نسختي الرمادية

حلقة 36

#نسختي_الرمادية 🖤✍ حلقة 36

و أني ف فراشي ،، 🥺 قعدت لل3 فالليل ساهرة مش جايني نوم و زيدك زايد 😭 معاوية مكلمنيش راقد بكري من الخدمة ،، الضي مولوع عليا والمذكرة بيدي 💔 ..

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

مش قادرة نبعد فكرة الغيرة من راسي نهائي ،، حتى لو كانت ميتة 💔😤 ..
الواضح إنه كان يحبها بشغف ،، من كلامه عليها 😔💔
هيااا حلوة هلباااا و أطول مني 🥺 و أكبر ...
زعما من يحب أكتر ،، اني ولا هيا .. ؟؟
زعما نساها ولا قعدة ف راسه ؟؟
💔💔
تي هما مسميين حتى اسامي صغارهم .. سيلين و إياد

😭😭😭😭😭

نااااار ف قلبي نااااار 😭💔 ..
قعدت نقرا ف مسجاته .. ونقارن ف كلامه ليا .. و ندقق ف ملامحه على صور خطوبتنا وفيديواتنا ... وجهه بشوش وفرحان .. بسس كان يسرح شوي 😤 زعما على خاطر تفكر صاحبته المتوفية !!؟😭😭

وفات الليل وأني خيالي يرفع ويجيب فيا ومقدرتش نرقد ... نتضايق نطلع للصالة ندور ونزربز .. وامي تنوض مخلوعة تحسابه جتني الحالة ..🤦‍♀️

نضت صليت ركعتين وقريت مصحف لين حسيت بالراحة 😌❤

و رجعت لفراشي نخمم من جديد .. فكرت نواجهه ونفتحله الموضوع ونقوله جتني مذكرتك بالغلط بش يحكيلي علاها 🙃 لكن هو لو يبي كان حكالي من الأول 😤.. واني نقول لما سألته على ماضيه قالي سكريه الموضوع 🤔 ..

والنبي ياسر شيراز .. البنت ماتت الله يرحمها وكبري عقلك .. المهم هو يحبك توا ومش مقصّر معاك .. خلاص .. كان ميبيش يحكيلك هادي حاجة تخصه 😑 ..

،،
،،
وفعلا 👌🏻

كلمت اخته تاني يوم وقلتلها بنخطم عليك واني مروحة من الجامعة بنعطيك مدكرة معاوية جبتيهالي بالغلط وردي بالك تقوليله ... قتلي تم ..

مشيت للجامعة وبحكم مشروع .. بنديره مع رحمة ورويدة .. قعدنا نتناقشو فالموضوع اللي مختارينه ..

كملت قرايا .. طلعت لدعاء وخطمت عليها ف مركز التجميل اللي تخدم فيه ..
ضيفتني قهوة وقعدنا نهدرزو ..
مشى مديتهالها ..
لما شبحتها ملامحها تغيرو ؟؟
اني حسيت بيها .. سكتت
قالتلي .. اه اييه ايه 😅 ..
قلتلها .. معاوية محكاليش عليها هلباااا ..
قالتلي .. مني ؟
قلتلها نواال 🙄 ..
اهي مذكرتها محتفظ بيها معاوية💔
قالتلي.. الله يرحمها ..
قلتلها .. من شنو توفت.؟
قالتلي.. بحادث سيارة
قلتلها .. كم ليها متوفية ؟
قالتلي.. امممم تمانية سنين هكي ..
اني قعدت نعد فالسنة اللي تلاقيت فيها مع معاوية ... اممم تلاقينا فالمستشفى من أربع سنين.. يعني نوال متوفية من أربع سنين لما لقاني أول مرة .. 🤔

نسمع ف دعاء تقولي .. شيرااااز .. شيرااااز
قلتلها نعم ..
قالتلي .. وين سرحتي ..
قلتلها .. تعب القرايا واخدني الحق..
قالتلي.. متحطي ف بالك شيء .. خوي يحبك ويبيك .. ومفيش انسان مكانش عنده ماضي ..
قلتلها.. و الله نعرف .. لكن انتي بنت واكيد فاهمة شعوري ..
قالتلي.. ايه اكيد .. خلاص طلعيه الموضوع من راسك ..
قلتلها .. باهي هو كان خاطبها ؟؟ وكيف تعرف عليها ..
قعدت تضحك عليا .. قالتلي لا بس العيلة كلها تندري ان يبيها وان ناويها بالحلال .. كان يراجي فيها تتخرج لان بوها يبيها تكمل الطب ..
قلتلها صار حتى هي دكتورة زيه .. يعني اكيد متعرف عليها فالجامعة 😤
قالتلي.. استنتاجك صحيح 😂 هو مزال يتخرج سنتين هي خشت فالسنة الأولى .. كانت حبه الأول ..
قلتلها .. باهي آخر سؤال 🥺
قالتلي .. لا عادي خودي راحتك ..
قلتلها .. لما توفت شن دار وكيف كانت ردة فعله 💔..
قالتلي.. معش تفكريني بهدوكا السنين .. قولي شن اللي مداراش 😔💔 كسّر حوشه والجبس كله اللي مختارينه بذوق بعض .. وياما تعب ومعش ياكل .. ونفسيته صفرررر .. امي حاولت تخطبله لكنه رفض وقال معش نبي نتزوج بكككل .. ومنها لين جي حكالنا عليك .. تعرفي فرحنااااا وأمي قريب طارت من الفرحة .. والحمد لله نصيبه فيك ..
قلتلها .. نحبه يا دعاء نحبه 🥺
قالتلي .. حتى هو يحبك ❤😘 خلاص معش تخممي..
قلتلها .. هو هذا .. صحيتي تعبتك معاي .. و زي ماقتلك ما تقوليله شيء واني مش حنقوله شيء ..
قالتلي .. هكي زينة العقل وخير ما اديري .. ان شاء الله ربي يوفقك ف مشروعك ونفرحو بيكم عن قريب..
قلتلها .. ان شاء الله ..
...
...
طلعت منها وطول الطريق واني نتخايل ف شكلها وكلامهم كيف كان مع بعض وحبهم .. 🥺💔