عقيمة ولكن

الجزء 12

بعدها بي دقايق امي رسلت لي رقم الدكتور .. اتصلت عشان احجز ..

*الوو

_الو ايوة اتفضلي

*بسألك لو سمحتي الدكتور موجود الليله او بكرة ؟

_دكتور عبد الباسط اللي موجود حالياً

*لا انا قصدي دكتور طارق عبدالله

_دكتور عبدالله مسافر من يومين و ما بيجي اسي ، في بداو دكتور عبدا الباسط

*لالا انا متابعه مع دكتور طارق و محتاجة اراجعو في اليوميين دي و اسي كان لقيت طريقه .طيب ما عندو رقم خاص اكلمو ؟

_الرقم الخاص ، ااداخلي هنا في السودان بس حالياً هو براا السودان ..

*طيب تمام ، تسلمي

_اي خدمة ، سلام عليكم

*وعليكم السلام ....

يا الله ، اسوي شنو انا اسي ، لو ما الدكتور دا اداني نوع تاني من الانسولين كان اسي انا بخير ما عارفه استمر علي الجديد ولا القديم و لا اسوي شنو محتارة يا ربي ، يا الله ، يا ربي اكلم عثمان يوديني عيادة الدكتور الغير لي علاجاتي دي ولا اصبر ،، طيب كان صبرتا ، انا اسي محتاجة اخد الحقنه ، اووووف ..

طيب اتصل بي عثمان !

اتصل بشنو ولا كيف ، انا رقمو ما عندي ،، يارب تيسر الحال ..

صلحت ملابسي ،. قمت من السرير ، نزلتا ، قلتا يمكن القاهو تحت ولا حاجة ،، نزلتا مالقيت زوول ، حتي امو ما ليها اي حس في البيت ، طيب اسوي شنووو ! فتحت باب الشارع لقيت عربيتو مافي براا ...

( في جانب تاني )

* اهااا والحل !

_الحل انا وعدتك بس لو ما الحصل داا

*علي فكرة انا بجوني عرسان و كل كم يوم مطفشه واحد يعني ما قاعده منتظراك بالساهل واكيد اهلي محتاجين ابرر ليهم سبب رفضي ..

*انا دايرك

_دايرني دي بقت باهته و ما زي ، زمان صراحة ، اخاف تكون حبيت مرتك

* احب ! احب شنو انتي مجنونة ؟ طبعا لااا

_حأحاول اصدقك ، طيب اثبت لي انك بتحبني !

* وكيف اثبت ليكي ؟

_يعني ، اعترف بي حبك لي

*اكورك يعني اقول انا بحبك !

_لا

*اها !!

_سوقني معاك العرس دااا

* نعم !

_اي ، لو بتحبني سوقني معاك انا

*انتي مجنونة ولا شنو ! دا ما اي عرس يا تماضر ، معارفي نصهم في العرس داا ..

_اكيد حتسوق مرتك

*لا ما سايق غير امي

_طيب اذا كان كداا نشوووف

*اممممم ، يلا اشربي بسرعه خليني اوصلك انا عندي شغل ..

_طيب يلا قوم انا شربت خلاص ..

*طيب يلااا ...

اما انا ، اكتر من تلاته ساعات قاعده براي ، رايحه جاية في االبيت ، رغم المشاكل البيني و بين ام عثمان الا انه بفضل انها تكون موجودة ، من اني اكون قاعده برااي ، واقفه جمب الباب ، لقيت عثمان جاا داخل ، حتي لمن شافني اتخلع ، قالي ، انتي كويسه ؟

قبلت منو طوالي ، قلت ليهو تمام ، قالي طيب مالك ؟ اصريت علي رأي انه مافي حاجة ،واصلاً اي زول عندو عقل ما حيقتنع انه مافي حاجه ،بس كمان واضحه ، دا مازال يعتبر انه بيت جديد علي و ما بقدر اقعد براي .. و رغم احساس الكره البحسو تجاهو الا اني اطمنت ، و طلعت اتوضيت وصليت كان المغرب ، خلصتا صلاتي ، لقيتو جا قعد في السرير ، قالي معليش دخلت من غير ازنك ، ما عارفاهو جادي ولا بيستفزني عشان دا بيتو ، عاينت ليهو و ما رديت عليه ،، قالي بخصوص الدكتوور حجزتي ؟

قلت ليهو ، اتصلتا و لقيتو برا السودان ، و ما عارفه اسوي شنو انا من جاني السكر ما حصل غيرت علاجي ، جسمي بيستجيب للنوع دا ، و ما عارفه استمر علي ياتو ولا اسوي شنو ( بي زهج بتكلم ) .. قالي قومي اللبسي ، قلت ليهو حنمشي وين ؟ قالي الدكتور ، منتظرك تحت و طلع .. قمتا طوالي غيرت ملابسي و لبست عباية ، ااي عباية و عارفه اني عروس ،بس حألبس شنو يعني !!

المهم لبستا و نزلتاا ، لقيتو بيتكلم تلفوون ، بصوت وااطي ، و مامنتبه لي ، قلت ليهو انا جاهزة ! اتلخبط و قفل الخط طوالي و ارتبك كدا ، طوالي قام و مشى طلع قدامي ، حصلتو ، و ركبت وراا ، قالي انا ما السواق بتاعك ، تعالي اركبي جمبي ، ولا كأنه اتكلم لمن حرك العربيه م رديت عليهو ولمن وصلنا كمان ،، قبل نخش اتكلم مع زول بالتلفون ، و بعداك دخلنا ، شكل العيادة كدا زي البجددو فيهاا ، دخلنا لقيت عثمان بيسلم علي واحد شديد ، صوتو م كان غريب علي نهائي ، لحد ما سلم علي و برضو ما قدرتا اعرف الصوت مألوف جدا بالنسبه لي ......

*في الحلقات الجاية *

*تقصدي شنو ؟

_كلامي واضح

*الزواج رزق ، و الحمل رزق

_اي بس لو انتي سليمة كان حملتي من اول 40 يوم ، زيك زي اي عروس ..

*شوفي يا خالتي انا من جيت البيت دا ما لقيت خصوصيتي و راحتي في زواجي ، كنتي موجودة في كل حاجة بتخصني من غير رضاي ، و برجع اقوليكي ، لمن احمل اتأكدي اول وحدة حأبشرك انتي بالخبر ..

_هاهاها وانا لسه حأنتظر ! من وحدة #عقيمة تجيب لي جنى من ولدي ؟

يتبع.....