انا لوحدي ..

البارت الخامس و الثلاثون

جنت متفاجئه من تصرفه لان مو اي رجال يقبل تقريبا مو كل رجال راح يقبل لمرته هيج بس فكرو بيهه راح تلكوهه صعبه

نزل هو خمس دقايق بقى واكف وصافن عالقبر و الرجال ديغسل القبر وراها حط ايده عال قبر عمي يمكن قرا الفاتحه اجه صعد و عاقد حواجبه اندارلي و كال انزلي انتي و رويده و اندار لرويده اذا صار شي صيحي الي

نزلت و كعدت على جحر قريب هن الثلاث قبور واحد بصف الثاني فصرت اني مقامبيلهم و وراي السياره

.. ما اعرف ليش و شلون و شنو السبب بس اكتفيت بالصمت مبدر من عندي اي كلمه مجرد اباوع بدون اي كلام ما اعرف منين و سلون و حتى ليش محاولت احجي اي شي او انزل دمعه بس الي اعرفه هذا تغيير بية 

بسرعه قريت الفاتحه و كمت رجعنة للسياره اول مره ادخل قبور النجف و متنزل من عيني ولا دمعة ..

باوع لوجهي ابتسمتله و كتله شكرا ااندار للستيرن بدون اي رد ..

بقينا طول الطريق ساكتين بدون اي كلام رجعنا للبصره  سلمت على بيبي و صعدت لغرفتي كلش تعبانه و نعسانه ... سبحت و طلعت كاعده اضفر بشعري و دخل اياد للغرفه بالبدايه منتبهلي

بعدين انتبه و كال الله بالخير ما شفتج
جاوبته .. عادي مصار شي و اضفر بشعري

اياد .. هذا كله شعرج

.. اي لعد شعر منو

اشر برلسه بمعنى اي و اخذ ملابس من الكنتور و راح للحمام يسبح .. كملت شعري و رحت تمددت و علكت التلفزيون على قناة مال كارتون لان ما حب اتفرج مسلسلات جانت قناة نكلودين  كلش حلوه و تطلع برامج اطفال بس اني احبهن فكاعده اتفرج و اضحك

هو اجه كعد عالسرير ...

اياد .. وين الريمونت

.. هيانه دباوع

اياد .. شدتباعين مال زعاطيط هاي شنهي

.. لا والله تضحك شوف شوف عهههههههه

اياد .. انتي صاحيه تباعين هاي مال كارتون

.. ليش حرام

اياد .. دجيبي جيبي هسه طلع الفلم مال عادل امام

.. يووو هم هذا المصري التافه

اياد .. هو ماكو غيرج تافهه هو مو صوجج صوج الزمال الجا يريد يطلعلج فلم و يونسج

.. وينه

اياد .. منو هو

.. الزمال الي يريد يطلع فلم و يونسني

اياد .. اكلج متاكده هاي درجاتج ويه هالعقل

.. اي طبعا متاكده

اياد .. ربي كون جيله و برنو

.. شنو يعني

اياد .. كملي على الكارتون احسن من اسئلتج الفطيره