يقول الحسن البصري : ما من شخص يرى نعمة الله عليه فيقول : الحمد الله الذي بنعمته تتم الصالحات ، إلا أغناه الله وزاده
--------------
وجود الأخ في حياة الفتاة هو حضور لصديق أبدي , و رفيق أول للطفولة و صخرة تستند إليها عندما تكبر.. ربي لا تريني في إخوتي شيئآ يبكيني
(خالد)
8 صباحاً
خالد...خالد..يلا قوم...خالد..
فتح عين وحدة وطالع في ندى جالسه جنبه دف اللحاف واتعدل في جلسته/صباح الخير ندو.
طالعت فيه بإستغراب/صباح الخير حبيبي، متى جيت وليه نايم في غرفة مؤيد ومازن؟
ضمها لصدره بقوة/رجعت متأخر وماحبيت أقلقك وأنتي نايمه..عارفك خوافه قلت أنام هنا.
زادت في ضمتها ليه وبحب/وحشتني دودي..ليه رحت فجأة وماأتصلت،حتى مكالماتي مارديت عليها.
بعدها عنه بشويش وطالع في الساعة وبتصريفه/ مو أرسلت رسالة..يلااا جهزي، ملابسي وفطور علشان مستعجل وورايا مشوار مهم.
ندى/أي مشوار..مو رايح الدوام؟
زفر بضيق/ندى مو وقت تحقيقك ذا خلاص.
باسته في خده وبندم/أسفه حبيبي مو قصدي..عشر دقائق والأكل يجهز.
خرجت وتركته يطالع في أكياس الأكل المرمية عالأرض بإهمال وأتذكر كيف لقي نفسه فجأة قدام بيتهم ومعاه أثنين ساندينه عالباب قبل مايفتحوه بمفتاحه ويسيبوه ويروحوا..دخل وهو يترنح ودايخ وراح جهة مجلس الرجال ودخل غرفة أخوانه واتمدد عالسرير بهدوء وبعد ربع ساعة أخذ دش طويل وحلق وصلى اللي فاته وراح أشترى له عشاء ورجع البيت أتعشى،كان يتصرف بهدوء هو بنفسه أستغربه..طلع بكت الدخان وقعد يدخن وهو يراجع اللي صار معاه ويسب ويشتم في علي وجوري في نفسه"أنا غلطان اللي أتزوجتها من البداية.. كان المفروض أطلقها من زمان مدري ليه أستحملتها.. في البداية كانت بزره وهبلا ،وبعدها وحدة باردة وشايفه نفسها وهيا وحدة يمنية وجاهله ماخلصت حتى الثانوي، لبس زي العالم ماتعرف تلبس.. وفي السرير مافي أسوء منها وماتفهم شيئ.. وطايره بأهلها المجرمين الحووش، وكله كوم وإنها ماتحبني كوم..لااا ياشيخه أنا اللي ميت عليكي،من زينك ولاحلاكي..لولا إن أبويا موصيني عليكي كان من زمان رجعتك لمكانك بس أنتي كنتي حاسه إني مو طايقك من وقت اللي رجعنا فيه بعد زواجنا..خططتي وعرفتي تلعبيها صح ورطتيني بحمل بياسمين وبعدها على طول قصي وعملتي فيها بتضحي وعيالنا وماعيالنا..طيب ياجوري إن مادفعتك الثمن غالي ماأكون خالد..مو أنا اللي أتهدد وأتحبس الحبسه ذيك..وإذا أنتي ماتبغيني مرة فاأنا كارهك مليون مرة وكنت متحملك علشان أمي والعيال بس.. وندى حبيبتي معايا ومو محتاجك..صدقت لطيفه لما قالت ساحرة اليمن..بس الحمدلله ربي شفاني وشفتك على حقيقتك ياحقة صاحب الشال. بسيطة وين هتروحي.. مالك غيري ومصيرك بترجعي ليا غصباً عنك ورح تترجيني وقتها أرجعك لذمتي ،وساعتها هفكر أرجعك ولا لا..
قطعت ندى أفكاره بدخولها ومعاه الفطور /يلااا حبيبي الفطور جاهز..
اتأمل شكلها بالشورت القصير والبدي"أنتي حبي الوحيد واللي سويت كل شيئ علشانك،ومن اليوم مافي غيرك" مسك يدها وبهمس/يستنى الفطور..وحشتيني حبيبتي؟
وقبل ماترد عليه سحبها لحضنه وشالها للسرير
(أبو سند)
الجد صقر(أبو مساعد)،الجدة وديمه (أم مساعد)
10 صباحاً
دخل بيت الشعر وصبح على أبوه وبدر، وبإستغراب/حيا الله بدر..مو بعوايدك تقعد هنا.
بدر بهدوء/مليت لحالي وقلت أسلي جدي صقر..تبيني أروح؟
ووقف علشان يخرج،الجد/أقعد يابدر.. جدك مايقصد.
مسكه أبوسند وجلسه جنبه وبهدوء/ بدر حبيبي ليه تقول كذا..من قال إني ماأبيك بالعكس أستانست يوم تركت غرفتك وجيت تقعد معنا.
بدر بحزن/موبلازم تقول..أنا أحس بابا وبتول مايبوني،أنت أكيد مثلهم..
ضمه أبوسند بحنان/يخسون كلهم اللي مايبونك..أنت الشيخ بدر من يعوفك يالمهبول..
أشر له الجد يجيه ومسك يده وبحزم/لا أسمعك مرة ثانية تقول ذا الحكي الفاضي.. أبوك وأختك وكلنا نحبك ونبيك يابدر..بس أنت تدري إنهم تعبانيين شوي..لزوم نتحملهم لين يرجعوا مثل قبل..
بدر وهو ماسك دموعه/جدي والله أنا أحبهم وأدري إنهم زعلانيين على ماما،أنا بعد زعلان عليها..لكن خلاص لمتى بيظلوا كذا..أنا ما شوفهم ولا أقعد معهم..مليت لحالي ومحد يدري عني.
الجد/أنت اللي غلطان.. ليه تحبس نفسك وتقعد،بس في غرفتك..ليه ماتروح مع عيال عمانك المزرعة وتتسلى معهم..
بدر بعصبية/وش أروح أسوي هناك.. أنت ماشفتهم كل واحد يلعب مع أبوه..حتى مساعد اللي ماعنده أبو عمي راجح على طول معه ومايتركه..كلهم يسوون فرق مع أهلهم في الكورة والسباحة والدبابات حتى الخيل،وأنا لحالي بينهم ليه؟
أتنهد أبو سند بحسرة وهو يدري بكلام بدر إنه صح،الجد بهدوء/بالأول لاتقول مساعد ماعنده أبو صحيح إن عمك صقر الله يرحمه لكن عمك راجح تزوج أمه وهو بعد صغير وهو اللي رباه وربى أخته مريم يعني هو أبوهم الحين..وأنت منت صغير يابدر خلص كبرت وصرت رجال،إذا أبوك أنشغل عنك شوي بسبب الشغل لاتزعل وتكدر خاطرك.. أنت رح له وذكره وقله نبي نسوي مثلهم.. وإذا موبفاضي رح للعيال وألعب معهم ياوليدي.
نزل رأسه وبخيبة/بس أنا أبوي على طول مشغول يا مسافر ومايقعد معاي ويعلمني مثلهم،أنا ماأعرف ألعب زين وأخاف من الخيل بعد..والعيال يدرون علشان كذا صاروا مايختاروني معهم لإني بخسرهم.
الجد/لاحول ولاقوة إلا بالله..طيب ياوليدي خل عنك الحين وربك بيحلها.. رح ناد لي جدتك وديمه.
خرج بدر بصمت وألتفت الجد لولده بعصبية/حسبي الله على العدو كان ولدك ذا صاحي.. هبل بالمسكين.
زفر أبوسند وبضيق/والله يبه عيزت وأنا أكلمه ومافيه فود لاهو ولابنته..كلهم روسهم يابسة.
الجد بغضب/اليابس يتكسر،هذي ماهي بحاله..مهوبأول واحد تموت مرته..درينا إنه يحبها وماقلنا شيئ..مايبي يتزوج ويجيب لهالمساكين مره تضفهم وتدير بالها عليهم وهم ماقلنا شيئ،لكن ينتبه لهم يبوك يشوفهم ويقعد معهم يشوف مابخاطرهم مايصير أتيتموا من الأم ومن الأب مرتن وحدة.
رن جواله وأتردد يرد وأنتبه له الجد وبتساؤل/من داق عليك..ليه ماترد؟
أبوسند/ذي الجوري يبه،الحين بتسمع صوتي وتسوي لي سالفه..وش فيك وليه صوتك كذا؟ مابي أكدرها اللي فيها كافيها،الحين تقفل.
الجد بهدوء/هالبنت ذيبه وحبيتها يامساعد ولو إني ماشفتها..وش صار عليها تطلقت ولا بعد.
أبوسند بضيق/تدري إنها قالت ماتبيني أتدخل ،وأنا أنشغلت مع بتول ،الله يهديك ياسند هالولد وبنته طيروا عقلي ..
أتصل عليها وفك الإسبيكر وبعد رنتين/وعليكم السلام والرحمة..حيا الله الجوري.
جوري بضحكة/الله يحييك ويبقيك.. شلونك يبه..وكيف صحتك.
أبوسند بتنهيدة/زان لونك يابنيتي.. الحمدلله مانشكي باس..أنتي شلونك بشريني عنك وعن أحوالك.
جوري/سلامتك يابعدهم ليه صوتك كذا،تعبان فيك شيئ..
أشر لأبوه بمعنى "ماقلت لك" /مافيني شيئ لاتخافي،بس مشاكل في الشغل.
جوري/يبه الله يهديك كم مرة أقول لك خلاص أتقاعد..بتهلك نفسك في الشغل وبعدها بتتعب ومارح تستفيد شيئ..
أبوسند بإبتسامة/إن شاء الله أنتي لاتحاتين بس، ماقلتي لي وش صار عالمدرسة.
جوري بضحكة/وين البشارة طيب..أسمعك أخبار حلوة كذا بلوشي..
أبوسند/أمري وش تبين وبيجيك وأنا أبوسند.
جوري بخجل/تسلم يبه..والله كنت أمزح معك..المهم أستعد للخبر الأول اللي بينسيك همومك ..أنا وأعوذ بالله من كلمة أنا..نجحت وجبت 97%
أبوسند بضحكة/ألف ألف مبرووووك يابنيتي.. والله ذي النسبة اللي تبيض الوجه.
جوري/الله يبارك في عمرك..ترى أنت أول واحد يدري بعد أمي..حتى عبادي مايدري.
أبوسند/لاااا دام كذا لازم لك هدية مرتبه أجاكر فيها عبدالرحمن.. وش الخبر الثاني إن شاء الله يكون زين مثل الأول.
جوري بهدوء/خلاص صرت حره..طلقني.
أبوسند/صادقه أنتي، متى وشلون بعد ماكان رافض؟
جوري بفخر/الحمدلله ربنا سهل،ماقلت لك علي قدها وبيفكني منه بإذن الله..واهوا ماصار له كم يوم عندي وسواها..
أبوسند/والله موب هين هالعلي.. المهم الحمدلله اللي أفتكيتي منه على خير.. والحين وش بتسوين في حياتك.
أتنهدت وبهدوء/ الله كريم يبه،المهم إنه طلقني وبسافر لأهلي في رمضان وهناك لكل حادثاً حديث..محد يدري غير أخواني، وأمي لسا ماكلمتها،عاد الله يعيني هاللي يجي.
أبوسند/ندمتي ياجوري.
ردت بإندفاع/أبداً..ولارح أندم أبداً بإذن الله، كل الحكاية إنه صعب تشرح وضعك لغيرك بالتفصيل علشان يفهم دوافعك في موضوع معين،وأمي أكيد هتقلق وبالها بينشغل..قلب الأم مهما كان..عموماً بنتك ذيبه وماينخاف عليها وحياتي هعرف أمشيها..هدرس وأشتغل ومارح أحتاج لحد غير رب العالمين.. وبكره تشوف وتقول الذيبه قالت.
ضحك الجد بقوة وإستمتاع من كلامها، جوري بهمس/من ذا اللي يضحك .. لا يكون فاك الإسبيكر يبه.
الجد بهدوء/لاتخافين يالذيبه..هذا أنا ماعرفتيني.
جوري/هلا والله ومرحبا بالصقر.. كيف ماعرفك ياتاج رأسي وهل يخفى القمر ..شلونك ياجد.
الجد/هلا بك زود يالذيبه.. زان لونك يابنيتي.. الحمدلله بخير ونعمه.
جوري/دوم يارب..الله يطول لنا في عمرك ويبارك فيك.. كيف صحتك ياجد عساك بخير.
قفل أبوسند الإسبيكر لما دخلت أمه وسند ماسكها لين جلسها جنب الجد وسلم عليهم.
الجد/صحتي طيبه وزينه الحمدلله..ألف مبرووك..هم وأنزاح يابنيتي..إن شاء الله الله بيعوضك باللي أحسن منه..
شهقت بخوف/لاااا واللي يسلمك ياجدي.. لا تقول كذا..
الجد/يابنيتي المره مالها غير بيتها ورجلها وأنتي،بعدك صغيرة ولازمك رجال يصونك ويعزك وإن شاء الله بيجي اللي يخاف الله فيكي.
جوري/والله ياجد نصيبي وجربته وأخذت منه كفايتي والحمدلله عندي ولدين الله يعوضني فيهم،بعدين أخواني وأنت وأبوي مساعد الله يطول لي في عمركم ومايحرمني منك موجودين أيش أبغى في الرجال خله عند أمه الله يستر عليه.
الجد بضحكة/ومنهو؟
جوري/اللي يكون..المهم لايجيني ولايقرب مني..يالصقر ترى أهرج من جد لاتدعي لي بذي الدعوة مرة ثانية ..والله كود أفتكيت.
المهم ماودك تجي جدة وتنورها مع أبوي مساعد..
الجد/إن شاء الله قريب..يلا يابنيتي طولنا وأشغلناكي معنا.
جوري/لاتقول كذا ياجد..والله فرحت بصوتك..أنتا أنتبه على نفسك وعلى أبوي صوته موعاجبني، وأشوفك على خير ياتاج رأسي..السلام عليكم.
قفل منها وألتفت لسند وللجدة اللي اللقافة بتموتها وتبغى تعرف من يكلم والصقر لف السالفه ودخلهم في سوالف ثانية.
(لطيفه)
6 المغرب
