الخادمة و الزعيم _ باللهجة الجزائرية _

بارت 26

مونيا : السماح مابيناتنا
ليث : دايمن كنت نسمع بلي منعرفوش قيمة الانسان حتى يبعد و صح فالاول تمسخرت بيك مرقتلك بلي كنت نعجبك من الخزرات و الافعال تاعك بنتيلي وحدة تحب دراهم و تحب تتمسخر و جوز الوقت بصح منبعد عرفت قيمتك و عرفتك واش تسواي تشفاي كي كنت نجي دايمن للقصر و نظل نهبل فيك حسبتلك بارسكو نكرهك لالا بارسكو نحب نهبلك .... نحبك مونيا

مونيا قعدت تشوف فيه كانت مشوكية خافت اذا راهو يتمسخر بصح من هدرتو كان يبان سيريو

ليث : قولي حاجة
مونيا : شوف ليث بلاك انا جايحة و بهلولة كذابة لي حبيت قولو عليا بصح منقدرش نكون خائنة منقدرش نخون العشرة لي بيني و بين رياض مهما كان
ليث : بصح ...
مونيا : ما بصح ماوالو تاخرت و تاخرت بزاف لوكان منقبل كنت قادرة ننسى كلش و نكمل معاك بصح دوكا راني مخطوبة و عرسي مقعدلوش بزاف نتمنى تحترم رايي
ليث : مونيا مديريليش هكذا بهدليني ضربيني لي حبيتي ديريه بصح متبعديش هكذا
مونيا : روح ليث ربي يلاقيك ببنت الحلال

راحت مونيا و خلات ليث موراهاشدت تاكسي دخلت للقصر تجري لشمبرتها دخلت تحت الفراش تبكي دخلت ليها سمية

سمية : مونيا
مونيا : وشنو
سمية : نوضي مدام فريدة راهي تعيط لكامل الخدامين بارسكو كاين عشاء لعشية راهو جاي مسيو مراد و عائلته
مونيا : ايه دوك نجي

جاز الوقت تمتم لحق مراد و عائلته كامل جاو على جال ايار حابين يشوفوها اما ايار مخرجتش من شمبرتها محبتش تهبط و تشوفهم

عند اسر

كان قاعد في دارو يخدم في واحد الورق لابس غير سروال و عريان مالفوق حتى سمع لاصونات راح فتح الباب لقاها كاميليا دخل و خلاها واقفة اما هي غلقت الباب و دخلت موراه لقاتو مكسل فالفوتاي راحت عندو تكسلت قدامو و عنقتو هو قعد يتفكر فايار صبح بدا يضحك وحدو دنا كاميليا و ناض

كاميليا : وين راك رايح
اسر : راكي تعيي غير في روحك علبالك
كاميليا : يا اسر شحال من خطرة نقولك غلطت سمحلي مد فرصة للعلاقة تاعنا
اسر : مكانش حاجة اسمها حنا

طلع اسر لشمبرته و هي قعدت تاكل في روحها

كاميليا : هاذي كامل خدامة دارتلك هكذا ؛ بصح مزال متعرفوش كاميليا كيفاش عاملة

نرجعو للقصر :

طبطب 🚪🚪🚪

ايار : ادخل
....
مونيا : ايار حبيبتي متهبطيش
ايار : منهبطش قوليلهم راسي راهو يوجع
مونيا : ايار ... نتي علبالك وانا علبالي بلي راسك سبة برك ... راني شفت حالتهم باينين حابينك ترجعيلهم سورتو يماك
ايار : مونيا تعيشي خليني حنرقد ديجا
مونيا : دوك تنوضي معايا ... حابة نعرف ماشي كنتي حابة تعرفي والديك شكون
ايار : ايه بصح مكنتش متوقعتهم هاذو
مونيا : صحا اسمعيلهم برك
ايار : مرانيش حابة
مونيا : نتي صح مرقتيها مكانش عبد ميغلطش في هاذ الدنيا صح عانيتي بزاف و صح غلطو معاك بصح حطي روحك بلاصتهم بنتهم لي كثر من 20 سنة وهما يحوسو عليها و محروقين باش يشوفوها كي يلقاوها تبعد عليهم هكذا كامل نغلطو و الغلطة لكبيرة منعند الناس لي رباوك باسكو لي لتحت معندهم حتى ذنب حتى انهم جاو عندك و طلبو السماح واش تحوسي كثر من هكذا

خرجت مونيا من عند ايار كانت متاكدة بلي راح تهبط وصح واحد خمس دقايق كانت لتحت غير شافوها راحو يسلمو عليها هيثم يعنق و نور تبوس و تعاود و روميسة منهدروش خير لحقت عند مراد سلمت عليه

مراد : كيفاش راكي ايار بنتي
ايار : حمدالله

قعدت ايار و روميسة قدامها قعدو يحكيو فبزاف مواضيع ايار عينها على الباب تستنى اسر وقتاش يدخل
روميسة : ايار تستناي في كاش واحد
ايار : لالا
روميسة : حنا جينا هنا حابينك ترجعي معانا ي..
مراد : ايار مراحش نسيفو عليك تتقبلينا مي على الاقل تكوني عايشة معانا و قدام عينينا

جات الخدامة

خدامة : مدام العشا وجد

فريدة : جوزوا تتعشاو
ايار : انا نروح نغسل يدي و نجي

ايار راحت تعيط لاسر رفدت تيليفون كانت مترددة يعني جامي لاعيطتلو ؛ عيطت اول مرة والو

ايار : زعما مشغول ... بلاك معرفش نيميرو

عاودت مرة واحد اخرى رفدت عليها كاميليا

ايار : الو شكون
كاميليا : نتي لي شكون
ايار : هاذا نيميرو تاع اسر لالا
كاميليا : ايه راهو مشغول شكون نتي
ايار : ايار
كاميليا : هاذ الشي نتي هاذي انا كاميليا
ايار : ....
كاميليا : المهم المرة الجاية متعيطيش برك و ديرونجينا

كوبات عليها ايار غاضتها عمرها

ايار : يعني انا هنا نخمم عليه وهو معاها ... اصلا معلابالوش بيا كامل و ماشي دايرلي حساب اصلا شكون انا باش يديرلي حساب

راحت ايار عندهم لقاتهم يستناو فيها قعدت مكانتش حابة تاكل كانت غايسة حتى نطق هيثم

هيثم : ايه ايار واش قولتي جي تعيشي معانا يعني شحال تعاي قاعدة هنا
ايار : معنديش مشكل نجي معاكم

عائلتها فرحو بزاف كملو العشاء و هما بزااف فرحانين لي راح جي عندهم خصوصا روميسة

ايار : انا نروح نجيب حوايجي
روميسة : مكلاه منبعد جيبيهم ولا عاودي شريهم

مريبونداتش عليها راحت رفدت فاليزا حطت فيها حوايجها وخرجت

هذا هو البارت نتمنى يكون عجبكم خليولي ارائكم فالبارت و توقعاتك فالاحداث الجاية وكيفاش راح تقدر تعيش و تتاقلم ايار مع عائلتها الجديدة
الى الملتقى انشاءالله 💚