#اوهام الحب

البارت 38

#بقلم
#ايزابيل
#الجزء الثاني
《اوهام الحب 》

#الانتضار من دون امل ..؟
#موت على قيد الحياه .
..
حسيت طبطبه خفيفه على خدي فتحت عيوني بدوخه ونعاس هوى الفجر عصف
بروحي واحس طفى براكين النار الواجه

بكلبي ..فركت عيوني وفتحتهن كمزت
بفجع على اثر شوفت الولد الواكف كبالي ..؟؟

لميت نفسي وعدلت عباتي اسمعه يكول :- اختي بيج شيء ؟ تحتاجين شيء

عصرت الدموع بعيوني حتى ماتنزل
قبضت على الشهكه الي بصدر وجاوبت :- لا لا تسلم خويه دخت شويه ووكعت ..

باوعلي بشك وراح للسياره عنت نفسي بكل صعوبه وكمت امشي خطواتي ببطئ فزعت

على اثر بطل المي الصار بوجهي درت شفته نفسه الولد مقدملي بطل مي ابتسمتله واخذته منه شربته ورجعته اله تشكرته وكملت طريقي ..

واني احس بطني تشنجت والألم فضيع ..
وصلت للبيت دكيت الباب هم اكيد كاعدين هسه نفتح الباب وطلع كبالي جدو صرخت ووكعت :- راح اموووت جدو ...

وكعت وبعد ماحسيت بشيء وجع جسمي جان قادر بأذن يخليني افارق الحياه ؟؟

..
صرخت موجوعه على اثر الكانولا الي حطتهه الممرضه بأيدي ،، باوعت للجهه الثانيه اقبال وتبارك اجن وياي للمستشفى من جابني جدو ..

نفتح الباب ودخلت الدكتور بلعت ريكي وكلت :- د.دكتوره ليش هيج نزفت ؟

ابتسمت وجاوبتني :- ارتاحي حبيبتي مابيج شيء وصحت طفلج زينه بس نزفتي اثر الضرب المتعرضتله ترا جسمج كله ازرك يعني مبين هذا تعدي اذا تردين تشتكين على احد احنه بالخدمه ..

هزيت راسي وكلت :- لا لا دكتوره مامضروبه محد ضاربني ،،

كالت بغضب :- ماما جسمج كله ازرك اني لو ما جدج الي وياج يمنعني اشتكي جان هسه ..

قاطعتهه اقبال وكالت :- دكتوره احنه جبنه البنيه نعالجهه موش نكبر الموضوع ،،

سحبت نفس وزفرته كالت :- والله هي بتكم اكيد انتم احرص عليهه مني اني سويت واجبي والباقي عليكم ،،

كالت هيج وطلعت ..
طاحت دمعي محصوره بعيني ..
ماكدرت اشيل ايدي وامسح دموعي ،،
كالت تبارك :- فيان شني الموضوع من مسوي بيج هيج حتى مالحكت اسأل اجانه جدي كومن وكومن مافتهمنهه شكووو ؟

جاوبتهه واني اشهك :- تبارك تعبانه مابيه حيل احجي

كل شويه تجي الممرضه تطمن عليه
داوتلي جرح كصتي وخلتلي مرهم لجسمي..
كالت اذا تردين هسه اطلعي واذا تكولين بعدج تعبانه تكدرين تبقين الباجر ..

اني ماكدرت اتحمل لعبت نفسي من المستشفى كلتلهم اطلع راح جدو كمل كلشي  وطلعنه للبيت ..