الخادمة و الزعيم _ باللهجة الجزائرية _

بارت 4

راحت ايار تكركر في رجليها رفدت حوايجها و جات خارجة تشوف فالخدامين يهدرو عليها و مونيا لي عينيها كانو كلهم لوم و حيرة
خرجت قعدت تمشي فالطريق معلابلهاش وين
طاحت في نص الطريق قعدت غير تبكي و تعيط
ايار : وعلاش ياربي وعلاش .... اهئ اهئ واش درت

.....
رفدت كابتها و كملت تمشي غايسة و دموعها يهبطو حتى سمعت صوت طونوبيل و ضوء غمضت عينيها حسبتلها راح تموت حتى
.... : راكي مليحة
شافت قدامها جون طويل و شباب منبعد محست بوالو

بعد مدة :
بدات تتفاطن و تشوف كلش فلو قدامها بدات شوية بشوية تحل عينيها
ناض هذاك الجون من الكرسي قعد غير يستنى فيها تنوض
هيثم : راكي مليحة مدموزال
ايار : ايه ؛ شكون نتا وانا وين راني
هيثم : شفتك مقبيل برة سلكتي على شعرة معلباليش اذا نتي نورمال تمشي وسط طريق كنت راح نقتلك ... منبعد دختي وانا جبتك لسبيطار
ايار : كثر خيرك ؛ دوكا انا لازم نوض
هيثم : سور بلي راكي مليحة
ايار : ايه
هيثم : وين راكي رايحة يعني اذا تحبي نوصلك
ايار : لالا صحا راني رايحة لدارنا

راحت ايار للدار مزية كان عندها المفاتح دخلت بلعقل راحت ديراكت للشمبرة رقدت

في الصباح :

نجمة : ايار
ايار : امم
نجمة : نوضي بنتي
ناضت ايار و قعدت
ايار : واش كاين ماما
نجمة : ماشي لازم تكوني فالخدمة على هذيك راني نسقسي
ايار : ها مكانش عندي خدمة بزاف على هذيك خلاوني نجي
نجمة : سور
ايار : سور ماما ماتقلقيش روحك

ناضت ايار توجد روحها اليوم راهم رايحيين يبداو يتدربو في سبيطار معروف بزاف

وصلت للسبيطار لقات مجموعة من لي يقراو معاها حتى جا طبيب
طبيب : صباح الخير عليكم
كامل : صباح الخير دكتور
طبيب : الور نتمنى نجوزو وقت مليح مع بعضنا و ما ننساوش بلي رانا هنا باش نتعلمو و نستفادو من بعضنا قبل راح نشكلو مجموعات كل مجموعة راح ترافق طبيب ....
بعد ما قسموهم ايار كانت مع زوج دراري اكرم و فاتح و طفلة لي هي ياسمين
الطبيب : و نتوما راح ترافقو دكتور هيثم

بعثهم عندو غير لحقو للبيرو طبطبو و دخلو
كامل : صباح الخير
هيثم : صباح الخير
غير طلع راسو شافتو ايار تسمرت في بلاصتها خزر فيها شحال مي مبينش كامل دخلهم فهمهم شوية منبعد رافقوه ورالهم السبيطار وعرفهم على بزاف حاجات ( خاطيني هاذ العفايس )

في جهة اخرى :

فريدة : طارق
طارق : وي مدام
فريدة : حابة تجبدلي تسجيلات الكاميرا تاع القصر
طارق : كيما تحبي مدام

..............

فريدة : كان علبالي

_____________________________

جازت سمانة بزاف هايلة على ايار عجبها الحال بزاف في سبيطار علاقتها مع هيثم تحسنت بزاف ولاو يحكيو يعني تقدرو تقولو اصدقاء

طبطب
دخلت ايار
ايار : هيث.... ااا سمحلي مكانش علبالي بلي عندك ضيف
هيثم : لالا ايار جوزي ارواحي نعرفك ؛ ايار هاذي يما يما ايار جات تتعلم هنا وانا الطبيب المسؤول عليها
ايار : مساء الخير مدام
روميسة : مساء الخير
سلمت عليها ؛ ايار حست بشعور غريب مي تمتم جبدت روحها
ايار : انا سمحولي نروح
خرجت ايار رفدت حوايجها ورجعت للدار كي لحقت قدام الدار لقات طونوبيل شابة قدام دارهم
ايار : تاعمن هاذي

حتى تشوف كارو تفتح لقاتها فريدة دارتلها بيدها ارواحي
في الاول ترددت منبعد راحت

ايار : مدام واش راكي ديري هنا
فريدة : جيت نهدر معاك على هذاك نهار
ايار : مدام تعيشي نرجع نطلب السماح
فريدة : اصلا انا لي نطلب السماح في بلاصتي و فبلاصة اسر حنا حكمنا عليك غير كي لقينا سنسلة عندك مع انه كان لازم نتاكدو
ايار : مفهمتكش
فريدة : عاودت شفت لكاميرات لي فدار و تاكدت بلي ماشي نتي بصح مفهمتش وعلاش مادافعتيش على روحك بلعكس حصلتيها في روحك
ايار : مكان عندي حتى دليل ومكنتش حابة مونيا تخسر خدمتها وهي بحاجة الخدمة كثر مني
فريدة : و دوكا مزالك محتاجتها ... حابتك ترجعي
ايار : مدام راكي تطلبي في المستحيل وليدك هاني بزاف وانا منقدرش نرجع للدار لي نهنت فيها
فريدة : الراي رايك بصح اذا بدلتي رايك ...
ايار : مراحش نبدلو مدام و دوكا تبقاي على خير لازم نروح

تعريف الشخصيات الجديدة

زيد : وليد سليم و ليندة و اخ اسر من الاب لمفشش تاع يماه لي يحبها تكون عندو مايحبش خوه باسكو اسر ناجح كثر منو

كاميليا : بنت اخ ليندا طفلة مغرورة و متكبرة بالمختصر شريرة الكرونيك

هيثم : كيما شفتو طبيب ناجح بزاف و شركة باباه من اكبر شركات لكن هو حقق حلمه لي هو طب يماه روميسة و بباه مراد

هذا هو البارت علبالي قصير شوية
المهم نتمنى احداث اليوم تكون عجبتكم
خليولي رايكم في هيثم و عائلته راح تساهم في انقلاب القصة قريبا ههه المهم متنساوش تعليقاتكم وارائكم تهمني 💜