سلم أمرك لله و إبتسم وإطمئن ، فإن أتاك شيء فهو حتما لك و إن لم يأتك فتأكد أنه لا يناسبك ..ثق بالله دائماً ..
(بعد زواج خالد)
دخلت الصواني الثلاجة وغسلت يدها وصارت تعدد الأشياء الي باقي ماعملتها، رن جوالها وردت عليه بسرعة/ السلام عليكم.. ياهلا والله بالبكاشه..
لبنى بدلع/وعليكم السلام والرحمة.. أنتي ماهتبطلي عادة السلام ذي أول ماتردي.. وحشتيني..
جوري/لا إله إلا الله..ترى السلام لله..وأنتي واحشتني كمان..وينك.
لبنى/سوري حبي لأني ماجيت ،بس الأخ عامل فيها تعبان ولازق لي في البيت.
ضحكت جوري/يا عيني عالشوق وعمايله.. خفي عالرجال شويه حرام عليكي..
لبنى/خليه..ناس ماتجي غير بالعين الحمراء، ماعلينا المهم..كيف الأخبار..
طلعت الحلا من الفرن وحطته عالطاوله/ الحلا وورق العنب جاهز ،وصينية البشميل في الثلاجة..أممممم والسلطات أخر شيئ..
لبنى بقهر/مالت عليهم مايستاهلوا.. ال--
قاطعتها جوري/ههووووو علينا..رجعنا لنفس السيرة.
لبنى/طيب طيب..خلاص ،أنا بجيب معايا كيك ومعجنات.
جوري/لا تجيبي...وصيت مازن عليها ..أنتي شرفينا بطلتك البهيه وبس..ويلااا عطلتيني،السلام عليكم ..
لبنى بضحكه/إن شاء الله حبي،وعليكم السلام..
قفلت منها وخرجت للصالة والكل فيها..
طالعت في مؤيد اللي يرمش لها بدلع، وبضحكه/اللي بعده..أيش تبغى..
حك رأسه بإحراج/ يعني مافي فايده..
ضحكوا عليه ونط قصي لحضنها يبوسها..ضمته بقوة/هلا بشيخ الشباب وزينتهم..
مؤيد/هههعععععع...اللي مافقس من البيضه شيخ وزينتهم..أمال أنا أيه..
جوري بثقة/وسيد الرجال كمان..عندك أعتراض..بعدين أخلص وقول..
ياسمين بتريقه/يبغى حلا..عصافير بطنه بتصوصو..
مازن بضحكه/أمااا..تصوصو مره وحده.
أم خالد/مؤيد بلا شغل بزوره..أخوك وحرمته شويه ويوصلوا وبعدها كل براحتك.
طالعت فيه جوري وهزت رأسها/بااااس،ولك ساعه تبربش لي بعيونك كأنها مساحات سيارة علشان الحلا..مالت عليك أفتكرت عندك سالفه..
مؤيد/علشان تعرفي أني موطماع زي ماتقول الإشاعات..الموووهم بروح أكل..
جوري بتهديد/ياويلك إن عتبت باب المطبخ..تبغى تخرب شغلي كله في دقيقة.. كلها ساعة وأبشر أنت أول واحد بيذوق..
أم خالد/كله منك ..عودتيهم عالتزغيط زي البط..وذحين مو قادر يستنى.
شهق مؤيد/بط!!أنا ينقلي بط..أيش بقيتي للغرب..
ضحكوا عليه وراحت جوري ورمت له جالكسي/مشي حالك بذا للمغرب..وإن عرفت ولا سمعت إنك فكرت تدخل المطبخ هموتك..فاهم.
فتح الجالكسي وأكله بملل/لاتذلينا بحقك الحلا،من حلاته يعني ..بس أنا أحب أشجعك.
شبكت أيديها وحطتها قدامها زي المكرفون وبتمثيل/أحب أشكر كل من شجعني ودعمني في مشواري في عالم الطبخ.. وأخص بالذكر أخويا وصديقي مؤيد اللي لولا الله وثم تشجيعه ليا كنت لازلت ورطانه في صحون الكيك المحروق وصواني الحلا اللي محد بيأكلها غيره..
رماها بعلبة المناديل بضحك/أنقلعي..تتريقي أنتي ووجهك..نسيتي لما كان خالد يفشلك ويتريق عليكي،وأنا الوحيد اللي كان يعبرك ويأكل الحاجات الغريبه اللي بتسميها حلا.
طالعت فيه بحب أخوي/ومن قال أني أتريق ذي الكلمة اللي هلقيها لما أفتتح الكافيه تبعي..وببروز صورتك وأحطها في واجهة المحل..أيش تبغى كمان..
عدل فنيلة الرياضة اللي لابسها بغرور/أحم أحم..تصدقي صورتي ذي بتسوي شغل وتجيب لك البنات زي الرز..كلهم بيجوا علشان يسألوكي من الوسيم ذا..
مازن بتريقه/طيب أيش رأيك تروح تتروش ياوسيم ،لأنك صدعت روسنا بريحتك ذي..
نط عليه مؤيد بنذاله وحضنه بقوة/ياوااد كانت مباراة حماسية.. فاتتك.
وطالع في جوري /يا جبت فيهم هدفين زي الحلاووه.. فاتك بس .
دفه مؤيد بقرف/محلاك ماتجيب أهداف وجوري سنين تدرب فيك..
ياسمين بدلع/ماما أحسن منكم كلكم..
باستها جوري/عسل ياناس..يلاا روحي غيري وغيري لأخوكي..
هزت رأسها وأخذت قصي ..طالعت في أمها/يمه تبغى شيئ قبل ما أروح.
أم خالد/روحي حبيبتي وأرتاحي..مدري ليه تحبي تتعبي نفسك،كنا جبنا العشاء من برا وخلصنا.
جوري بإبتسامة/على أساس إنه مو من برا.. والمشويات اللي طالبينها أيش تكون.. معليش بخلي قصي معاكي شوية.
قلب مازن في القنوات بملل/أنا بآخذه معايا المجلس، وبعدين بأخذه نجيب العشاء .
إبتسمت بإمتنان وراحت غرفتها..
