الخادمة و الزعيم _ باللهجة الجزائرية _

بارت 41

اسر عنق ايار و زير عليها و هي مكانتش من المعارضين عنقاتو و قوات فالبكية

اسر : ششش ... نوعدك منزيدش نجرحك ... حبسي ماتبكي
ايار : اسر نتا وجعتني بزاف و جرحتني ...
اسر : علبالي ... اسمحيلي على كلش واذا غلطت معاك مكانتش بيدي منهار جيتي هنا حبيتك كنت نهينك و نعيط عليك بلعاني باش نكذب المشاعر لي كنت نحس بها قاومت بصح مقدرتش و نهار عرفت قيمتك و شحال نحبك كنت جرحتك و غلطت بزاف كسرتك و وجعتك علبالي و ندمت بزاف علاقتي مع كاميليا كانت علاقة عابرة و مدرتش حساب للي جاي ؛ ايار حابك تسمحيلي و تخلينا نبداو صفحة جديدة حاب نكمل حياتي معاك بصح بصفتك مرتي و يمات ولادي

Ayar ****  

كي سمعت كلامو معرفت نضحك و لا نكمل نبكي عنقتو
ايار : مسامحتك دنيا و اخرة

قررت نمد فرصة لعلاقتنا عييت و انا نتهرب مكانش واحد ميغلطش فدنيا هذه على هذيك سامحته

الليل كامل مقدرتش نرقد و اخيرا بعد فترة طويلة دنيا ضحكتلي و فرحتي كانت كبيرة بزاف

بعد مرور شهر و نصف

مونيا & نور : 3 .... 2 .... 1 ( سوطاو على ايار )
ايار : اععع
مونيا : صباح الخير العروسة تاعنا
نور : انا لوكان ليوم عرسي منرقدش و نتي مزالك راقدة لدوك تسمع روميسة بلي مزال منضتي لدوك مكلاه نقولك واش ديرلك
مونيا : هيا نوضي دوك تلحق الحفافة ونتي مزالك في البونك

نضت ديراكت للدوش دوشت ؛ كيما سمعتو اليوم عرسي راني بزاف فرحانة و متوترة فنفس الوقت في هذه المدة لي جازت جا اسر خطبني درنا خطبة صغيرة بين العائلتين و جا كلش مور بعضه انا حبيت العرس يكون العام الجاي انشاء الله بصح اسر محبش و قرر يكون مور شهر من الخطبة
كملت الدوش لقيت الحفافة جات دارتلي مكياج خفيف و دارتلي شعري حبيت يكون كلشي سامبل هكذا شوية نسمع في صوت الزرنة و الطونوبيلات داخلين قلبي قعد يخبط وحدو دخل اسر عندي سلملي على راسي كان يهبببل 😍 خرجني تحت يد بابا وصلنا للصالة و بدات معاناتي مع التصديرة ههه كنت حابة غير ندير حاجة سامبل بصح ماما و طاطا فريدة محبوش لحق وقت la robe blanche دخلت لبستها وعاونوني البنات فيها منبعد خرجو وانا قعدت نستنا في اسر يجي يخرجني تحل الباب حسبتلي هو بصح كي طلعت راسي .... لقيتو اسامة

ايار : اسامة

قعد ساكت شحال منبعد نطق

اسامة : شحال تمنيت نشوفك ب la robe blanche بصح انا لي نجي نخرجك انا لي نكون راجلك و نكمل حياتي معاك حنا تمنينا و المكتوب حققه لغيرنا ربي يكمللكم انشاءالله يقدر اسر يفرحك و انشاءالله متندميش لي اختارتيه

****** :

راح اسامة عند ايار سلم عليها

اسامة : ربي يهنيكم انشاءالله

ايار دموعها قعدو يهبطو وحدهم غاضها بزاف

ايار : صدقني مكنتش حابة نجرحك ؛ ربي يلاقيك ببنت الحلال

خرج اسامة منعندها و خلاها غارقة في دموعها علبالها بواش راهو يحس دوكا بصح متقدر ديرلو والو ؛ دخل اسر عليها في هذيك الحالة راح عندها

اسر ( يمسحلها في دموعها ) : واش لي بكا عمري
ايار : والو ... كنت نخمم برك بلي راح نخلي عائلتي 
اسر : ارواحي هنا ... شكون قالك راح تخليهم ؛ مراناش رايحين للمريخ واشبيك وقت متتوحشيهم تروحي تشوفيهم مراحش نشدك

شدلها يدها و خرجو المهم لبسلها الخاتم و قطعو القاطو كانو بزاف فرحانين بصح مشافوش نظرات الحقد و الكره حسينة و بنتها رانية لي كانو قدام بعضهم

رانيا : ماشي كنتي تقوليلي اسر لرانيا و رانيا لاسر ؛ ها وعلاش دوكا هاذي **** ولات مرتو
حسينة : ششش راح يكون ليك متخافيش

روميسة كانت تهدر مع ايار بصح ايار كانت تشوف في جيهة اخرى نجمة ايه نجمة جات اليوم للعرس باش تشوف بنتها لي رباتها راحت ايار تمشي بلعقل عندها حتى لحقت عندها سوطات عنقتها و طرطقت بالبكاء و نجمة كيفكيف

يتبع ..... 

هذا هو بارت اليوم انشاءالله يكون عجبكم متنساوش الجام و التعليقات ثم التعليقات نحب نشوف ارائكم في احداث البارت زعما واش راهو يستناهم زعما خلاص راح يعيشوا في سعادة وهناء ههه هذما نشوفوهم فالاجزاء الجاية
ال الملتقى انشاءالله 💜