#سيكوباتي
#Heba_Montaser
الفصل الخامس عشر
ا______________
خرج عمرو بصحبة والدته التى ودعت رنا وداعا حار واعدة اياها بلقاءات اخرى كثيرة بعد هذا اليوم
دخلت رنا غرفتها فلحق بها والدها الذى تبعته زوجته عنوة علي غير رغبته وقال : هاا ايه رأيك اظن عريس مفيهوش عيب زى الورد وشكله شارى اوى
رنا : لسه مكونتش رأي يا بابا هافكر الأسبوع ده وبعدين هابلغك رأيي
لتندفع زوجه ابيها قائلة : هتفكرى في ايه بس ده جدع زى الورد طول بعرض ودكتور وعيادته صلاة النبي احسن مبتخلاش من العيانين يعنى هايعيشك احسن عيشه متبقيش خايبه وتضيعيه من ايدك
رنا : والله يا طنط كل واحد ليه مقاييس في الاختيار غير التاني ده غير انى مش بدور علي عريس يصرف عليه انا مش محتاجه حاجه من حد
حسن : اكيد هى متقصدش حاجه بس هى عايزة تقولك انه شاب كويس واخلاق وانا بصراحه رأيي كده برده
مني : معلش اصل رنا مبتطقليش كلمة من يومها
رنا : ايه الكلام ده يا طنط ايه اللى جاب الكلام ده الوقتى انا بقول هافكر ملقتش لا مش موافقة واظن حقي دى حياتى ولازم اختار اللى هايشاركنى فيها واكون مقتنعه من غير ضغط من حد
منى : طيب يا بنتي ربنا يهديكى وتفرحينا بقا عشان نشوف اللي وراكى هى كمان
حسن : هتسافرى الصبح؟؟
رنا : ان شاء الله
حسن : ماشي ربنا يهون نامى عشان عندك سفر من بدرى
رنا : ماشى تصبحو علي خير
خرج حسن لغرفته ووقال لمنى : خفي عليها ومتضغطيش عليها في الكلام وهى حرة تقبل ترفض براحتها
منى : يووو هتفضل واقفه حال اختها لامتى ارحمنى بقا
حسن : مفيش فايدة من الكلام معاكى تصبحي علي خير
توجهت هى لغرفة ميرنا التى اجتمعت فيها ابنتيها وما ان دخلت حتى سكت حديثهما فضيقت عينيها مستفهمه : سكتو ليه هااا؟
مى : العريس موز اوى يا ماما مش معقول رنا تقول لا
مني : هى بيعجبها العجب لو عليا كنت خدته لميرنا بس تقولي ايه يدى الحلق للي بلا ودان
ميرنا : تاخدوا وتغور في اي حته مش معقول هتفضل قاعدة علي قلبنا كده
مني : اه والله ده حتى هتبقى حاجه تجيب الضغط.. ناموا يا بنات خلينا نشوف بكرة هايبقي فيه ايه
...
.؟..
في منزل عصمت بالإسكندرية
جلست عصمت علي فراشها في غرفتها التى تتقاسمها مع اختها الصغرى وملامح العبوس باديه علي وجهها فاقتربت منها اختها قائلة : ايه يا عصوم مين اللي مزعلك واحنا نشرحوه
عصمت : بس يا عفت مش نقصاكى مزاجى وحش
عفت : بت مالك مكشرة من ساعة ما جيتى من بره قلت هتروقي مروقتيش
عصمت : مفيش
عفت : خلاص لو مقلتيش هاقول لبابا وماما وانتى عارفه لو دخلت الادارة هتعترفي يعنى هتعترفي
عصمت : هو انا شكلى صغير اوى كده 😒
عفت : مين قالك ان شكلك صغير اوى كده
عصمت : مهندس من اللى فى الموقع اللى كان جه اترازل عليه فى المكتب قبل كده بيقولى اشربي اللبن قبل النوم
عفت : ههههههههههه طب اما اقوم ادفيلك كوبايه 😂😂
اخذت عصمت تضرب اختها في حنق وهى تقول : انا غلطانه انى اقول حاجه لواحده زيك
عفت وهى تحاول كبت ضحكتها : خلاص يا عصوم متزعلش يا هندسة
عصمت : مرة يفتكرنى راجل ومرة يقولى اشربي اللبن انا عارفه ايه الغلب ده لو كانت حتى اسامينا لايقه علينا مكنش قال كده وانا اللى كنت فكراه جاى يعتذر
عفت : انتى دخلتى كل حاجه في بعضها ليه انتى لسه الاسامى دى مأثره فيكى متعودتيش
عصمت : اتعودت بس كل فترة لازم يحصل موقف يفكرنى.. يعنى كان بابا هايخسر ايه لو سمانا اسامى بنات حلوة
عفت : عشان كان نفسه في ولاد ولما جتله بنت ورا بنت سمانا اسامى تنفع كده وكده عشان يتقاله يا ابو عصمت مش يا ابو سوسن انتى مش عارفه الحكايه ولا ايه 😂😂
عصمت : عارفه ياختى عارفه بس بذمتك ده منظر عفت ولا ده منظر عصمت ده احنا لا طول ولا عرض ولا ارتفاع
عفت : شوفى انتى اختى الكبيرة صحيح بس عقلك صغير كبرى مخك يا شيخه المهم قوليلى المهندس ده اسمه ايه وحلو ولا بكرش خلينا نشوف مستقبلنا
عصمت : ربنا ما يحرمك من الهبل شوف انا بقول ايه وانتى بتقولي ايه
عفت : ايووو مش بحاول افرفشك وبعدين اهو نطلعو من الليله دى بعريس
عصمت : والله المرتين اللى بصيت فيهم ف وشه كنا بنتخانق تقريبا مركزتش هابقا اخد معاه سيلفى المرة الجايه 😂😂
عفت : ايوة ارجوك 😂😂
.
.
.
فى القاهرة
في صباح اليوم التالي
...
توجهت سلمى كعادتها الى المستشفى ليفاجئها وصول رنا المبكر فاحتضنتها قائلة : رنوشتى حبيبتي وحشتيني اووى
رنا : انتى اكتر يا لوما والله
سلمى : ها عملتى ايه امبارح
رنا : هاعمل ايه!! قعدت معاه حاولت استفزه واخليه يرفض هو او ميعجبوش اللى بقوله بس خلص الكلام وهو بيقول اكيد هنتفاهم وانا منتظر ردك وانا بصراحة محتارة مش عايزه ارتبط بيه ولا عايزه استقر في الفيوم انتى متعرفيش اليومين اللر قعدتهم هناك كانوا تقال علي قلبي ازاى
سلمى : مفيش حل غير انك تتجوزى في القاهرة ساعتها محدش عاد هايقول ارجعي الفيوم ولا يبقي عنده اعتراض ولا هتبقي مضطرة تقعدى مع الساحرة الشريرة
رنا : وانا هاعمل ايه اروح ادور علي عريس من القاهرة واقوله اتجوزنى لو سمحت... الوقت اصلا ضيق ادامى اسبوع حتى لو حاولت مش هالحق :/
فى تلك اللحظة ظهر محمود في نهاية الطرقه المؤدية لهم وظهرت معه فكرة لمعت لها عينى رنا بابتسامة ماكرة وعندما اقترب منهم قال في سعاده : وانا قاعد اقول المستشفى ليه منوره كده اتاري رنا رجعت بالسلامة
رنا : ازيك يا محمود عامل ايه وتالا حبيبتى اخبارها ايه
محمود : الحمد لله دلوقتى بقيت كويس وتالا بخير وبتسأل عليكى علطول
رنا : كنت عايزاك في موضوع
أنت تقرأ
سيكوباتى
Acciónجريمة قتل اتهم فيها بعدها اودع مصح عقلى .. كان يائس تماما لا يتمنى سوى أن تنتهى حياته حتى القاهآ القدر فى طريقه فاعادت له الامل
