انا لوحدي ..

البارت الرابع و الثلاثون

راحت اميمه جابت القابله هي كلش صغيره بالعمر الي عرفته هي ممرضه بالمستشفى و لان اياد ميقبل نروح للمستشفى بتاتاً فسموهه لهاي الممرضه قابله بس كلشي تعرف و لبقه ..

سحبت دم من عندي و كالت هسه اروح للعياده الشعبيه نص ساعه و اجيكم .. راحت و نص ساعه و رجعت و بيبي ز اميمه ميخلوني اتحرك منا الهنا ..

ساعه تقريبا و اجتي اول ما فاتت هلهلت و صاحت نطوني البشاره مرت الشيخ حبله .. مسمعنه غير عيطة سميره و لطمتهه على صدرهه نوب اجتي تركض تربد تكتلني و اني مناك طلعت حامل شراح يصير اذا عرف اياد و نوب هاي مثل الثور تريد تضربني ...

بالكوه يلا بعدوها من فوكي فهد و اميمه و هي كامت تبجي و تعيط اله اسقطهه و اخليها تذب البطنها .. بالاخير ملت و راحت لبست و فهد وصلهه لبيت اهلهه عود زعلانه

بقيت اني ميته خوف و هم يجيبون و يدارون بيه  من اول يوم عود و ميخلوني امشي منا لهنا لان بيبي كالتلهم هي بنيه بعدهه زغيره و هذا البجر خاف يصير شي ما توكع بخطيتنه و هم كامو مثل الذبان يرحون و يردون  ...

لليل ساعه ثامنيع دخل اياد سلم و كعد اني نسحبت ببس شنو ميته خوف شراح يسويلي هو يخوف نوب ليروح ياخذ راي هاي اسيل الي يخابرهه و تكله موت الطفل عزا لا لا هو يخاف ربه و شيخ ميسويهه

مدري شلون و فزيت من فتح الباب جان شكله عصبي كلت ها هي راح يموتني فنزلت دموعي بدون وعي هو اندار و كال الله بالخير ليش تبجين شصاير

.. والله اني معليه

اياد .. ليش شصار

.. اهئ اني معليه والللللله مو بيدي يعني بعد صار خطيه هو ماله ذنب

اياد .. منو شدتحجين انتي و ليش دتبجين ، احجي شصاير شدهتيني تركني و نزل يمكن يسئلهم شبيه نزلت وراه فهو ماكو غير بيبي كاعده تقره قران هو كعد يمهه مبين شي بس بعدين من دخلو بسوالف ..

اياد .. لعد ودق شبيهه صعدت لكيتهه تبجي و سميره مالها حس شديصير

حجيه حسنه .. هي غير سميره رادت تكتلهه و كورت فوكاهها و هي مو هينه خطيه تشوف مرت رجلهه حبله

.. من هي الحبله

حجيه حسنه .. غير ودق ياا لساها ما حجتلك هالفاهيه و انه على بالي كالتلك و دتشكا على سميره

.. هههههه الحمد لله والله هي ما تشكي ابد بعد ما عرف شجرالهه

حجيه حسنه .. اخذهه لبو تراب بلكي يثبتلكم هالوليد (( ابو تراب تقصد بيه الامام علي ع ))

اياد .. الله كريم اي طبعا اخذهه هي و رويده و انتي يايمه متجين

جحيه حسنه .. شوفت عينك وليدي مكرمه و مالي حيل

اياد .. عفه عليج حجيه مو هياتج جنج عروس بس يرادلج شايب و تخلص الحسبه

حجيه حسنه .. دكوم عني كوم فلا تكبر