Isang tawag sa hinaharap,
Ang umalingawngaw sa aking Isipan
Kumakatok at patuloy na naghahanap
Pumasok sa utak, ginising ang mga kalamnan
Tinapik ang pusong namamanhid
Hinalukay ang damdamin, hinalo at nilito
Maningas na damdamin ang isinilid
Pilit na sumisiksik sa buong pagkatao
Ginising ang natutulog na puso't isipan
Nagkamalay na ang diwang matagal nang pinatay
Naliwanagan ang mga nasa kadiliman
Binangon ang kaisipan na pinatay
Panahon na para gumising ka
Ikaw na kabataang matagal na nahimlay
Nahimlay sa mundo ng pantasya
Hinahanap ka ng reyalidad, ng tunay na buhay
Ika'y nasa kasalukuyan
Isa sa bubuo ng hinaharap
Matagal nang tinatawag ng kinabukasan
Matagal nang ginising ang damdaming makabayan
Kabataan, bumangon mula sa pagkakahimbing
Kailangan ka ng hinaharap
Ika'y liwanag kung ituring
Pag-asa at pangarap
Ngayon na para kumilos ka kabataan
Mahalaga ang iyong papel sa mundo
Isa ka sa magtatayo ng kinabukasan
Ang magpapaganda at magpapalago nito
Kailangan ka, inaasahan ka
Ikaw ang pundasyon ng hinaharap
Gumising, bumangon, at gumalaw ka
Dahil ikaw, kabataan ang mismong hinaharap
***
(102919/08:23)
BINABASA MO ANG
Nakapinid na Damdamin
PoesíaDamdaming 'di maisiwalat, Isinatitik ng panulat. (Kalipunan ng mga tula at prosa) 2019-2023
