الخادمة و الزعيم _ باللهجة الجزائرية _

بارت 9

روميسة : راجلي عندو الحق يخاف على وليدو حتى اذا معندكش نية سيئة نتمنى تفهمي حنا الوالدين نخافو و نخممو على ولادنا وحابة نطلب منك حاجة حابة منك تبعدي على وليدي مرانيش حابة مشاكل بينه و بين باباه نتمنى انه متردينيش و متخلينيش نستخدم طريقة اخرى معاك
ايار : مفهمتش واش درتلكم باش ديتو عليا نظرة هكذا
روميسة : شوفي ايار نتي مدرتيلي والو وانا مراني حابتك مراني كارهتك بصح حاجة لي تضر ولادي تضرني انا ومن مصلحتك انه منكرهكش
ايار : ميساج لحق

خرجت ايار من سبيطار و الدموع معمرين عينيها وعلاش لازم الدنيا توقفلها في وجهها دايمن وصلت لدار مسحت عينيها دخلت تنحي في صباطها حشاكم شافت صباط تاع رجال

ايار : تاعمن هذا

كانت رايحة للصالون حتى سمعت
نجمة : احمد روح منا قبل ماجي ايار
احمد : خليها جي لازم تعرف كلش هههه ماشي من حقها تعرف
حكيمة : يا راجل واش جابك بعد هاذ السنين كامل
احمد : جيت نكشف الحقيقة باش ماشي غير انا لي نبان ماشي مليح
نجمة ( وهي تبكي ) : ابقى بعيد عليها نمدلك واش راك حاب بعد عليها برك راح تزيد تكرهنا كثر اذا عرفت

ايار : واش نعرف

دارو كامل عندها

نجمة : ايار روحي لشمبرتك
ايار : مرانيش رايحة حتى نعرف واشمن حقيقة راهو يهدر عليها هاذ الراجل
احمد : توتوتو وليت هاذ الراجل هكذا تقولي لباباك
ايار : انا معنديش اب تخلى عليا هاذ السنين كامل و دوكا جيت وعلاش ها
احمد : شوفي يماك تقولك .... ا نجمة
نجمة : احمد روح
ايار : ماما واش راهو صاري

نجمة كانت غير تبكي

حكيمة : والله ماتحشم اذا نتا دوكا راجل هكذا دير لمرتك و بنتك
احمد : مكلاه تجي تهدريلي على الحشمة وهاذي ماشي مرتي وهاذي ال**** ماشي بنتي ولا راح تكون بنتي

ايار تسمع فيه وخلات طريق لدموعها باش يهبطو

ايار : واش درتلك باش متحبنيش قولي
احمد : ايار الغلطة ماشي غلطة تاعك

خرج احمد ايار دخلت للشمبرة غلقت على روحها كانت غير تبكي و تتفكر كل كلمة قالهالها باباها حبت تعيط لهيثم تشكيلو منبعد تفكرت كلام روميسة

ايار : وعلاش كامل واقفين ضدي واش درت
بدات تعيط وتخبط حكمتها هستيريا تاع البكاء نجمة و حكيمة يعيطو من برا باش تفتحلهم والو

نجمة : ايار بنتي فتحيلنا الباب
ايار : روحو خليوني .... خليوني اهئ اهئ

جازو يومين و ايار غالقة على روحها

مع العشية كامل فتحت الباب و خرجت لقات يماها و حكيمة في الصالون حالتهم حالة راحت عند يماها عنقتها و يماها زيرت عليها

نجمة : وعلاش خوفتيني عليك هكذا ايار
ايار : ...... وعلاش يكرهني
نجمة : انا نحبك نحبك كثر من روحي وهذا يكفي
ايار : من صغري نشوف البنات كيفاش يحبوهم ابهاتهم وانا علاش ..... ماما
نجمة : عينيا
ايار : واش كان قاصد هذاك نهار بهدرتو واش هي الحقيقة لي كان يهدر عليها
نجمة : ااا ... هو كان حاب يفسد علينا عيشتنا هدرته فارغة

ايار كان علبالها بلي راهي مخبية عليها حاجة بصح تعرف يماها اذا محبتش تحكي يعني متحكيش

_ _ _ _ _ _ _ _ _ _ _ _ _ _ _ _ _ _ _ _ _ _ _ _ _

ايار الاسبوع هذا كامل مخرجتش من دار مكانتش تحس روحها مليحة على هذيك عيطت لفريدة وقاتلها بلي راهي مريضة وحبت تدي يومين مي فريدة قاتلها خلي حتى للويكاند و ارواحي حتى جامعتها مكانتش تروح

ناضت الصباح راحت تكركر في رجليها ماشي حابة تروح بصح سيفت على روحها كي خرجت شافت اسامة جات حتبدل طريق راح شدها

ايار : متكرهش نتا دوكا قتلك بلي اخطيييني متفهمش
اسامة : ايه منفهمش و منحبسش حتى توليلي
ايار : انسى انا عندي واحد في حياتي دوكا اقعد شاد فهذاك الخيط

ايار قاتله هكذا باش يخطيها مي هو تقلق زير عليها في يدها و بدا يعيط

اسامة : راكي تكذبي تكذبي ... نتي تاعي فهمتي
ايار : نحي يدك وجعتني
اسامة : شكون هذا قولي
ايار : راني نكذب خلاص نحي يدك
اسامة : ههه كان علبالي بلي متخلينيش .... سمحيلي عمري اذا وجعتك
ايار : بسيكوبات مريض مهبول

و راحت بزربة وصلت للقصر سلمت عليها مونيا بدلت حوايجها راحت فرزت شمبرة اسر و كملت تخدم عادي مع العشية اسر كان جا من الخدمة وايار وجدتلو قهوة و طلعتهالو

طبطب 🚪🚪🚪
اسر : ادخل

حطتلو القهوة

ايار : نقدر نروح مسيو

كمل اسر يخدم في البيسي و مريبوندالهاش

بعد مرور عشر دقائق :

اسر : مجيتيش هاذ السمانة
ايار : اممم كنت مريضة
اسر : مام تكوني مريضة و جي ماشي دار باباك جي كيما تحبي
ايار : قلت لمدام فريدة وهي خلاتني

ناض اسر عندها شدها من يدها و دناها للحيط

اسر : راكي تخدمي عندي ماشي عند مدام فريدة سما la permission تديها من عندي فهمتي
ايار : امم

ايار كانت مخدرة كامل جامي لا دنا منها واحد هكا و واحد كيما اسر ماشي غير يدوخ هههه
اما اسر كان يخزر في وجهها كان يشوف الحزن لي خيم عليه

ايار : خليني نروح
شدها من يدها لي توجع
اسر : كي نحب نخليك تروحي انا نقولك بلاما تقولي
ايار : نحي يدك اه

شاف يدها لقا لاتراص حمرا

اسر : شكون دارلك هكذا

يتبع .......

هذا هو البارت نتمنى عجبكم انا علبالي بلي راح نكملو ههه سما متكتبوليش كملي نحب نشوف رايكم في احداث البارت و اب ايار نحب تكتبولي اقترحاتكم و كلما نلقى تفاعل نتشجع و نتحمس باش نزيد نكتب
الى الملتقى انشاءالله 💜