بدات تبكي وتعيط شدها اسر وعنقها
اسر : اشش
ايار : اسر قلهم يروحو ... تحج قولهم
دارلهم بعينيه مراد شد روميسة وخرجو اما اسر خرج ايار للجنان قعدت واقفة و ساكتة
ايار : كان علبالك
اسر : ايه ؛ نهار ديتك معايا للابارتمون حكيتيلي منبعد كي عرفت بلي هما والديك الحقانيين هما حبو يخليوك وحدك شوية باش يقولولك و انا مكنتش حاب نتدخل في المشاكل العائلية تاعكم
ايار : مراحش نقدر نعتبرهم عائلتي ولا باي شكل
اسر : بصح راح يقعدو والديك و هيثم و نور خاوتك
ايار : ههه البارح كانو حاطيني حابة نلعب بوليدهم اليوم خرج خويا
اسر : الله غالب الانسان يقدر يخير صحابو بصح عائلتو ميقدرش يخيرها براي مكانش لي مايغلطش في هاذ الدنيا و هما كانو محروقين باش يعرفو بنتهم لي تحرمو منها هاذ سنين كامل لازم تمديلهم فرصة و زيد هما داو عليك نظرة ماشي مليحة ونتي تاني
ايار : يعني نتقبلهم هكذا برك
اسر : علبالي صعيبة عليك بصح على الاقل مديلهم فرصة حاولي تعيشي معاهم تعرفيهم كثر بلاك يحن قلبك
ايار : منقدرش نعيش معاهم
اسر : باباك و يماك و خاوتك حابين تكوني وسطهم
ايار : فهمني منقدرش نعيش مع ناس نحس روحي برانية معاهم
اسر : مراكيش برانية عليهم راكي بنتهم فهمي
بعد مرور اسبوع :
جازت سمانة على الابطال تاعنا عبارة عن قراية و خدمة ؛ مراد طلب من اسر يخلي ايار عندو مي بصفتها ضيفة ماشي خدامة حطوها في شمبرة تاع ضيوف و بلاصتها يعني لي مع مونيا حطو فيها خدامة جديدة لاسر
اليوم الجمعة غير تفاطنت ايار شافت تيليفون لقاتها 6 تاع صباح لحقها ميساج من عند اسامة كان بعتو البارح
اسامة < واش ايار سافا >
ريبوندات عليه ايار ايه علاقتها تحسنت مع اسامة ولات تروح و جي معاه بزاف
ناضت دوشت و صبغت شعرها حبت تبدل من روحها شوية و من روتين باش تنسى شوية لي صرا معاها منقبل المهم صبغتو بكولار كلار على شعرها الطبيعي
خرجت من دوش جبدت شعرها و لبست بيجامة روز شابة تاع شتا دارت شوية مكياج و فالاخر شوية بارفان هبطت لتحت عند مونيا كي شافتها فرحت حست ايار بدات تتحسن
مونيا : اوو رانا شابين
ايار : عينيك شابين ... ايه واش راكي دايرة فيها
مونيا : والو كيما راكي تشوفي
ايار : مونيا ختي لوكان غير تشوفيلي كاش خدمة علبالك دوكا منيش نقدر نخدم هنا ولازم نجيب مصروفي
مونيا : باباك من اغنى الاغنياء و تحوسي على خدمة
ايار : قتلك شحال من خطرة مجبديليش عليهم مراهمش والديا
مونيا : لوقتاش راح تقعدي هكذا
ايار : لوكان تزيدي هدرة عليهم نتخاسر معاك
مونيا : ايه خلاص منبعد نشوفلك
هما يهدرو حتى دخل ليث
ليث : صباح الخير
مونيا دورت راسها تكمل في خدمتها
ايار : صباح النور غير الخير جاي صباح بكري
ليث : مجيتش عندك
ايار : عندمن جاي انشاءالله
ليث : عند صاحبتك لي ماهيش حابة تحلبنا
راح جبدها
ليث : عندي هدرة نقولهالك
مونيا : معندي منسمع منك
ليث : تسمعي تسمعي
كركرها موراه و راح
ايار : هذاوين بدا يوليلو العقل
دخلت سمية ( سمية هي خدامة اسر الجديدة )
سمية : ايار فبلاصة مراكي تهدري وحدك روحي وجدي القهوة لاسر
ايار : اولا مراكيش تهدري مع صاحبتك باش تهدري معايا هكذا ثانيا مسيو اسر ماشي اسر ثالثا القهوة خدمتك ماشي خدمتي
سمية : اولا ميشرفنيش نصاحبك ثانيا مسيو و لا بلا مسيو هاذي اسر يقولها ماشي نتي و ثالثا مسيو اسر تاعك لي قال ايار لي توجدلي قهوتي ماشي انا
ايار : يا نتي لسانك خرج طويل على قامتك
سمية : اه اسمعي واش راكي تهدري انا راني محترمتك بارسكو ضيفة بصح ماشي معنتها طلعي فوق راسنا
راحت سمية و خلات ايار تاكل في روحها وجدت لقهوة و طلعتها تهدر مع روحها دخلت للشمبرة و مزالها تهدر مع روحها
ايار : والله مليحة جات البارح تقولي واش ندير واش منديرش بصح لالا لوكان ماشي هذاك اسر فاتحلها العين مديرش هكذا مي بيانسور شعرها صفر كيما المصفارة تاعو يعجبو ايه الله غالب هذا هو الغو تاعو مسكين ( حطت القهوة ) حقا صح المصفارة هذيك مراهيش تبان كامل واقيلا ماتت تتت لوكان هبل عليها .... لالا ميبانش يحبها باش يهبل عليها ايه بصح اوموان يحزن عليها زعما احتراما لها .....
اسر : مزال مكملتي
دارت ايار عندو
ايار : يااا .... كنت هنا
اسر : لالا كنت لهيك
ايار : قصدي ... امم حس..سبتلي بلي مكان حتى واحد هنا على هذيك كنت نهدر يعني .... سمعت كلش
اسر : ايه
دنا عندها حتى لصق فيها و هي كانت حطيح قلبها قعد يخبط منبعد جبد كاس تاع القهوة و قعد يشرب
هي رجعت نفس و خرجت تجري
نروحو عند مونيا و ليث
راحو لواحد البلاصة قدام البحر
مونيا : ليث stp مطولش عندي خدمة لراسي اليوم لي عندك قولو بالمختصر المفيد
ليث : مونيا قبل كلش حبيتك تسمحيلي على كلش درتهولك
مونيا : السماح مابيناتنا
ليث : دايمن كنت نسمع بلي منعرفوش قيمة الانسان حتى يبعد و صح فالاول تمسخرت بيك مرقتلك بلي كنت نعجبك من الخزرات و الافعال تاعك بنتيلي وحدة تحب دراهم و تحب تتمسخر و جوز الوقت بصح منبعد عرفت قيمتك و عرفتك واش تسواي تشفاي كي كنت نجي دايمن للقصر و نظل نهبل فيك حسبتلك بارسكو نكرهك لالا بارسكو نحب نهبلك .... نحبك مونيا ❤
هذا بارت اليوم اذا عجبكم ديرو جام خليولي تعليقاتكم و ارائكم بخصوص الاحداث
و الى الملتقى انشاءالله 💚
أنت تقرأ
الخادمة و الزعيم _ باللهجة الجزائرية _
Romanceالقصة تحكي على ايار هذيك طفلة البسيطة لي حياتها هادئة محصورة بين دار و قراية باش تتقلب بسبب اسر لي راح تكون خادمة في القصر تاعو فهل ستستطيع ان تسلب قلبه و تمحي كبريائه مع العديد من الاسرار لي راح نكتاشفوها ملاحظة : احداث القصة غير واقعية
