نسختي الرمادية

حلقة 21

#نسختي_الرمادية 🖤✍ حلقة 21
نزلت من الباص والحوش نشبح فيه مقبرتي 💔
خشيت لقيت معتصم مقعمز يتغدا وامي تقول لزيد زود كول ،، وهو يقوللها معنديش نية ووجهه ميتفسرش..
قاله معتصم : خيرك شن صاير معاك ..
هز زيد براسه وقاله متدروخ وتاعب من الخدمة ..
اني دمعو عيوني وركبت لداري طول ،، شن درت يا ربي 😭😭 نحس فروحي بنتقطع بنمووت ،، 🥺

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

نحيت ملابسي وبدلت ،، متجرأتش ننزل للصالة ..
نسمع ف امي اتنادي عليا .
تقولي تعالي تغدي .. وقفت على حاشية الدرج وقلتلها مخاطريش .. نسمع ف معتصم طلع ..
رجعت لداري وتغطيت بالشرشاف ..
غمضت عيوني واني نتخيل ف بشير ..
زعما واكل همي وخايف عليا ؟؟ 🥺 زعما حيديرلي حل 💔
نسمع فالباب انفتح ،، قلت اكيد امي بتنق عليا بش نتغدا قلتلها يما مخاطريش ..
قالي تعاليلي جاي ..
اني نسمع ف صوت زيد ونرعش 😭💔
قعدت نساوي ف روحي عالسرير وعيوني لوطة ..
قالي هي أني نسمع فيك ،، احكي 😡 هذا منو ،،
قتله خلاص 😭 معش نعاودها .. قالي قتلك احكي .. طلع من جيبه تيليفوني وقالي افتحيه قدامي الجهاز ..😡 ..
قتله مش حنفتحه ..
قالي متخلينيش ننزل وانادي معتصم .. قتلك افتحيه 😤..
قتله .. علاش بتقوله 😭.. خلاص والله معاد يتكرر ..
واني ف راسي خلاص بنعتذر من بشير وبنقطع علاقتنا .. رضى خوي نكسبه ولا نخسره بسبب حبي❤..
قالي .. قتلك افتحي دينمه الجهاز 😡.. خير ما انادي على امك وننزل لمعتصم يدبحك 😡💔💔 اكيد مدايرة العار فسطه ولاه 😡 افتحيه..
قتله .. مش مدايرة شيء 😭😭 خلاص تبيه خوده 😭
قعد يضرب فيا على راسي واني نعيط لين خشت امي ..
قتله خيركم .. اني نشبحلها قلتلها مافيه شيء .. اما هو حرش فيا امي وامي حطت يديها على راسها😰 ..
قعدت تترجا فيه بش ميقولش لمعتصم .. اما هو سكر راسه ..
نزلت لتحت رجليه واني نترجا فيه ،، قتله نوعدك اول مرة وآخر مرة ..😭
قالي من قال اول مرة من قاااااال .. اكيد معتصم شاد عليك حاجات قبل ف هذا علاش شادها فجرتك .. واني اللي نتعارك معاه ونقول اختي الكويسة والعاقلة.. 😡 لكن طلعتي خامرة امسخة خفيفة ..
قتله والله اول مرة 😭😭 قعد يدف فيا برجليه ونزل بينادي على معتصم ..
واني ف اللحظة هاديكا كرهته 💔 رغم اني محتاجلته ،، ومحتاجة سماحه .. بس انفضني ،، 😔💔
ف سبة غلطتي الوحيدة طلعني بنت مننفعش ،، و حسبلي مواقف قديمة ملياش علاقة بيها ..
لحقته وقتله بالله عليك متقولاش .. حيبطلني من قرايتي ..
قالي اقعدي زي الكلبة فالحوش ،، مصيرك الكوجينة انتي 😡.. وينادي .. يا معتصمممم .. معتصممم
قتله خلاص تو نفتحهولك .. خلاااااص 😭
قالي تو اناديه و تفتحيه قدامه ...
خش معتصم يجري قاله خيرك ..
زيد: زود قوللها تفتحه تيليفونها ..
شدني معتصم من شعري واني نبكي قالي شن امدايرة 😡
اني نشبح لزيد ونحس انها النهاية .. علاش يا زيد درت فيا هكي علاااااش ،، مش وعدتك معش انعاودها🥺 !!
خديت الجهاز وفتحتله الرمو وطول فكه مني معتصم خش ع ايميلي يفتش وخش على كل حاجة ..
قاله مافيه شيء ..
زيد استغرب .. وقعد يشوفلي اما اني نزلت راسي لوطة .. لالا مستحيل حتنتهي هكي اكيد وراها صدمة تانية 😭😭
معتصم: فهمني انت شن لقيتها ادير ..
زيد: لقيت رقم متصل بيها .. ورديت عليه لقيته ولد ..
شدنب معتثم من ودني .. قالي تعرفيه ؟
قتله لا.. غالط وشدها اتصالات ف جرتي وقعدت نرد عليه نقوله معش تتصل 😰😭
واني مستغربة ان ملقو شيء ف ايميلي .. من اللي مسح محادتتي واضافتي لبشير .. زعما خش ع ايميلي بحكم يعرف رمزي ؟
قعد زيد يفتش ف حساب الفيس ملقى شيء ..
اني خليتهم ومشيت .. شدني معتصم قالي وين ماشية 😡..
قتله انعم 🥺
سكر زيد جهازي ورده ف جيبه ..
قالي بري لدارك .. و الجديد نلقاك تردي على رقم غريب الا ما نقتلك اني مش معتصم..
معتصم جي بيضربني مسكه .. قالي معش فيه تيليفونات ..
قلتلهم معش نبيهم اني 😭😭 و مشيت نجري ..
ااااه ي ربي ااااه 😭😭
مصاريني قريب حطيتهم .. نراجي امتى بتجي المدرسة بش نكلم بشير غدوة ..
فات اليوم كله فالنكد .. لا قادرة ناكل لا نرقد .. شادتها بكاء وراقيلي من زيد ..
معتصم دارلي قرارات جديدة ... معش فيه حوش جداي فترة هادي .. ومعش فيه سهر .. وتيليفون ممنوع ... ومدرسة بيغيبني يومين ..