قعدت علي السريير ،وكان عاجبني شديد انه كبير و المرتبه اسفنج و مريحه ، و تفاصيل البيت الكنته بتفحصا بي دقة شديدة ، هو ما انبهار بحاجة انا اول مرة اشوفها او اني اول مرة اشوف عز وخير في حياتي , لالا دا شغف كدا جواي حتعرفوهو كمان لقدام ، المهم ،كنت متفائله و مرتاحه للحظة حسيت اني محظوظة شديد ، تعامل عثمان اللي كنت خايفه منو ومن فرق السن ، قدر شنو هو انسان بشوش ولطيف و محترم ، حتى صوتو الهادي كان معزز جوا نفسي الثقة ب اتو انسان كويس شديد ، فجاة سمعت صوت الباب ، واتوقعتو يجي الغرفه بس ما جا ..
و عرفت انه طلع ، عاينت للساعه لقيتا 3:30 قلت غريبه ، انه لسه بدري علي الصلاة ، معقول يكون الجامع بعيد ! عشان كدا طلع بدري !!!! ، قلت انا مالي المهم انا حأخد راحتي اسي احسن لو كان موجود م كنت حقدر اسوي حاجة .. قمت بقيت بفكك في الدبابيس الكتيرة الفي الطرحه، واطلع الاكسسوارت زهجت من كمية الحاجات الفيني ، لمن انتهيت ، و دخلت استحميت ،و غيرتا ،و مشيت السرير ، لحد الصلاة جات قمت صليت و رجعت رقدتا. الصلاة انتهت و عثمان لسة ما رجع .. م حسيت علي نفسي صحيت بصوت اذان ، عاينت للساعه عرفتو دا اذان الظهر ، من رفعت راسي بتلفت ، زول جمبي مافي والباب فاتح زي ما هو ،، مشيت الحمام ، استحميت و طلعت صليت ، مشيت جمب باب الغرفه بقيت سامعه صوت ضحك ، و كأنه بيتكلم مع وحدة ، قلببي دا داير يطير من مكانه ، بقيت بمشي علي اطراف اصابعي بحيث اني اشوفو من فوق لانو علي حسب فهمي انو في الصالة تحت .. فعلا بقيت ماشه علي اطراف اصابعي ، وكل ما اقرب الصوت بيقرب اكتر ، لمن وصلت ، بقيت بعاين م شايفاهو بس سامعه صوتو بيتونس ، والله يا جماعه صفيت نيتي ، وقلت يمكن مع امه ولا اخته جو البيت ، بس لقيت انه صوتو واطي وكلام زي كلام الحب ، و فجاة يضحك من جوااا قلبو حسيتا .. برضو قلت خير م مشكله ، انا انزل عديل بس ..
فعلا ما كذبتا ، طوالي نزلت عادي جداا .. اول حاجة عيني جات عليهو هو راقد في الكنبه و موصل السماعات و بيتكلم ، من شافني قام علي حيلو ، وابتسم ، قال للبيتكلم معاه ، يلا انا حقفل اخيراً عروستي صحت ... انا هنا اتوترتا وزعلت من نفسي اني يمكن شكيت فيهو في لحظة عابرة ..
قام علي حيلو وجاا علي ، مسكني من خصري ،وباسني في راسي , قالي كملتي النوووم ، ها نمتي مرتاحه ؟ سكت و رجعت منو لوراا .. قالي مالك لابسه كدا ومغطيه شعرك علي فكرة انا راجلك والله ههه ،، قلت ليهو انا كدا مرتاحه وكنت بصلي اصلاً عشان كدا ، قالي ولا يهمك حبيبتي انا ، و تقبل الله ، و اكيد جعانه دي ما دايرة ليها سؤال ، المهم كل حاجة جاهزة حجتي ما قصرت معانا ، قلت ليهو الله يديها العافيه ، حابه اتعرف عليها وعلي اخوانك واخواتك ، قالي امي في غرفتا ،، قلت ليهو : ش شنو ؟
قالي مالك ؟ قلت ليهو لا ولاحاجة ، قالي ما تخافي ما حتضايقناا ،بقيت بتمتم قلت ليهو دا بيتا تضايقنا في شنو بالعكس هي تجي وانا امشي ، قالي امممم ، تمام انا طالع فوق خلصي وحصليني ،، عايزة اقوليهو انت ما حتاكل ، لقيتو مشى ...
مشيت علي المطبخ الفظيع ، كلو بالابيض حتى معظم العدة بالابيض ، اثاث فخم لدرجة فاتحه خشمي وبعاين فوق في السقف ،، والله يا جماعه انا ما مخلوعه ، انا كمان بنت خير حمدلله ، بس بطبعي بحب الجمال ، بحب الدقة ، بحب التفاصيل بحب الوش التعبيري لي كلمة #واو حرفياً كداااا ...... فجأة سمعت صوت بيقول لي :
رقبتك حتوجعك ، ليكي حق تتخلعي ،كنتي وين واسي وين !
عاينت ليها لقيتا امو لعثمان ، عاينت ليها و اتجاوزتا القالتو لي بكل سرور لاني ختيتا مكانة امي ، قلت ليها كيف حالك امي ان شاءالله بخير ؟
قالت لي انا ما امك ، امك في البيت ، انا اسمي بتول الماحي ،، قلت ليها ختيتك في مكانة امي احترام ليكي ،
قالت لي احترامك وفريهو يا بت ثريا ، سكت صراحه من حدة اللهجة وسخانتا ، قامت جرتني من ( اسدال الصلاة ، زي تحجيبه كامله بي طرحتا من قماش الهزاز ) .. قالت لي دي حاجة ليكي تلبسيها في صباحيتك ! من اسي بدينا البشتنه والعولاق ،ما خجلانه من روحك ، عروس متجرجرة بي دلاقينك كدا زي الخدامة ، دي حاجة ليك مع النساوين تلبسيها لي ولدي !ّ و دفرتني
فجاة لقيتا جرت الطرحه من راسي لاني لافاها ابت تتفكا ليها ، قالت شكلنا اتغشينا فيك شعره ما عندك تلقي من يوم شفتك وانتي متخمخمة لينا بالطرح ، كدي زحي الزفت دي وريني ، ( و بتهز فيني وجارة الطرحه لمن خنقتني ) .. قلت ليها حاضر طيب انتي جارة غلط زحي يدك عشان افكها ليكي ، والله مخلوعه لمن برجف .. قالت لي اتكلمي ب ادب عشان ما اطفشك في يومك دا زي المشو قبلك !
( في جانب تاني )
* ما قادرة اصدق
_في شنو يا بت !
*كيف شنو يا لينا ، عرسا وخلاني انا ! شكلو كان بيغشني يا لينا ، عشان تشوفي كذبو حلف واقسم انه ما حيعمل ليها عرس ..
_استغفرالله ياخ فكينا من الموضوع دا ارحميني وارحمي نفسك ياتوته
*انتي عشان ما حاسه بي عشان كدا بتقولي
كلامك دااا
_لا لانك تستاهلي مافي راجل بينوثق فيهو يا تماضر ، وريتك ستين مرة الراجل ما بعرس وحدة لف معاها ، وابسط مثال عندك عايني ليهو يوم فكر يعرس ، عرس منو ؟ عرس وحدة جمب خشم بيتم ما بنشوفا ..
*انتي ما بتعرفي عثمان يا لينا ، عثمان بيحبني وبيموت فيني و ما بيحبها هي علاقتو كانت بي انا وزواجو منها دا مؤقت.
_انتي مالك زي البتغشي نفسك يا تماضر !
لو ما دايرا ما بيخسر في عرسو قروش قدر دي ، ياخ دا الغدا حق العقد لحد يوم الليلة ما انتهى وخبيز عرسو دا للحلة الوراااا وزعو ليهم ، فستانها دا ما لبستو عروسه قبلها ، جاب ليها تلاته شبكات دا غير الفناني والدنيا والعالمين الجو حضرو العرس دا من وين و وين ، وبعد دا كلو تجي تقولي لي ما دايراا و دايرك انتي ،، عويرة انتي ؟؟
يتبع.....
أنت تقرأ
عقيمة ولكن
Mystery / Thriller📝 بقلم: سحر سمير في مثل معروف في مجتمعنا ، بيقوليك ،قدم السبت عشان تلقى الاحد ،، انا ضد الكلام داا ، لان في ناس لو قدمنا ليهم رووحنا و حياتنا و احترامنا في طبق من دهب ، حيفضلو كعبين ، ااي هم بشر ، لكن تصرفاتهم #حيوانية عشان كدا .. "كل الأخطاء الت...
