#اوهام الحب

البارت 40

# بقلم
# ايزابيل
# الجزء الثاني
《اوهام الحب 》
..
..
#ماحيلتي والعين ارهقها الهيام
# تلوذ في حضن النعاس وتنزوي
# لعلها في النوم يسقيها المنام
# من نبع وصلك شيء حتى ترتوي
..
كعدت على الجربايه اريد استوعب
الكلام الداقرا فركت وجهي تحاليل مرض
السرطان واسم المريض عادل ،،

نزلت دموعي واديه ترجف ..
صح الحياه قاسيه بس مو لهدرجه ياربي ..
والله ماتحمل اكثر احس حيلي نهد ..
يمته راح تفرج ،، مو مليت ...

نفتح الباب ودخل عادل راد يحجي شاف
التحاليل بأيدي نصدم كمت  ودموعي تجري
وكفت مقابيله وكلت :- عادل من يمته هذا ؟؟

حاول يتهرب من سؤالي وهو يكول :- شنوو ؟؟

شهكت وكلت :- لا تستغبيني عادل هاي تحاليل سرطان وبأسمك انتَ شنو الفلم ومن يمته انتَ مريض ..

سحب نفس وراح كعد على الجربايه كال :- فيان الموضوع ماريده يطلع منا فهمتيي ،،

احس خنكه اجتاحت صدري ونفسي يصعد وينزل لسه جرح جدو بكلبي نوب عادل كملهه
رحت كعدت يم رجلي وكلت :- بس فهمني الكلام الي مكتوب بالورق صحيح..

جنت اترقب الكلام يطلع من شفايفه عسى ولعل يكول هالتحاليل جذب ..

كال
_اي فيان اني مريض بالسرطان وبمرحله متقدمه ..

عقدت حواجبي متفاجاءه :- زين ليش مابينت عليك الأعراض ..

فرك وجهه وكال
_لو مامبينه عليه اعراض المرض ماجان رحت وحللت دائما ادوخ وو..

ماخليته يكمل  كمت وكفت وصرخت بوجهه :- عادل انتَ انتَ واعي على الدتكوووله لك هذا سرررطان
مو لعب فدوه كلي اذا تشاقه وياي لا هيج تحرك كلبي ..

عيونه صارت حمر احسه اختنك كال :- فيان اني ماجاي وكايلج واصلاً ماجنت ناوي اكلج بس انتِ شفتي التحاليل ..

مسحت دموعي من على خدي
ورجعت كعدت يم رجلي لزمت ادي وكلت بتوتر :- لا ..لا تهتم تعالج وتصير زين بس خلي أيمانك قوي ..

ضحك ضحكه جانبيه وكال :- مستحيل محد انصاب بهيج مرض وطاب هالمرض مثل الدوده ياكل بيك لحد ما تفارق الحياه واني نهايتي ..

ماخليته يكمل كتله واني ابجي :- لا فدوه لا تحجي هيج اسمعني من باجر تروح تتعالج ..

بلع ريكه وكال :- اسمعي فيان ان تعالجت او لا نهايتي وحده وهي الموت واذا رحت ضربت جرع كيميائية راح يشكون اهلي واني ماريد احد يعرف ويشيل همي ..

صرخت بوجهه بحركه كلب :- لك انتَ ليش هيييج يأس وطز واذا دروو كلي اذا صارلك شيء منو يفيدك امك ابوك لو اخوك فكر بأابنك على الاقل ليش هيج جاي تحرك كلبي ..

كال
_مافكر بي اذا انتِ امه متأكد راح تعوضينه عني ..

خليت ايدي على كصتي بنفاذ صبر ..
كلت كلام بدون وعي ..