيون دي في ثواني بقت حمرة و نزلت دموع من مافي و تبكي و تتباكا ... بس عثمان جا داخل ، يعني حيعمل شنو لمن يشوف المنظر دا قدامو ! ّ

جا داخل ، عاين لأمو ،و عاين لي ،، و امو بتتكلم و تشكي بكلام كلو ما حصل ، عاين ليها و طلع فوق ، و انا خمشي ما فتحتو ، طلع واتوقعتو ينزل بي حزام ولا بي حاجة ، يمكن ربع ساعه ما نزل ، و امو دي وشها جاب الوان الدنيا دي كلها ، طلعت فوق انا كمان ، لقيت الباب متاكا ، خبطت الباب و دخلت ، لقيتو مضلم الغرفه و مغير و راقد شبه انه داير ينوم ، صراحه ردت فعل غريبه ما اتوقعتها .....

قعدت في طرف السرير ، قلت ليهو عادي اتكلم معاك ؟ ما رد علي

طوالي ، مشيت و قفلت الباب وراي .. نزلت تحت ...

( في جانب تاني )

_سرحانه وين

*بفكر

_في فلان داك صح

*بالعقل كدا يا لينا ، الزول دا عريس و ابسط حاجة يسويها يكون مع مرتو ،مش يكلمني انا

_لانو ما راجل و ما بيستاهل مرتو دي ولا يستاهل ضفرها حتي اسي دي لو وحدة شديده كانت نجضتو نجاض

*تقصدي شنو يا لينا ؟

_قصدي واضح والله

*طيب حتشوفي في اليومين الجايه دي حيحصل شنووو

_حيحصل شنو يعني !

*حيحصل كل خيرر

نزلتا ، مشيت الحمام ، ختيت الطشت ، و قعدت اغسل لحد الساعه 10 بليل حتي خلصتا غسيل ، و مشيت شريت الغسيل ، و امو ما شفتها ، ولا شافتني ، خلصتا و لملمتا الحاجات و ضهري من قعدت الطست لمن حاسه متشنج ، مشيت المطبخ ، اخدت علاجي و اكلت لي سندوتش ، ( بالله يا كافي البلا من جيت البيت دا ما قعدنا في صينية وحدة و لا شفت لي زول اكل ، غايتو حمدلله بس ) ..

خلصتا و طلعتا غرفتي ، لقيت عثمان لسه نايم ، فتحت الدرلاب شلت لي غيار و طلعتا ، استحميت و رجعتت ، م عندي حل الا انوم جمبه ، و انا من النعاس م شايفه قدامي ، اضطريت رقدت و اتغطيت ، والله من التعب نمت طوالي و ما صحيت الا ب عثمان بجر في الغطاء مني و ....

يتبع.....