الخادمة و الزعيم _ باللهجة الجزائرية _

بارت 3 انت سارقة

مونيا راحت بزربة للكوزينة
ايار : واشبيك حمرة
مونيا : ضحك معايا اهه و ديك تبسيمة بزاف شباب
ايار : شكون
مونيا : ليث صاحب مسيو اسر
ايار : متقوليليش طايحة فيه
مونيا : افف ديجا ديري لقهوة تاع مسيو اسر

في الليل :

كانت ايار تطل من التاقة حتى شافت طونوبيل دخلت هبط منها اسر شدت في قلبها و بدات تتبسم

...........

كان اسر طالع للشمبرة
ايار : مسيو كاشما تسحق نجيبلك
اسر : مكالاه
كان طالع منبعد دار
اسر : حقا واش اسمك
ايار : اا....ايار
اسر : ايار
و طلع و خلاها تضحك وحدها

صباح جديد :

ناضت ايار لقات فاتن مع شوية خدامين ينقيو في الحالة و يوجدو
ايار : صباح الخير
فاتن : صباح الخير
راحت ايار للكوزينة لقات مونيا
ايار : واش مونيا
مونيا : صحا ايار واش راكي دايرة فيها
ايار : والو ؛ واش كاين اليوم لقيت خالتو فاتن و الخدامين يوجدو في الحالة
مونيا : امم موسيو سليم راهو جاي مع عائلته
ايار : شكون هذا
مونيا : بابات اسر ؛ هو و مدام فريدة مطلقين عاود زواج بمدام ليندة و عندهم وليدهم زيد مي علاقة اسر بباه تقدري تقولي مليحة باسكو دايمن فاتن تقولنا بلي مدام فريدة جامي لا خلات اسر يكره و لا يحقد على بباه مالغري المشاكل لي كانت بيناتهم

و هكذا كان جاز نهار

مع العشية :

كانوا كامل متلمين في الطابلة على راسها كان اسر و قدامه فريدة و مقابلها سليم و قدامو ليندة منبعد زيد و كاميليا
فريدة : ايه كاميليا واش ديري في حياتك
كاميليا : هذا عامي الاخر في الجامعة راني نقرا فالطب
ليندة : ايه كاميليا ناجحة بزاف و متخمميش فالخدمة سليم راح يعاونك بواش قدر و ميخليكش كيما وقف مع زيد راح يوقف معاك

وخزرت في اسر
شاف فيها سليم شوفة تاع بلعي

زيد : انا سمحولي نروح نغسل يدي كملت
ناض زيد رايح باش يغسل
زيد : شحال يعييوني هاذ الاجتمعات العائلية بفف
كان جايز على الكوزينة شاف ايار

زيد : باردون مدموزال معليش نسقسيك وين جاي سالدوبان
ايار : دور منا تلقاه على يدك اليمين
زيد : اممم صحا ؛ نتي جديدة هنا صح
ايار : ايه
زيد : ولاو يجيبو غير شابين هنا مكانش علبالنا
قعد غير يدنا ليها حتى لصق فيها
ضربتو بكف
ايار : هاذي الاولى و هاذي الاخرة ماشي باسكو خدامة معنتها عندك الحق دير واش تحب
راحت و خلاتو
زيد : راح تندمي بزاف

مور ما راح سليم و عائلته فرزو كامل الحالة و عاونتهم ايار
كي كملو راحت ايار و مونيا لشمبرتهم
مونيا : افف كرهت من هاذ الخدمة
ايار : ظهري وجعتني
📱📱📱

مونيا : وي ماما .... تهلاي في روحك السمانة الجاية نبعتلك دراهم  .... سلميلي على ختيتو
ايار : يماك
مونيا : ايه علبالك توحشتها بزاف لوكان ماشي حاجتي لهاذ الخدمة لوكان راني معاها ؛ ماما مريضة و دواء تاعها و الطبيب لازملو على هذيك خرجت نخدم
عنقتها ايار
ايار : ربي يشافيها
مونيا : ان شاءالله ؛ ايه ونتي
ايار : بابا راح و خلانا كنت صغيرة منبعد عشنا انا و ماما عند ماني و ماما كانت دايما تتحمل مصاريفنا على هذيك قررت نجي نخدم

وفي هاذ الوقت سمعو الطبطيب في الباب

مونيا : شكون
دخلت خدامة
خدامة : مسيو اسر راهو يعيطلكم
خزرو البنات في بعضهم
ايار : غير الخير
مونيا : امشي نشوفو
وصلو للصالون لقاو فريدة قاعدة و الخدامين قدامها و اسر كان يبان عليه منارفي
اسر : كاين واحد بيناتكم سراق
خزرو الخدامين في بعضهم
اسر : و مادابيكم لي سرق السنسلة تاع يما يروح يجيبها بلاما يخليني انا نجبدها و اذا صبتها عند كاش واحد مراحش نتساهل معاه

فاتن : سمحلي وليدي مي بلاك حطتها في كاش بلاصة و نسات يعني شحال و حنا نخدمو هنا جامي لا تسرقت حاجة
اسر : مي اليوم تسرقت ؛ ديجا كاين خدامة جديدة هنا شكون قال بلي قاع قدام

ايار : صح انا خدامة و ماعنديش مي هذا ما يعنيش تهمني بسرقة انا ....
اسر : ششش شكون نتي ها شكون نتي باش نامنك و المرة الجاية كلامي متقطعيهش ... فهمتيي ( بالعياط )
ايار مالقات غير تهبط راسها

في دقيقة كان عيط للحراس تاعو و قالهم يفتشو كامل الغرف تاع الخدامين

..........

الحارس : مسيو لقينا هاذي في شمبرة لي تطل على الجنان
اسر : فاتن تاعمن هاذ الشمبرة
فاتن : ت..تتاع مونيا و ايار

اسر : خرجو زوج سراقات مليح
مونيا : لالا موسيو كاين غلطة حنا ماسرقنا والو
بدا يعيط
اسر : كيفاش تقدرو تحطو يدكم على حاجة خاطيتكم في داري بصح واش يجي من ناس كيما نتو .... ماليوم منسحقكمش هنا ... و دوكا نخليكم تتفاهمو على البونك شكون يرقد لتحت و شكون لفوق
راحت مونيا لرجليه تبكي
مونيا : مسيو تعيش غير الحبس لالا بواش نحلفلك انا ما مسيت حتى حاجة

ايار كانت ساكتة شادة البكية بسيف عمرها ولا توقعت تنهان هكذا
ايار : خليها معندها حتى دخل انا لي سرقت
شافو فيها كامل
مونيا : كي...كيفاش
ايار : انا لي سرقت هي مكان مدخلها لي حاب ديرو ديرهولي ليا
اسر : تروحي ترفدي حوايجك و تسناي حتى يلحقو البوليس
فاتن : اسر وليدي مدخلش لابوليس فالوسط ... مدام فريدة قوليلو
فريدة : اسر خلاص خليها ماشي مليح الطفلة صغيرة بلاك حاجتها خلاتها تسرق راح تنسى حكاية الحبس فهمتني

اسر : عندها خمس دقايق نلقاها خرجت من داري

راحت ايار تكركر في رجليها رفدت حوايجها و جات خارجة تشوف فالخدامين يهدرو عليها و مونيا لي عينيها كانو كلهم لوم و حيرة
خرجت قعدت تمشي فالطريق معلابلهاش وين
طاحت في نص الطريق قعدت غير تبكي و تعيط
ايار : وعلاش وعلاش .... اهئ اهئ واش درت

.....
رفدت كابتها و كملت تمشي غايسة و دموعها يهبطو حتى سمعت صوت طونوبيل و ضوء غمضت عينيها حسبتلها راح تموت حتى
.... : راكي مليحة

هذا هو بارت اليوم انشاءالله يكون عجبكم نتمنى تخليولي ارائكم اقترحاتكم افكار باش نتشجع نكمل و في البارت الجاي انشاءالله راح نعرفكم على الشخصيات الجديدة
الى الملتقى