عقيمة ولكن

الجزء 54

مشيت ...

م عارفه كنت حاسه اني ما حأوصل بيتنا ، كنت حاسه لو عتبت برا المكان دا الله اعلم حأتعرض لشنو ، بس م كنت خايفه والله .. وقفت اقرب امجاد و اديتو العنوان .. اتحركنا ،و انا في السكة كنت بتكلم مع ياسمين وعرفت انها في بيتنا .. قفلت منها ، و وقفت بتاع الامجاد ، جبت بارد و حلويات .. و كملنا طريقنا للبيت .. اتصلت بي نون قالت لي :

_مجنوووووونه

*مالك ي بت

_اتصلتا عشان اقوليكي مجنووونة واقفل يااخ انتي نعمة الله لا يحرم بيت من وحدو زيك. ورب البيت الما ولد بت ندمان

*بسم الله

_بليل جاياكم رسلي العنووان ، يلا سلام وقفلت .... حيرتني بس قلت اكيد كرم حكى ليها الحصل ..

وصلتا بيتنا ، حاسبتا وشلت حاجاتي و نزلتا ، من دخلت لقيت ابوي في الصالون ، حضنتو وسلمت عليهو ، قالي مبروك ، قلت ليهو مبروك شنو ؟ قالي انتي ناسيه ان شغلي م بعيد عن شغلكم والاخبار عندي ، بس اسي في موضوع اهم ، قلت ليهو فعلا موضوع اهم خلي امي تجي ونتكلم فيهو .. قالي قومي غيري اعمامك وخيلانك ديل بجو بعد شويه لازم اعرف قبل يجو ..

فعلا سلمت علي امي و حتي اخواتي لقيتهم سلمت عليهم .. وقعدتهم وحكيت ليهم كل حاجة انا مريت بيها حتي التقرير الطبي حق عثمان ، امي دي صرخت قالت لي عملوك عقيمة يعني اسي ما بتلدي ! لا اله الا الله وليه ساكته ليه قعدتي كل الوقت دا حسبي الله ونعم الوكيل فيهم ...

قلت لابوي انا بحترم الاصول و اكيد لا انتو لا انا حنقبل بيهو ، والطلااق وجب وانتظرتا اليوم دا كتير زي ما اتزوجني منكم وقدام الدنيا دي كلها يطلقني قدام الدنيا دي كلهاا ،، قالي يطلقك راسو فوق رقبتووو .. بيجي بعد المغرب .. قلت ليهو ابوي و سند البيت م بتجيني عوجة طول ما راسك شامي الهوااا .. فعلاا بعد المغرب الجماعه جووو ..

و جيت في نص خيلاني واعمامي ، قلت ليهم طلقوني منو وهو قاعد .. قال طلاق ما بطلق ،قلت ليهو حتطلق يا عثمان ، قالي طلاق ما حأطلق ، قلت ليهو لو الموضوع دخل المحاكم حتخش في حاجات انت ما قدرها ، و م تنسي انا عندي فيديو بيثبت ان امك كانت بتخت لي الحبووب ، دا براهو بيوديكم ورا الشمس وغير اثار الضرب الفي جسمي ، فاا بالذوووق احسن .. سكت مسافه ، ابوي شاليهو العكاز قاليهوو سكت ليك كتير و انا بتي يدي ما مديتا عليها تجي تمدها انت ، اداها ليك خبطة بالعكاز في يدو الا واحد من اعمامي مسكوو ، قاليهو انحنا احسن و بنفهم في الاصول ،، جا ود خالي فتحي احمد لو تتزكروهو جاا طاير ليك في عثمان ، قاليهو كان هما سكتو ليك انا ما بسكت ، م عندنا راجل يمد يدو في مرة ، يدك دي تعال مدها لي هناااا ، و مسكو في بعض ،، حجزوهم ومسكوهم ، خالي قاليهو الراجل في بيتنا ، ولو مافي بيتنا ماكان سكتنا ..

ابوي وجه عليهو العكاز قاليهو حاعد لمن تلاته و تطلقا بالتلاته .. قبل يعد بالله قالي وهاد انتي طالق بالتلاته .. و طلع ..

قلت ليهو ماشي وين ، ياسمين ناوليني قزازة بارد من جواا والله م تمشي قبل تشرب وتضوق حلاوتناا ،، بالله اداني عين يا لطيف لكن رديتا ليهووو المعولق ..

قعدنا تمينا سهرتنا مع اهلي وحات الله لمة زي ليلة العيد ....

( في جانب تاني )

_ البت دي سبحان الله ما عارف اقوليك شنو يا كرم بس بالحد ربك بيضع سرو في اضعف خلقوور

*محمد بعيد عن الشغل انا بحبها والله وما عارف اسري شنو رافضاني تمام و العملتو معانا في الشغل والوقفة الوقفتا يمين بالله راجل ما يقيفا يا محمد ، عملت حاجات لولاها بعد رب العالمين انحنا كان انتهينا ، ما عارف حاجة غير اني دايراهااا

_يا زوووول دا كلام شنو ؟

*دا كلام عديل و الحب ما عيب ، دايراها ومامسك بيها و والله ما اخليها ان جا الجيش

_ما عارف اقوليك شنو ، بس شوف انا كلامي عن الشغل ، لازم ترجع تشتغل رلازم تاخد نصيب في النقلة الحصلت لينا دي

*ياخ بديها عمري بس تكون لي

_جنيت انت !

*ايوة مجنون

_امك عارفه

*و مشجعاني كمان بس قالت لي بالاصول كل حاجة في وقتها

_كلام والله

*اسمع انت اخوي الكبير بعد ابوي الله يرحمو يعني لازم تجي معاي و تقيف معاي

_اذا هي ما قابلة حتعرسا غصب !ّ

*لا م غصب حتحبني باذن الله حتحبني

_طيب اديها فرصتا ياداب طالعه من علاقة

*اكيد ...

رجعت ايامي الزمان مع اهلي واخواتي .. ايام كنت مشتاقة ليها ومحرومة منهااا .. جيت لابوي ، قلت ليهوو ، انا عايزة حقي ، قالي حق شنو ؟ قلت ليهو قلبي ما برد ، عثمان وامو يمكن بسببهم انا بقيت عقيمة ، دليرة حقي بالقانون .. قالي وهاد ، انحنا بشر وربنا خلق لين جوا قلوبنا الانتقام م كل حاجة ، و الزول دا امو عيانة وماف زول غيرو بيراعيها ، قلت ليهو مرتو قاعده ! قالي مرتو طلقا و اهلها هنا كمان طلعوها برا الخرطوم واخر شي رحلوو ، وعثمان حاليا محاكم في قضايا كتيرة و مرتو القديمة كمان مقاضياهوو ، يعني الوصل ليهو دا براهو ربنا بجيب ليكي حقك يا بتي .. قلت ليهو صح كلامك ..

مر اسبوع ...

يتبع.....