نسختي الرمادية

حلقة 18

#نسختي_الرمادية 🖤✍ حلقة 18

حلقة اضافية بسبب تقصيري الفترة الاخيرة ..
سامحوني .. نحبكم ونحب كلامكم 😘😘 ديرو لايك قبل متقرو..

خش عليا معتصم اني هرب عليا الضيء
نشوف ف ملامحه متنرفزة وقلت شكله سمعني نتكلم 💔😭

°°° ••••••☆▪K▪h▪o▪L▪o▪d▪☆•••••• °°°

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

اني سكرت الخط فوجه بشير ،، وقعدت نرعش ووجهي أحمر ؛؛ قعد يشوفلي معتصم وقالي اهو بنزيد انبهك مرة تانية نلقاك مكلمتيهم الا متشبحي وجهي التاني ،، 😡
واني ف خاطري حتى امي معش نكلمها غر اطلقني ف حالي بسس 😭🤷‍♀️
قعد يرن تيليفوني وبشير هو اللي يتصل ،، معاش عرفت كيف حندير ،، معتصم يشبحلي قلت كان منردش حيشك ،، قالي من اللي يتصل
قتله خالتي ،، سكرت بالحمراء وع اساس نكلم ف خالتي ،، واني نهدرز ف روحي وندير ف محادثة وهمية .. والله بخير حمد لله يا خالتي ،، اييه ايييه غر تغطية شوره عندك ضعيفة ف هذا علاش تسكر الخط امبكري 😰 اييه ايييه باهي حمد لله كويسين وبخير ..
قعد معتصم واقف يشبحلي لين طلع ،، واني طلع من فمي هواء سخون ااااااه 😌🔥الحمد لله ربي انقذني ..
فالجديد سماعات يا شيراز دبري 👌🏻😂

عاودلي بشير ،، قتله لحظة لين خوني يرقدو ونكلمك قالي باهي ..
نزلت درت دورة خديت حاجة حلوة ،، وركبت يكرت داري وحطيت السماعات واتصلت بيه ❤
سكر عليا وعاودلي ..
حكيتله عالموقف قالي ردي بالك ديري احتياطاتك منبيش خوتك ياخدو عليك فكرة غلط ..
قتله افرض يوم حد من خوتي مسطني نكلم فيك شن حتكون ردة فعلك ،،؟
قالي انتي ردي بالك بالله عليك مش ناقص خلايع
قتله مهما حندير بالي سيوره حننكشف ،، بس انت شن حتدير ...؟؟!!!
قعد يتنهد 😔 قالي مش وقته الكلام هوا ي شيراز
تشوفي فيا حاصل ف تونس ،، ويدورو علينا ومفرمطين فينا ان منبوش النظام ..
قتله : بس اني يهمني نعرف ،، لان لو بترخي بيا مش حنستمر معاك 😒
قالي توا وقته لكلام هوا ...؟؟
قتله ايه وقته 😤
قاللي : سؤالك حرجني هلبااااا ،، والمفروض اني اللي نفتحهولك مش انتي ،، مش حنكدب عليك اني حاليا مش فبابه الزواج ومش مكون مستقبلي ،، انتي ديري بالك ما بين ربي فرج ..
قتله وضحلي
قعدت معششة فيه لين قالي توا احني علاش نسبقو فالاحداث وقت يصير شيء تو نعرف شن نتصرف
قتله ماهو قوللي من توا شن حتتصرف 🤨
قالي واااااك واااااك خيرك هكي ..
تعاركنا وسكرت عليه ،،
واني ف خاطري مفروض يقوللي اقل شيء نجي نعطي فيك كلمة ويثبتلي ان يحبني بجديات ..
دمعو عيوني ،، وحسيت كان اللي نحلم بيه يتفركش ومش نفس ما اني مخططتله ..
وكيف بنستسلم للنوم عاودلي بشير تاني 📱
قتله هاه شنوو
قالي مهنتيش عليا ترقدي وانتي زعلانة قلت نرضيك ونرقد ❤ ومحاولة بسيطة زي هادي خلتني ننسى كل شيء ،، ولأني حبيته مستعدة نراجيه لآخر عمري بش يكون روحه ونوقف معاه..
قعد يقوللي ف شعر واني نسجله ،، فرحانة بقصايده وأبياته ..
قتله حلوو الكلام اللي تقول فيه ،، قتله ليش مديرش صفحة وتنزل اقتباساتك بصوتك ع الاقل تدعم موهبتك ،، قالي ياريت لكن قصة الصفحة وتجميع المتابعين .. قتله ساهلة عندي صفحة فيها 80 الف متابع ديما انزل فيها ف خواطر ونكت وعندي كروت للاعلانات الممولة من خدمة بابا قاعدات .. امتى ميفتحولنا النت ابعتلي تسجيلك وتو نخدمهولك ونروجلك ..
قالي اياح عاااااادي ،، علاش اتعبي ف روحك .. اني هكي من الكساد نحب نألف الشعر ومش فبالي ان نشاركه ،، هذا يبيله واحد فاضي يكون مقعمز عالنت .. قتله بالعكس بالشوي حتنشهر ومرات يبدالك حتى مكسب وبزنس .. قعدت نقنع فيه لين وافق .. حسيت روحي نشجع ف روحي اني بحكم نحب الجو اهوا ،، نحب الاداعة والصوتيات والشهرة ..
سكرت منه ونضت وقفت عالمرايا ،، خدودي حمر ❤ انزيمات الحب بدت تلعب فيا وحاسة بأنوثتي طاغية ،،
--
-----
----------
فاتو أيام ،، الدنيا صيف ،، والضي يهرب بكثرة ،، والنيتو يضرب ف المواقع القريبة مننا
قداش ما زعلت لما قصف النيتو مبنى الاذاعة اللي كان يخدم فيه بوي 💔😭 ذكرياتي كلها غادي 😔
كان بشير معاي اول بأول ساندني وسانداته ،، نعبي ف رصيد ونكلم فيه برقمه التونسي ومنحسبش فيها معاه ..
قداش ما كان متحشم ويقوللي سكري تو نعبي .. نقوله انت متغرب الرصيد خليه عليا اني ،، من وين حتلقى بعتالي ع الاقل اصرف بالفلوس ع روحك انت وولد عمك ..
قداش ما كبرت ف عينه وقداش ما تعلقت بيه ..
وقعدت كل يوم واني نقوله تعبت يا بشير نبيك تروح 💔 لامتى حنقعدو مستاحشين بعض زي توا ..
يقولي هانت هااااانت قريب
نقوله امتى ،،!!! قولي ع تاريخ معين 😭
يقوللي هانت يا عسل 😔 والله ما معروف لكن هانت
نقوله مستاحشاتك ،، يقولي حتى ني مستاحشك
قتله بشير ..🥺
قالي نعم ..
قتله معش يساعدني راهو .. اني م الاخير
حسيته زعل .. وبنرة حزن قالي م الاخير شنو ؟؟
قتله من الاخير نحبك ❤
قالي شنو مسمعتش 😍
قتله بمكر .. شيء 😏
قالي غر قولاها بالله عليك
قتله انلا ❤
قعد يتجدا فيا واني نرد فيه ونرفضله ف طلبه ..
لين زعل وقالي براحتك ..
قتله اكيد براحتي .. تعرف علاش 😒
قالي علاش 😔
قتله لأني نحبك ❤
من الفرحة قعد يكبر ويعيط .. يقول باعلى صوت الله اكبر ،، الله اكبر 😍😍 واخيرا قالتها
قالي واني نموت فيك يا بنت ،، نحببببببببك 😍😍