نسختي الرمادية

حلقة 4

#نسختي_الرمادية 🖤✍ حلقة 4

فاتو أيام
جدي بدي تاعب اكثر من قبل
وعمتي فطوم طلقها راجلها بحكم ديما حرجانة ،، و ولدها ضياء شبه كل يوم عندنا فالملحق مع معتصم اللي يراجي ف وراقيه بش يرجع يسافر ويخدم البرا..
وجي اليوم اللي بنمشي مع بابا لشغله ،، كان عندهم احتفال تكريم خاص بالفن والأدب الليبي 🇱🇾،، معتصم تعارك مع بوي وطلع حرجان من الحوش ميبينيش نمشي بحجة كبرت 🤷‍♀️ امي قعدت على أعصابها وقتلي فوتي متمشيش بس بوي كان بالمرصاد ،، ✋🏻🔥

بوك عزوتك ❤ ودلالك
هو القناص وإنتي الطلقة 👌🏻🔥

هوا حيمهدلك طريقك وحيقتنصلك الفرص ،، وانتي بطلقتك يا تصيبي هدفك يا بتضيعيه ✋🏻💥

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

لبست بنطلون جينز سحابي وسبيدرو أبيض ومالية طويلة بينك ووشاح أبيض ،، نزلت من الدروج لقيت بوي واقف عالمرايا يسكر ف بطمة الجاكة ،، أنيق كعادته والشيب ف شعره وفلحيته المرسومة امي واقفة بحداه تمدله ف ساعته ودبلته قتلي غريبة وتيتي روحك بكري قلتلها خيرك يما ديما أني بكري 😌
تلفتلي بوي وابتسملي وطلعنا ركبنا فالسيارة ومشينا
خشينا لبوابة الإحتفالية بالسيارة ونزلنا قدامنا بساط أحمر ،، سيارتنا كانت من نوع فاخر مسك بيدي بابا ❤ و المكان زحمة نقابة الفنانين والأمن وضيوف من برا البلاد ،، وقتها حسيت ب باور مش عادي 🔥👌🏻
حلو شعور الثقافة وانك تتعرفي على وجوه جديدة وناس تختلف كل الإختلاف عن مكانك وبيئتك ،، من اهني حيبان الفرق وحتنصقل شخصيتك ويزيد مدى إدراكك ووعيك الذاتي..
وكأن بوي فهذاكا الوقت يجهز فيا ويخلي ف ادراكي ينضج قبل وقتي لأسباب لا يعلمها إلا الله
قعمزنا وجي عمي ابراهيم اللي سلم علينا وقالي عندي ليك مفاجأة 😍 قتله ان شاء الله خير .. قالي بعتالي تو نقولك ..
قعدنا نحضرو ف مراسم الإحتفال والتكريم .. الحفلة للأمانة محترمة ولبسهم محترم مفيش تطاول أغلبهم لابسين الزي التقليدي اللي أني نحس فيه ميمشيش فمناسبة زي هكي 🤦‍♀️ المهم
قعدت سارحة كان فيه وفد من إيطاليا مش عارفة علاش انسجمت معاهم😆 معاهم بنت جميلة جمييييلة لدرررجة لا توصف لابسة قفطان أبيض وشعرها أصفر زي الذهب .. و فوسط الحضور نسمع فالمقدم ينادي على اسمي شيراز الهنشيري فلتتفضل
اني قعدت متجمدة قالي بوي وعمي ابراهيم نوضي استلمي تكريمك .. المقدم يقول شيراز الهنشيري
قتله على شني اختاروني سرحت 😂🤷‍♀️ قالولي لأفضل طفلة فنانة صاعدة قتله أها 🙈❤ونضت استلمت شهادتي والكأس🏆 قعدت ماسكة المايك🎤 هديت الكأس🏆 لبابا وعمي إبراهيم قدوتي ونزلت
كملت الإحتفالية واحد من الإعلاميين ماسك باقة ورد🌷🌺 نادى عليا قالي لحظة قتله تفضل مدهالي قتله معليش مفيش لزوم قالي نزعل منك لو ترداها 😅 حسيته يبي يلخبطني خديتها منه وفبالي ان مش حنعطيه وجه حط الكرت متعه فالبطاقة وقالي تبي أي حاجة كلميني تلقيني 24 ساعة
قتله شنو امالا نظام صيدلية 🙄 قعد يضحك وقالي ههههه دمك خفيف
اني 😑 استاذنت منه ومشيت لبابا واقف مع صحابه وعمي ابراهيم
خدينا صورة مع بعض ،، وصورة اني وابراهيم وبوي ،، وصورة اني وبوي بس ❤
قتله شنو يا عمي ابراهيم شن هيا المفاجأة ..؟
شبح عمي ابراهيم لبوي وسكت .. حسيت بشيء غلط
قال بوي خلاص هوا هذاكا البنت كبرت جبتها اليوم معاي مبيتش نحرمها من تكريمها ،، تو نباها تشد فقرايتها وتتخرج
عمي ابراهيم قاله ايه اييه فاهم عليك ربي يحفظها
اني انصدمت زي اللي حد بزع مية نار على وجهي 😰
قالي بوي هيا بنروحو .. قتله دقيقتين
خليت بوي يمشي وجيت وقفت على عمي ابراهيم عالسريع وطلبت نفهم منه
قاللي كنت بندير مسلسل وبنعطيك دور ،، ومنحة دراسية مجانية عندي صاحبي حكيتله عليك فاتح معهد عالي خاص بالفنون والإعلام .. اني دمعتي نزلت قتله بس أني نبي نتخصص هكي .. قالي بوك مسكر راسه وعنده الحق
قتله فشنو يا عمو عنده حق 😭 قاللي انتي قعدة صغيرة متعرفيش كيف عقليتنا احني الليبيين ،، تركيبتنا كلها غلط فغلط عاللي يقرو ف اعلام وعاللي يمتلو وعالإذاعيات 💔 سيورك تكبري وتشوفي بعتالي بعيونك .. نسمع ف بوي ينادي عليا .. ودعت عمي ابراهيم وقتله عندي صديقتي معاي فالمدرسة مبدعة وديما معاي ف اذاعة المدرسة حتعجبك لو حاب تعطيها دوري فالمسلسل.. قالي اماليها يخلوها ؟ قتله ايه .. كتبلي رقمه وقالي شوفيها و ردي عليا قتله حاضر ..
ركبت و طلعنا بالسيارة ف يدي الباقة ،، قعدنا ساكتين طول الطريق .. اني نبكي بدون صوت نئن ونتهند🥺 وبوي كان حاس بيا، قعد يكلم فيا على أجواء الحفلة واني نطّنفر منردش عليه ونبكي🥺💔
سكت وتنهد وكمّل سواقته .. واني سارحة ف أعمدة الأنارة اللي عالطريق ،، قالي انتي قعدة صغيرة شدي فقرايتك،، قتله بس أني نبي نقرا فنون وأعلام
قالي تي خوك بروحه يزن علينا ف كل طلعة ،، مش حتقدري تعيشي ،، بعتالي لما تنشهري والناس تبدا تعرف وجهك حتقعد تقيدلك ف أحوالك ،، قتله مش شرط نطلع ع تلفزيون ،، نكتب ،، نعد برامج ،، رسومات رمضانية ،، رد عليا وقالي الخدمات هادو ميوكلوش عيش✋🏻 قتله المهم ندير اللي نحبه مش كل شيء فلوس🥺 قاللي خلاص .. بنبرة كنت نعرفها ان بوي خلاص مستحيل يتراجع عن قراره ،، درس السيارة ونزلنا .. اني بنمووووت من الوجع بننقهر 💔😞
خشيت لداري حذفت الباقة على طول السرير وتلوحت رقدت ..
فقت مع ال2 فالليل شفت مكالمات من رحمة ورويدة كتبولي محلاك كيف طالعة عالشاشة اليوم ..
بدلت ملابسي وخديت دوش خفيف و غيرت جدول المدرسة ورجعت رقدت تاني😴
مشيت تاني يوم للمدرسة اني ورحمة ورويدة على رجلينا .. ولأن طايرتلي من كل شيء سيبت حتى أذاعة المدرسة كأن نبي نحرم روحي من حلمي نبي نستأصله من مخيلتي معش نبي نعطي لنفسي بصيص أمل لأي شيء 😔 ،، كلمت إزدهار اللي معاي فالإذاعة على موضوع الدور قلتلها أني معش نقدر وانتي نحس فيك متمكنة شن رأيك فرحت هلبااااا قلتلها باهي وأماليك ؟ قتلي عادي يخلوني قلتلها خلاص هاكي الرقم اسمه إبراهيم قوليله اني البنت اللي من طرف شيراز الهنشيري وتو يزبطك .. فرحت ازدهار هلباااااا كانت إنسانة بسيطة جدااااا رغم هلبا بنات يعايرو فيها ديما تلبس ف نفس الجاكيت والسبيدرو الأسود لكن كانت نازكة ونظيفة☺.. و رغم حزني ان خدت مكاني لكن فرحت لما شفتها فرحانة كأن فرحتي أني ❤😞
فجأة تطيح وتجيها دوخة اني انخلعت وناديت رحمة ورويدة قلتلهم شدوها معاي ،، كان صايرلها هبوط معمريش ريتها تفطر فالإستراحة .. خليت رحمة معاها ومشيت اني ورويدة بنشريلها من المقصف
قتلي رويدة :أخت ازدهار الكبيرة تقرا مع بنت عمي وحالتهم ضعيفة تشكي هلباااااا .. قلتلها ي روحي عليها 🥺 مشيت شريتلها كيسة معبية شكاليط وتشبس ومشروب وبرجر .. قعمزتها وقعدت نغصّب عليها لين كلت .. قعدت تتشكر فيا اني والبنات اللي مسيبناهاش بكل لين ردت خطواتها وصحّت ..
روحنا من المدرسة قتلي رحمة هي نخشو للمكتبة نطيرو الكساد😈 قلتلها فووتي فوووتي مخاطريش خليهم اليوم يتميعدو على حسابهم ،، 🥺 قتلي رويدة معش تخممي كل حاجة بقضاء وتدبير الرحمان مرات خيرتك مش فيها.. قلتلها هذا حلمي صعب ننسى اللي خططتله 😭 قتلي رحمة انتي قنينة واغلب المذيعات اللي يطلعو عالتلفزيون يقعدو عوانس .. ولا يتزوجو من اجانب .. مش حرام تقعدي هكي عزباء ومتسمعيش كلمة ماما 😓 قلتلها هذا النصيب والزواج مش كل حاجة قعدو يزنو عليا يبوني نقتنع باش معش نخمم وناكل روحي ،، قداش ما من صحاب تحسيهم لما يشاركوك فوجعك كأن وجعهم هما ✋🏻🔥 يقعدو يدبرولك ف أي حل ويقولو أي سبب بش ترضي .. ومرات متلقيش اختك اللي من رحم أمك وتلقي الأخت اللي جابتهالك الدنيا ورزقاتك بيها ❤👌🏻