عقيمة ولكن

الجزء 37

تلقائياً انا وقفت ولقيت نفسي بعاين فيهو ،، وهو وقف يمكن من خلعتو م اتحرك لدرجة خت يدو جوا جيوبوو ، و فضل يعاين فيني ،حسيت الدنيا دي وقفت بيناا ، اتمنيت لو الساعه تخلد اللحظة .. ليه انا ما عارفه !

كأنه في نسمة جاتني بعد مرت عليهو ، حسيت باحساس والله مهما وصفتو ليكم ، انا ما حأقدر اعبر عنه ..

نون قالت لي يا بت سرحتي وين تعالي ، وهو امه قالت ليهو كرم ! م عوايدك انت كويس ؟

و هو في اللحظة دي لسه واقف و بيعاين لي عثمان ،نظرة ماف زول فهما غيري انا ونون ، نزلتا. انا بصلح في طرحتي ، و ام عثمان دي زي الما قاعدة معانا ..المهم اتلمينا علي طاولة الغدا ، طبعا قعدوني جمب عثمان ، و قصادي طوالي نون و محمد ، و كرم دا قصادي بس علي اليمين ..و ابتدو في ونسة الشغل ، و جات موضوع السلفيه ، و عثمان كان بيرمي الكلام علي محمد ، في حين انه قاصد كرم ، بس كرم م كان محسسو انه موجود و ما اداهو وش والحاجة دي ظهرت في ملامح عثمان كغضب ..

قالت لي امهم ،يا وهاد انا دايرة اطلب منك طلب لكن والله خجلانه منك..قلت ليها بلهفه انا زاتي م حسيت بنفسي ، لاني جد بحبها ، قلت ليها .. ماف ام بتخجل من بتها والله انتي تأمريني و انا انفذ ،، قالت لي الله يحفظ الرباكي ، قلت ليها امين يا رب ويحفظك ويديكي العافيه ،، قالت لي اللهم امين ، يبا كنت دايراكي تسوي لي زي الجبنة ديك داخله راسي شديد ،تكون بي الكانون والجو حقها ، قلت ليها من العين دي قبل العين دي ، نون قالت ليها يا امي الضغط ،، قالت ليها وهاد بتزبطا لي خفيفه حلوة و ما بتاثر فيني ،، كرم قاليها ، انا عندي بن جبتو معاي ماف داعي لقعدة الكانون و الغلبه دي ،جربيهو يا امي ! ( فهمتو كرم بيرمي علي شنو ! ) ..

محمد قاليهو بنك دا من متين بتفرط فيهوو ريقي نشف وانا احنسك تديني ، امو قالت ليهو انا زاتي مستغربه ، لكن جبنتنا زيها مافي بي جوهاا ، قاليا يا امي تعب ع ....*سكت لمن لاحظ لنفسو ،قاليهاا انا مالي بس كان لي مزاج اشرباا و انا م داير دي .. قالت ليهو حتعجبكم و ما فيها تعب انا مجهزة ليها كل حاجة ، بس كملو غداكم دا و بتسويها ليناا ..

قلت ليها جداااا ، نون عليها الفيشار و الفنكوش والكلام دا ! قالت لي احلاا فيشارر واحلا قزفزة دا شغلي اصلااا يا حليلك يا مهرة ،جو الحبوبات دا فاتك هههههه ..

( في جانب تاني )

*بتصل ما بيرد ، يا بيفصل فيني

_يمكن سايق

*عادي بيرد علي يا لينا. ،،ووب انا حأجن لو الخبر دا صح

_بكونو اعداء نجاح ساي

*لا هو كلمني عندو مشاكل في الشغل بس م قايله للدرجة دي ،واااي انا دي حنعرس كيف اسي !

_دا همك يا تماضر ! انتي عارفه بسبب القرض دا ممكن يتسجن !

*لالالا تفي من خشمك عليكي الله دا كلام شنو ، يارب تكون اشاعه بس هو لو يرد علي

_ان شاءالله خير م تقلقي بتتسهل

*يااااارب ، يمكن يكون عرف و ما قادر يتكلم معاي من الصدمة

_اكتبي ليهو رساله يرجع ليكي ضروري

*فكرة حأرسل ليهوو

_تمام .....الرسالة

* حبيبي في موضوع ضروري شديد ارجع لي اسي طوالي ، حاتصل عليك م ترفض فيني *

*رسلتها ..

_واتس ولا sms ؟

*واتس وشافهاا ...

بعد خلصنا الغداا.. عندهم وحدة بتساعدهم ،جات نضفت و ساعدت ، و طلعت لي الحاجات في الصاله .. فجأة عثمان دا تقول في نملة قرصتو ، استأذن و طلع برا وماسك تلفونوو ..بعدها بشويه رجع قال لامو ماشي مشوار و بيرجع ياخدنا البيت بعد يخلص ، امه قالت ليهو وصلنا اسي ،، طبعا ام محمد رفضت لانو م قعدنا كتير ولسة الجبنة .. قاليها برجع ليكم و طلع . و م كات في غير محمد ونون وامها في الصاله ..و كرم طلع السلم دا وتاني م شفتو وبحاول م اركز معاهو كتير ..

قعدت للجبنة ، بسوي فيها و بنتونس ،والا ام عثمان بتحمر لي . اصللي م شغاله بيهاا ، اها من محمد قام قال نادوني بعد تطلع .. طوالي فتحو مواضيع الحريم ديك .. والحمل والولادة .. ما يفوتكم ام عثمان ،قالت لام محمد ، انا شكلي حاموت قبل اشوف اولاد عثمان ولدي ، ام محمد قالت ليها بعد خرف مالك يختي ، الله يكرمهم ان شاءالله ،، قالت ليها وووين مشكلة لمن تبقي المرة معيوبة ،، طوالي نون وامها رفعو راسهم وعاينو لي ، هما ما اتفاجأو بي حسيتهم اتحرجو من اسلوبها الكعب ...

يتبع .....