عقيمة ولكن

الجزء 45

كرم نزل و أمن الباب .. لسه خطوتين ما مشى وقف مسك راسووووو مسافة .. و خت راسو بقزاز العربية من برااا و قعد يعاين فيني مسااافة عينو دي ما نزلت من علي.. لأن كان المشهد الشفناهو واحد.

بقيت زي البلهاء ، بعاين في كرم اكتر من ما بعاين في الناس و في زوجي عثمان وهو مزفوف مع عروسه .. بعاين في عيونو و انا مبتسمة و نظرتو المليانة حاجات كتيرة ، فيها حنين فيها قلق ، فيها لمعه بتقول كلام كتير ،، حقيقي رغم الصمت الكان حاصل بينا ، الا اني اقدر اقوليكم حسيت باحساس ان في زول خايف علي خلاف امي وابوي ..

بقيت بخبط ليهو في القزاز بي يدي ، و بأشر ليهو عسان يفتح لي انزل ..

وهو لسه خاتي رايو في قزاز الشباك من برا و بيعاين لي .. فجاة فتح التأمين و ركب العربيه جمبي ورا ما قدام ، و انا فتحت بابي عشان انزل... قالي وهاد لحظة !

قلت ليهو هااا ( زي الما حصل حاجة ولا كأني شفت حاجة ) .. قالي :

_ انا ما عارف اواسيكي كيف ولا عارف اقول شنو ، بس حاسي بموقفك انتي ياداب عروسه يعتبر جديدة و .....*قاطعتو !

*تواسيني في شنو ؟ ما فاهمه ، انت بتقصد عثمان ! ( والله بهذا الاسلوب البارد فعلياً قلتها ليهو وانا نهائي م بتصنع الامبالاة ) ..

_انتي شكلك ما شفتي يمكن كويس وانا ماعارف حتدخلي البيت كيف انا شايف ارجعك معاي البيت تبيتي مع نون وامي و ..

* ههههه انت مالك مركب كدا و شايل هم الدنيا كلو ، وعلي فكرة انا شفت بوضوح الانت شفتو ، عادي الشرع حلل اربعه ، وعادي يعني ... !

_!!!!!!!! انتي بتحاولي توصلي لي انو ما فارق معاكي ولا الفهم شنو ؟

*ابدا والله لانو فعلياً ما فارق معاي ان شاءالله يعرس دستة ، م بيفرق معااي يا كرم كلها مسألة وقت ..

_انا شايف اني ارجعك معاي احسن اتوقع ممكن تحصل مشاكل

*مشاكل شنو الشر برا و بعيد ، عادي جداا وبعدين دي ما اول ولا اخر وحدة عثمان حيتزوجاا

_كيف مسألة وقت طيب ؟ّ

*كل شي في وقتو حلو ، يلاا انا بنزل بعد دا عندي قومة بدري بكرة باذن الله ..

_طيب عندي طلب بس اعفي لي فيهو

*شنووو ؟

_خلاص م وقتو انزلي انزلي

*تمام طيب سلامي لي نون وخالتو ، تصبحو علي خير ..

_نزلتا ..

( في جانب تاني )

*حسسسبي الله ونعم الوكيل حسبي الله حسبي الله ، الله ينتقم منكم ، حي وووااااي انا وااااي واااي يا حرقة قلبي عليكي يا وهاد حسبي الله فيكم حسبي الله ..

_حتقعدي تولولي كدااا لكن يا ياسمين

*اسسوي شنو ازغرت يعني ! عارفه يعني شنو عثمان يعرس فيها ، لا وعرس منوو ، صحبتنا في الحلة. الا بالصدفه ماشة بيت ناس خالي شفت الجوطة والناس ، حسبي الله عليهووو

_طيب اهدئ ، بيت خابك عرفو ؟

*اكيد ديل جيرانهم كان ما ظافو حيكونو سمعووو ، و المشكلة في وهاد مسكينة و ما بتعرف تتعامل و تتصرف و الزفته دي ما هينة قادرة ، استغفر الله ، حرام عليهو الله لا كسبو البت ياداب م قفلت التلاته شهور يجي يعرس فيها ، اسي الناس يقولو شنو ولا امها ولا خالي ، يااالطيييف تلطف ..

انا لازم اتصل بيها ، لازم لازم ..

لحد ما خلصت كلامي مع كرم ، ونزلتا ، كانت الزفه انتهت بس الباب فاتح لسه و البلالين و الشرايط اللماعه مجدعه في الارض ، طبعا عجتني شديد الوان البلالين ، رفعت لي كم وحدة ربطتهم و شلتهم ( انا في شنو والناس في شنو ) .. شلتهم .. و دخلت من مدخل الباب ، و اديتا زغروته رنت في البيت داا كلووو بي صدى صوتهاا ..

ام عثمان قاعدة مصنقرة زي الشيطان بي توبها في نص الصالة و معاها كم وحدة ، قالو ليهاا دايرة حاجة قبل نمشي ،و ودعتهم ،ومشو ، مشيت عليهاا سلمتا ، وباركت ليهاا ، و عثمان ومرتو طبعا بالتوب لانو الظاهر كان عقد بس .. مشيت عليهوو ، زغرت ليهووو زغروته لمن نفسي اتقطع ، وباركت ليهو ، قلت ليهو البلالين دي حلوة شديد جبتها من وين عليك الله ... هنا #اتلفتت علي عروستوو ، و كانت منو ؟ كانت تماضر ، تماضر صحبتنا بت حلتنا ، حاضرة عرسي من عثمان داا ..

هنا كانت صدمتي الحقيقيه في ان العروسه طلعت منو ! اي ظهر في وشي و ملامحي اتبدلت ، قلت ليها ، تماضر ؟

قالت لي بتعرفيني ؟ حتي عثمان استغرب من اني عارفه اسمها ،، قلت ليها كيف يعني بعرفك ، عز المعرفه يا صحبتي ، نسيتي ايامنا ولا شنووو ؟

قالت لي اهااااا دي ياها وهاد مرتك يا عثمان صح ؟ اها اتزكرتك والله لكن مالك بقيتي مبهدلة كداا العرس ما نفع معاكي يختي !

في عز صدمتي ،.وخلعتي ، بعد قالت كلامها دا ، ضحكت ليها ضحكة لمن اتشرقتااا ، قالت لي تددوم ، قلت ليها جمعاً ، عاينت لعثمان قالت ليهو يا حليلك حبيبي كنت مدفون بالحياة مع دي ، بالله لمن ما عرفتهاا .. طبعا اليوم دا بالزات كنت قاشرة بس م للدرجة لكن واجهتي حلوة ، وانا عارفه ان تماضر من زمان عندها الغيرة الشديدة ..

قلت ليهاا ، الليله ضيافتك عشان كداا حأتجاوز تفاهتك دي ، يلاااا انبسطوووو ، و تاني زغرت ليهم ..

طلعتا علي غرفتي ، عادي جدااا ، طلعت غياري اخدت حمامي وصليت صلواتي الفاتتني ، و جبت لابتوبي و قعدتاا اقرا و اراجع ، زي الما حاصل حاجة ، بالعكس وجود تماضر دا جا في وقت 100%..

جاتني منو ؟ جاتني ام عثمان ،، خبذت خبطة وجات داخله ، وانا راقدة , واقفه و بتضحك ، ضحك سخرية و استفزاز .. قلت ليهاا الضحكة دي ما قدر عمرك يا حجة هههه ، مالك قال بس م يكون مخك اتلحس كمان ! كشرت فيني ، قالت لي حدددددك اوووع من قلة الادب ...

يتبع ...