*صعب اثق في راجل #بيخون مرتو معاي !
_حلوو ، ابتديتي ترجعي لي كلامي الاساسي و كويس انك مقتنعه بيها انها خيانة
*انتي مشكلتك بتعامليني علي اساس اني وحدة مغمضه عين و عايشه الدنيا دي بعين ، لا حبيبتي و كان قلت ليكي حاجة تاني ما حتصدقيها .. انا مقتنعه ان البيعمل حاجة مرة حيعملا تاني الف مرة !
_زي شنو كداا ؟
*زي العملو مع مرتو
_ايوة اللي هو شنو ؟
*زي ما خان مرتو معاي ، بكرة حيخوني مع غيري ، بس الفرق هناا اني بعرف اتصرف و ما بنضرب علي قفاي ، و عيني مفتحه تمام
_عينك مفتحه هههههه الداير يغلط بيغلط من غير م تجيبي خبر
*لا وحياتك ما انا الانضرب علي قفاي، انا اضرب لكن ما انضرب ، و مشكلتك ما عارفه ان انا معاي #سلاحين ، كل واحد اقوى من التاني ،، سلاح واحد حيخلي عثمان دا زي الخاتم في صباعي ، عرفتي ليه انا ما بنضرب علي قفاي ؟
_يا لطييييييييييف منك ما بتتهبشي ....
انا مع لفيتي و هترشتي دي ، ماشه و ماسكة شنطتي ( بوك سواريه) بفتحا و بدخل فيها تلفوني وماشه ، ما حسيت بنفسي الا وانا خابطه لي زول ، و الاكعب من كدا انه ماسك ليهو كاسة بارد .. من الخلعه لمن كوركتاا حسيت بالتوب اتبلا .. بس فجأة لقيتو بيقول لي :
_عميااااانة انتي ما بتشوفي !انتي عارفه البدلة دي بكم ؟ دي بي دم قلبك ما بتشتريها ...
*غاظني وانا حاسه انه هو الضربني و هو حاسس انه هو الضربني .. عاينت ليهو لقيتو لابس نضارة شفافة و شاب طويل و قمحي و جمال كدااا ما بيتوصف ، بس دا كلو ما هماني .. قلت ليهو بكل برود .. علي فكرة انت اللي لابس نضارة ما انا ، اذن العميان منو فينا ؟ و بالله هو انت لابس بدلة يعني !
_شوفي قلة ادب و طولة لسان حقت بنات فارغه معاكي انا ما داير و مفروض تخجلي من نفسك انتي الماشه و ما بتعايني قدامم و تخبطي في الناس ، اختصري النقاش دا بالاعتزار. ..
*قلة ادب ! مافي راجل متربي بيقول قلة ادب و انا ادبي كان لقيتو تحمد ربك ليل نهار ، ولو انا ما بعاين ، انت مالك ؟ نضارتك مغبشة ، سمح بيجي معاها منديل صغير كداا امسحااا
_شوفي انا ما حاتكلم معاكي ، جيبي لي راجل اتكلم معاهوو
*من البدايه لو داير تتكلم مع راجل ما كان طولتا لسانك علي مرة .. و المفروض يعتذر هنا هو انت ما انااا و عشان اريحك ، اعتذارك ما بيشكل فرق معاي ، لاني مؤمنة بالقضاء والقدر ، ربنا شاء انشغل في شنطتي و ما انتبه للقدامي و انت الله اعلم كان حاصل معاك طشاش ولا نضارتك فيها شنو فا خبطت فيني ، فاااا دا الفرق البين تربيتك و تربيتي الاتكلمت عنها قبل شوية ..
_ اقوليكي شي ، انتي منو زاتك ،والجابك هنا شنو و عزمك منو اصلااا ، جابت ليها اشكال زي دي كمان ،صحي والله البلد بقت لامة .. و مشى خلاني ..
اي محروقه عديل لاني ما رديت علي ، نكدت علي و ضايقني شديد ، زول متفلهم و متقرضم علي الفاضي ، اووفف ..
دخلت الحمامات ، بقيت بغسل في التوب حتت البارد و انفض فيهوو ، بس حمدلله انه اسود ما حيظهرر ، خلصتا و طلعتا ، رجعت الصالة ،وقفت لي في ركن كدا بعاين في نون ياخ ولا اي زول بعرفو ، بس مافي ..اتضايقت شديد و حاسة ان الناس كلها مركزة علي و شكلي شين و انا براي كدااا ..
قلت احسن حل اطلع برا اشوف عثمان اخليهو يرجعني البيت .. و انا ماشه لمحت ام عثمان علي جمب ماسكة ليها وحدة و بتتناقش معاها و ظاهر فيهم الانفعال .. قلت انا مالي ، و طلعت برا الصالة ، لقيت شبباب ورجال و ناس كتار شديد ، فجاه لقيت عثمان جاني ، قالي في شنو ؟
قلت ليهو دايرة امشي البيت
قالي لي لسسسه الجماعه المستنيهم ما جو
قلت ليهو وانا ذنبي شنو ؟ انا ما بعرف زول هنا ومخنوقه وعايزة امشي ..قالي انا اتفقت معاكي ، عندي ناس مهمين و موضوع شغل عايزك تكوني موجودة .. قلت ليهو ما عارفه علاقتي شنو انا بالموضوع داا ..قالب علاقتك انك مرتي و تتحملي ، و مشى ...
استغفر الله العظيم ، ضاقت بي عديل كداا
( في جانب تاني )
*الجابك هنا شنو ؟
_انتي منو ؟
*ما تستهبلي عشان انا حافظاكي من مشيتك
_انتي اكيد مشبهة علي
*عايني انتي اكتر وحدة عاشرتيني و عارفه كويس انا ممكن اسوي شنو !
يتبع ......
أنت تقرأ
عقيمة ولكن
Mystery / Thriller📝 بقلم: سحر سمير في مثل معروف في مجتمعنا ، بيقوليك ،قدم السبت عشان تلقى الاحد ،، انا ضد الكلام داا ، لان في ناس لو قدمنا ليهم رووحنا و حياتنا و احترامنا في طبق من دهب ، حيفضلو كعبين ، ااي هم بشر ، لكن تصرفاتهم #حيوانية عشان كدا .. "كل الأخطاء الت...
