نسختي الرمادية

حلقة 26

#نسختي_الرمادية 🖤✍ حلقة 26

و فعز الهدرزة بيناتهم ..
قعد بشير ينادي على معين من برا الحجرة ..
صوته كل منسمعه نحس بالغضب 🔥 بالغل 🔥 بالشفقة على نفسي 💔 ..
نزلت عيوني لوطة وشبحت على جنبي اليمين من تالا الحيط ..
ومعين يقوله هانييي جاي .. طلعوله و قعد بشير يقول لزيد تبي حاجة كلمني يا وخيي .. وزيد يقوله صحيت عز التريس والله .. قاله ان شاء الله لا باس عالعويلة 💔

نسمع فيه ومقهورة 😣 كنت عارفاته يبيني نسمع صوته بلعاني ..

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

طلعو روحو ،، وامي مشت ادير ف دورة بتطلق رجليها ،، قعدت نحاول كيف انوض بش نخش للحمام ..
قعدت انحي ف الخيوط ،، و نكر ف روحي بالسيف .. لين خشيت فتحت الباب وشديت فالحوض ..
نشبح للمرايا ونعيط .. 😰😬 ي نهارك الاحرف
وفوق منها تتجكتري 🤦‍♀️ ؟؟
وجهي اسود وعيوني تحتهم اسوداد غير طبيعي ومنفوخات من البكاء .. فمي متشقق بالقشور .. وشعري حايس ف بعضه ..
سرحت ف روحي لين خداني لوقت وشرذت ..
حسيت بحرارتي مرتفعة .. لقيت روبي الحرير معلقتهولي امي وفوطة مشى نحيت قفطاني وخشيت للدوش فتحت مية سخونة ونضفت جسمي بش نبرد وننشط شوية ..
بصيلات شعري قعدات يوجعو فيا من ترييش معتصم ،، و فقرات رقبتي يحرقو فيا من الضرب،،
ضهري وفخادي وكتافي عليهم اتار زرقة من الطرايح ..
انقهرت على حالي ..💔
شادة الاسفنجة والصابون ،، نحرك على جسمي ونفرك بالشوي لان نتوجع من المكان .. 😣
وكل منحط مية سخونة على فروة شعري تحرق فيا😣..
قعدت نحس بمرار وكبدي دارهة .. لين الدنيا لعبت بيا ♾ ..
طلعت من الحوض واني نزحف وما قمت الفوطة ولفيتها على جسمي لين حسيت اني درت هداكا الانجاز .. ويرقى عليا المرار ونضت نستفرغ ..
الناس تستفرغ بش ترتاح الا اني كل ما استفرغت نزيد نمرض ..
حطيت الفوطة على راسي ولبست روب الدوش ونسكر فالحزام بقلة حيل 💔
فتحت طقة الباب واني نزحف زحف من الألم .. شعري و جسمي مبلول ..
نزحف ونعيط 😭😭 بطني وفم كبدي يحرقو فيا حرقمش طبيعي🔥🔥 معش نقدر نتحمل 😭😭

تلوحت عالأرض واني دايخة وفاشلة ،، ثنيت رجليا وكمشتهم ونقاوم فالألم ونعيط 😣
اااه ااااه ..
ياااااربي صبرني 🥺 خلاص 😭😭
نحس فروحي بنموووت من لوجع 😣😭🔥🔥😭😭 ..
نسمع ف طقة الباب ..
واني متلوحة ..
صوت دكتور معاوية خاش ..
قعد يقوللي شيرااااز😰 شيرااااز
قرب مني ونزل على الارض .. حط راسي على رجليه وقعد يفيق فيا ووجهي بين يديه
اني نبكي ومسكت ايديه الزوز اللي على وجهي ونقوله معش نقدر نتحمل بنموووت 😭😭 اااااه 😭😭
قالي بعيد السوء .. تي خيرك مبلولة وراقدة عالستاك .. حاول يقيمني بش نوقف على رجليا لكن كنت مترنحة ومتشنجة ..
قامني بين ايديه و كيف بيحطني عالسرير مش عارفة كيف حضنته وقعدت نبكي 😭😭 قعمز على حافة السرير واني فحجره ...
يقولي خيرك؟
نقوله تعبت 😭 ..
قلبه يدق متحشم ❤ .. واني حرارة الموت فياااا ..
اندفنت فصدره .. مشى حضني وقعد يهدي فياااا .. عصرني بيديه لين قعدت نتنهد زي الصغار.. 🥺
ناض عدل تقعميزته ونوضني من على حجره وحطني عالسرير.. قالي وين تحسي بالوجع؟
اشرتله بيدي عالمكان .. حط يده وقعد يضغط واني نعيط .. يقوللي وهكي نقوله ايييه يزيد لمكان تاني واني نقوله اااه ايه 😭😭 لين مسكت يده نقوله حول خلاص 😭 ..
قالي لحظة انادي الممرضة تجي معاي ..
مسكته من يده قتله متخلينيش 😭😭 ..
قالي والله ما مخليك .. 👌🏻 غر انادي الممرضة بسس
طلع و اني نخض مع بعض .. وربي الم حاااااد 😭💔
خشو زوز ممرضات وقعدو يعاركو فيا عالدوش ويسألو على امي ..
جت امي وقعدت تجففلي ف شعري بالسشوار وتكشخ عليا تقولي علاش خاشة بروحك ادوشي 😤 .. عن كمية الاحراج ف هديكا اللحظة 🤦‍♀️ ومعاوية طلع بش تضربلي الممرضة يبرة مهديء أسفل ضهري .. لبستني امي شرط وكنتيرا وقفطان .. وقعدت نحمد فالله ونكبّر ف سرّي ..
معاوية مسيبنيش ..
قال لامي الليلة توكتي حندير بالي عليها ..
قعدو يهدرزو ويسأل فيها عليا .. واني المهديء لعب فيا لين نعست 😴 ...
جي فالليل معاوية طق الباب .. قعد ينوض فيا هو وامي عطاني جرعة المضاد فالوريد .. وقعد يتلمس ف خدودي ووجهي وشعري قالي حرارتك نزلت حمد لله ..
قتله حمد لله ..
قالي تحاليلك طلعو ودمك ناقص هلباااا ،، خيرك متاكليش اااه .. هكي امك تخوفي فيها عليك ؟؟
امي تشبحلنا وتقوله ايه يا دكتور كلمها انزل فيها 😑..
قالي راهو هكي بنبدو نتعاملو معاملة تانية .. قيمي صحتك 😌
قتله ان شاء الله .. لكن شن صار فالعملية ؟
قالي خمسة ايام لازم ما تتحمليهم منبيش انحيهالك المرارة لان احتمال تتعالجي بالمضاد وتبري .. لكن لازم ما التغدية تكون سليمة وتشدي حيلك ..
قتله ان شاء الله ..
رن تيليفونه قاللنا نستادن منكم بنرد.. قتله امي تفضل
قعد يتكلم هاه ي ايوب اني عندي حالة لازم ما نتابعها كويس .. اها باااااه .. مفيش حد من الشباب طالع بيجيب قهوة من برا؟؟ تي باهي كيف الرأي راسي بيتفجر 😓 ماشي مااااشي ..
سكر الخط ورده لجيبه .. امي خلتنا ووقفت عالطاولة قتله فيه قهوة فالترمس سخونة نصبلك ؟ قاللها عادي
قعدت امي لاهية ف صبان القهوة .. اما هو خدا كرسي وقعمز بحداي قعد يشبحلي ،، لا اراديا شبحتله و لفت عيوني لوطة 🥺 حطيت يدي على مكان الألم ومركبينلي فيها التغدية.. مشى قعد يساويلي فاللصقة ونحى يدي وحطها على جنبي ..
جتنا امي ومدتله القهوة وبشكوت ..
خداها وقعدو يشربو واني فعالم تاني .. نفكر ف امتحان غدوة اللي حيفوتني حتى هوا ..
ومني منك قاللها مشى حد من عيلتكم للمدرسة ورفع تقرير غياب؟ قتله امي والله ما لهينا ..
قاللها راهو ضروري تبلغو .. وين ف اما مدرسة تقرا ..
قتله امي ف ثانوية كذاااا .... ف قرجي
معاوية: خلاص تو نطلعلكم تقرير طبي .. ابعتزلي رقم الجلوس وتو نكلم قريبتي ف التعليم اديرلها رأي ..
قتله امي صحيت الله يرحم والديك
قاللها انتي زي امي ،، واعتبريني ولدك تبي اي حاجة كلميني ..
قتله بارك الله فيك 😊 ..
ناض وقف وقاللنا نستادن منكم توا .. الصبح تو نمر عليكم قبل ما نروح ..
قتله امي ان شاء الله ☺ ..
نحى الكرسي و قاللها صحيتي عالقهوة جت فوقتها 😅
قتله صحتين والله تستاهل اكتر ..
اني نشبح لامي كيف فرحانة بيه .. ونشبحله كيف يعامل فيها ..
تلفتلي وقالي تصبحو على خير ..
امي: وانت من اهله ..
--
-----
--------
------------
فقت الصبح وخشت الممرضة ودكتور معاوية ..
صبح على امي وصبّح عليا ،، قاللها درتلها التقرير
قتله صحيت يا دكتور ..
الممرضة تعطي فيا ف جرعة المضاد .. يدها زي السم قعدت نغمض ف عيوني .. حطتلي حبوب ف يدي وامي صبتلي طاسة مية .. بلعتهم ..
قالي معاوية .. كولي كويس ..
قتله ان شاء الله ..
قالي .. شن تحسي توا ..
قتله الألم خف عليا ..
قالي اربع ايام علاج مكثف وان شاء الله حيخف ..
بالشفاء يارب
.. وكيف بيطلع .. قاللنا حقا وين رقم الجلوس
قتلي امي حافظتيه؟ .. قلتلها لالا فالحوش..😅
قاللنا امالا شوفو حد يبعتهولكم .. وابعتوهولي ف مسج ولا ع فايبر ..
قتله امي ان شاء الله ..
قعد يكتب ف رقمه وخدا رقم امي سجله .. وقاللنا تبو اي حاجة اتصلو اهو سجلته لان منردش على ارقام غريبة..
--
-----
---------
جت الضهرية قعدو رحمة ورويدة يكلمو فيا على رقم امي ويتباكو .. قالولي بنجوك العشية زيارة
قلتلهم تعالو 😌❤ ..
سكرت الخط .. قتلي امي خيرررك انتي؟
قلتلها خيرني؟
قتلي توا بيشوفهم معتصم بيقعد يعارك و كيف وعلاش جايين اهنايا ؟
قلتلها معتصم مليشي علاقة بيا !! وصحباتي منيش مقاطعتهم وبيجوني .. مش عاجبه يضرب راسه فالحيط .. يما بالله عليك معش تجي معاه ضدي 💔
قتلي منبيش مشاكل اهنايا قدام الناس .. ع الاقل يجوك فالحوش ..
قلتلها تي بارك الله فيهم اللي يدورو فيا وبيلحقوني .. المفروض تفرحي ان فيه ناس تحبني ومدايرتلي قيمة 😔👌🏻 ..
قتلي الله غالب يا بنيتي 😣 ..
لكن دكتور معاوية قداش ما عاجبني ،، ان شاء الله اطيحي ف واحد زيه ..
قعدت نشبحلها ونضحك .. 😁
حط يدها على جبيها و قتلي وعلاش واحد زيه ؟؟ ماهو هو وخلاص .. راك اديري تمرة وتاكلي بش يرجع وجهك احمر و اشحطي روحك خن نعاكسوه ههههه
قلتلها اششيه يمااا خيرك شن جاك 😬 ..
قتلي هذا النسيب ولا بلاش 😍😂 ..
قعدنا نضحكو وأني فبالي معش بنخش ف ولا علاقة ..
--
-----
جي لأمي رقم غريب .. قتلي تعرفيه رقم هذا؟
قلتلها لا .. ردي وخلاص
ردت .. وطلعت ام البنت اللي بيخطبها معتصم
قالتها امي .. اه فتحية اهلين
والله قعدين فالمستشفى ،، تشوفي فالوضع والله ما ملحقة حتى نرقد رويحة ..
وين نندري .. والله ما فبالي الحق ..😤 توا مش يكلمو ف بعض ؟ اكيد سالاته بنتك ..
اني مدخليش هما يخططو برواحهم ..
تي كيف فضانية وبنتي فالعناية بين الحياة والموت 😡 .. ايه قلنا لكن ظروف ومأكدنالكمش احني ..
اهاااا .. ان شاء الله ان شاء الله .. مع السلامة ..
سكرت امي الخط وقريب تتفجر 😤😡
قتلي شن هالعيلة الحرفة .. وحق ربي ما هضمتهم ولا خشولي الخاطر..
قلتلها خيرها شن تخرف ؟؟ 🙄
قتلي خيره مقلتوليش فضانية الرجالة تأجلت وعطيتونا علم مسبق ..
قلتلها بنتي ف العناية .. وهما يكلمو ف بعض اكيد مقايللها امي فالمستشفى ،، بدال ما تحمد وتقول كلمة كويسة .. تلوم وتزعق فالكبد .. 😑
قلتلها شكلهم عيلة الله الله .. يا ودي ولدك لما يتزوج يشد حوشه هو ومرته وامها 👌🏻😤
--
-----
---------
فات الوقت ومع زيارات خوتي وولاد عمي .. والخ..
جت العشية
جوني رويدة ورحمة وامهاتهم معاهم .. قعدو يصورو فيا قالولي بش تقعد دكرى 😂..
رحمة تصور ف يدي بالتغدية : قتلي بش نكدب على فراس لما يزعلني نقوله مريضة فالعناية 🤪
قلتلها الصورة ب عشرة جنيه 😂😂
هدرزنا وغيرولي جوي ..
سلمو عليا وطلعو .. والممرضات البرا يعاركو .. وعياط وصياحات ..
خش معتصم و قال صاحبي دكتور اهنايا قاللنا روحو فيه فايروس منتشر .. اصلا خلاص قعادكم زايد اهنايا .. الدواء وتضربه حتى فالحوش 😒
واني نسمع ومنبيش نشبحله .. عارفاته يبيني نقعد فالحوش عاد الوسواس يخبط .. 🤷‍♀️🤦‍♀️
قالتلها امي ان شاء الله خير .. و زيد يقول عادي تو نكلم اخت حاتم الممرضة تجي تضربلها المضاد ..
لما سمعت باسمه انقهرت 💔
يااااارب سترك .. يااااارب 🤲🏻
قعدو يوتولي ف حاجاتي .. واني لبست عباية ونزلت بالخطوة .. لين ركبت فالسيارة ..
فكرة اني نرجع للحوش بحد داتها طبقتلي خلوقي ..
وصلنا للشارع قلبي انغم 😣💔
خشينا للحوش ..
وووه .. اعوذ بالله 🤦‍♀️
نردد فيها بداخلي ..
دقايق حتى تعبا حوشنا بالزحمة وجتني جداي تبكي وترعش .. قتلي ربي ميغيبك يا بنيتي قلتلها ولا يغيبك يا غالية ❤
جو بدور وتقوى ومنى ومرت عمي رقية .. وعماتي الا سلسبيل ..
خشيت لداري .. اتصلت برويدة هدرزنا ..
خش رقم دكتور معاوية عالانتظار ..
قلتلها سكري سككري خن نشوف الدكتور ..
سكرت عليها و رديت عليه
قال السلام عليكم
قتله عليكم السلام
قالي شيراز؟ قتله ان شاء الله
قالي كيف حالك توا ..
قتله حمد لله .. قالي سالت الممرضات قالولي طلعتو
قتله خوي قال اطلعو وخودي الجرعات فالحوش .. واحد من دكاترة قاله فايروس منتشر اطلعو خير..
قاللي فايروس الصغار بس يتخسسو منه وبعتالي بعيد على قسمك فالمبنى التاني ..
قتله هذا اللي صار 😣
قالي شن اسمه الدكتور هوا 😡 كيف يطلعو دوة زي هكي ..
قتله والله منعرف ..
قالي اسالي خوك على اسمه ولا ملامحه بش نوريه ونتفاهم معاه عالدوة الزايدة اللي يقول فيها 😤
قتله لالا عادي حصل خير 😅 ..
حسيت معتصم هو اللي مكبر الموضوع بش نروح ...