عقيمة ولكن

الجزء 55

مر اسبوع ..

( في جانب تاني )

شوف يا ولدي ، انا الغلطة العملتها قبل كدا ما حأكررا تاني ، زوجتها زواج تقليدي ، و اسي هي كان م دايرة م بقدر اجبراا .. و ياريت انت زاتك تديها وقتها ياداب طالعه من دوامة و علاقة .. قااليهو بنقدر نتخطى المشاكل دي كلها ، بس اسمح لي اتكلم معاها بعد تزنك وحتى لو في وجودك انا ما عندي مشكلة .. ابوي قاليهوو ان شاءالله ..

مرت الايام ،، و انا م تتخيلو مبسوطه بحياتي قدر شنوو حاسة بالسلام النفسي مرتاحه شديد ، طول الايام دي ، كرم مافارق بالي ولا امو ، اما نون كانت بتجيني تقريباً يومياً م قطعت مني بس كنت مستاءة بسبب اختي الصغيرة ، كانت مخطوبة لو تتزكرو قلت ليكم ، و خلت خطيبا و كان من اهلنا ، عشان المشاكل البينهم م تصل الاهل ، بس ما خليتا نهائي ...

جا يوم .. و ابوي قالي ، الليله في زول

جايينا وداير يشوفك و يتكلم معاكي ، قلت ليهو كرم ! من غير م اشعر بي نفسي .. قالي ايوة كرم .. قلت ليهو تمام ، قالي بعد المغرب بيجي ، قلت ليهو تمام ..

فعلااا بعد المغرب جا و جات معاهو نون ، من جيت داخله حسيت بالحنين لشوفة كرم حسيت ان لي زمن م ظفت الوش داا .. سلمت عليهم عادي ، و ونسه وضحك بالجد كان في احساس بالولف الناس الحلوة دي بتعرفا من قعدة بسيطه و كباية شاي ،، دي قعدة ما بتتعوض و م بتحس بي قيمتا مع كل الناس ، بعدهاا خلونا برانا في الصالون ، قلت ليهم ماشين وين انتو ؟

ماف زول رد علي .. كرم قالي خايفة اخطفك ؟ قلت ليهو اممممم ما اتخلق اليسويها ، قالي طيب ممكن نبدل حرف ال (ف) و نخت بدلو (ب) في كلمة اخطفك ؟ ّ

حمرت ليهووو ، قالي اهاااا المرة دي حتقولي لي في ذمة منووو؟ قلت ليهو في ذمة ابوي انت مالك .. قالي شنووو ؟ ما اخدتي وقت كفاية ؟و انا لستُ مثل أيوب حتى ابلغ صبره

..قلت ليهووو ، اتزوجت وعشت التجربة و ما عندي استعداد اعيش التجربة دي مرة تانيه ، قالي تجربة عن تجربة تفرق ، واكبر فرق انا بحبك يا بت الناس و اهلي انتي عاشرتيهم اكيد ما حأجي اقوليكي انحنا و انحنا يا وهاد ، يا يت م تقارنيني بي غيري مرة تانية ، لان انا كرم بمثل شخصي وبس ..

قلت ليهو اعصابك ، قالي انا ما عندي اعصاب لكن انتي عندك و خاتاهم في تلاجه .. قلت ليهو بتهيأ ليك ..قالي بتهيأ لي كيف انا بقيت شايفك مكعب تلج قدام عيوني .. قلت ليهو للدرجة دي انا باردة ؟

قالي لا انا البارد و انا البحبك وانا البحبك ، ممكن اجيب اهلي واجي وتديني فرصة ؟

قلت ليهووو افكر .. قالي تفكري ! قلت ليهو ايوة افكر ، افكر اذا كنت اقوليك بحبك ولا اغلغلك شوية .. قالي قلتي شنوووو ؟ قلت ليهو دخلك شنو انت ..قالي دخلني الباب داك و نفس الباب دا حيدخلني جوا قلبك و سمعتها و مكتفي بيها دنيا وآخرة ... قلت ليهو بري منك مالك خفيف كدااا .. قالي والله انتي عايزة دقه هههه قلت ليهو اهاا شفتا جابت ليها دق يا زول انت م بتنفع معاي يلاااا .. قالي والله غصباً عنك .. يلااااا ّ

عدي علي يدك ايام و تبقي مرتي .. قلت ليهو مافي احلا من كداا ! قام وقف علي حيلوو قالي بس بس انا بطلع م داير اسمع بعد الكلام داا حاجة تاني .. اففف انا ماشي ههه ..

و كان جادي فعلااا طلع ...

بعدها بأسبوع .. عرفت اخبار ان عثمان اتسجن ، و امه ودوها دار العجزة في حتة كداا و اصلا بقت شبه ما مستحضرة ، من المرض الجاها دااك ..

في نفس الاسبوع دا ، تمت خطوبتي علي كرم و كانت ابسط من اني احكي تفاصيلها و الفرح م الا دنيا و عالمين و ههيصه رغم وضعنا بيسمح ، بس لا انا لا هو دي كانت رغبتنا و اتفقنا نعوض في العرس ..

لقيت مكانة لي في الشغل معاهم بس في نفس الوقت كنت نازله كورسات لغه ، و كرم رجع قدم لي في جامعة الخرطوم ..

*بعد مرور سنة*

*ملاحظ حاجة حبيبي ؟

_ما بتفوتك حاجة ههههههّ

*ههههه محمد عاين ليهو عاين ليهو ههه

_والله حنني يمشي يتكلم معاها عديل هه

*وعد اختي صعبة ممكن تفلقو بكباية العصير ههه مبالغه

_اييييك شكلنا حنتدبس في وعد قريب

*قصدك شنو يا كرم ؟

_قصدي انك طالعه حلووووة و الزفاف يحردو ليكي ، بس شعرك ليه ظاهر

*ياخ دي كم خصلة

_م داير ولا خلصة كلمتك انا ياخ

*ياخ حنتشاكل اسي الناس بتعاين لينااا

_طيب نتفاهم في البيت

*هوي يا ناسي دا عرس شنووو ، منتظراني دقه ولا شنووو كرم علي فكرة دا عرسناا

_عارفو عرسنا ياخ و دي الحقيقه الوحيدة الفي حياتي واجمل حدث في حياتي مستحيل انساهوووو .. ربنا نا يحرمني منك ياااااااارب

*ولا يحرمني منك حبيبي

_اميييييين ❤

اللهم عادل بين شعوري والحقيقة فلا تجعل ذلك أعلى من تلك ولا أقل ، فلا رحمة تفوق الموقف، ولا حب يفوق الشخص، ولا أمل يفوق الواقع ❤❤

بعد سنة من الزواج .. طبعا السنة دي كلها كانت علاجات من دكتور لدكتور ، حتي سافرنا براا السودان .. و بعد سنة و شهرين ربنا رزقني و حملتا حمدلله ..

زي ما قلت ليكم الزول هو البيحدد ليك كيف تعالمو مهما بلغت اذيتو ليك اخد حقك حسب تربيتك و اصولك ،القمت بيتها م تخلو الحقد يملا قلوبك و يدخلكم في حتات اكبر منكم .. اما الحب فا ابتدا و انتهى بي كرم ❤

وإني ادعو الله في سري بأن يُبقيك لي

‏عمرًا ، وحبًا ، وقربًا ، لايعرف البعد ❤❤

تمت بحمدالله .. ❤ اتمني تكون نالت رضاكم و استحسانكم و م تكون سقطت مني كلمات سهوااً فا اعذروني .. و بنتلاقا تاتي باذن الله .. و في انتظار تعليقاتكم

كُتبت بحب ❤ | سحر سمير ...