نسختي الرمادية

حلقة 12

#نسختي_الرمادية 🖤✍ حلقة 12

بودّي نحتفظ بيك طول عمري ،، ومهما يكونو ظروفك أو حتى عيوبك أني مستعدة نرضى بيك عن قناعة 👌🏻❤ إنت توا قدّامي ،، بس مش عارفة علاش نخاف😣
نخاف نوصلو لنقطة النهاية ومتديرش موقف لحبنا اللي مستحيل ننكروه ،، لعلاقتنا اللي قعدة مبدتش أساسا ،، لقلبي اللي تعلّق بيك من اول ما شافك 🥺
مقعمزة عالحافة ونتأمل ف ميناء مارينا من بعيد ،، نحس فالمسافة تقرب هلبااااااا 😣💔

الكاتبة|:- 💜 خ ـــلـــود شــــــــــلابـــــي 💜

👑🎶Kd Sha La Bi🎶👑

معش نندري على حد ،، لا على امي لا على بوي ولا على نساوين عمامي وبناتهم .. خليتهم يهيجو وياخدو راحتهم ،، أما اني ف يدي الرسمة ومعاذ مقابلني نتأمل ف ملامحه وكأني نبي نشبع منه قبل منروح 🥺❤
قعدت فصراع بيني وبين نفسي ،، بعتالي قلت لااااا ،، هو يشبحلك ومن بكري يبي يكلمك ف اكيد حيدير موقف أكيييييييد 👌🏻🔥
غمضت عيوني و عصرت قبضتي عالرسمة وف خيالي حيدير معاذ لقطة بش يوصل فيا اني متأكدة 😍😌
وصلنا للميناء والناس كلها وقفت بش تستعد للنزول ،، واني ف خاطري نقول هادي هيا اللحظة المنتظرة
this is it 😍🙏👍🏻 Here we go 😘
نشبح ف هشام نازل من مؤخرة السفينة ويكلم ف معاذ اللي قعد يشبحلي ويبتسم ،، حك لحيته ونزل راسه ،،
نزلت اني وامي وبوي وكوثر،، ولحقو علينا بنات عمي وسهام بعد ما نزلو من مؤخرة السفينة حتى هما ..
أني معش نفكر ف حد ،، لا في شن دارو ولا شن فاتني ،، نفكر فلحظتي المنتظرة ،،،
نزلنا عالرصيف والليبيين كل واحد بيطلع ناحية البركيدجو ،، سبقنا بابا بش يولع السيارة وباقي العيلة وراه ،، اما اني طلب مني نجيبله مية مصقعة ..
فرحت وانتهزت الفرصة بش نقعد واقفة بروحي ،،
قربت من المجمع وقعدت نمشي بجكترا وأني من داخلي بنموت نشبح من تحت لتحت ،، قابلني معاذ وصحابه واقفين ،، خشيت للكافي شريت مية وقعدت نتحرك يمين يسار وهوا يشبح فيا ،، طلعت وقفت وقعدت ندير ف روحي مش مدورة 🙃 نبيه يفهم أني بروحي ،، بس هوا شيء قعد واقف زي راس السطل 🤦‍♀️😣
طلعت نتسبل و مشيت ناحية ماكينة حلوى الصوف والفشار ،، وقعدت نخفف ف مشيتي وأني ف بالي ك كل مرة حيقعد يلحق فيا وحيجيني ويعطيني رقمه ،، 😍
وقفت عالماكينة كلمت الراجل ،، و قعدت نستنى قريب دقيقتين بش يمدلي حلوى الصوف ،، 😅
خديتها وتلفتت وقعدت نمشي ببطء ،، وف خاطري هيااااااا وينك 😘
خطمت من بحداهم قعد يشبحلي ويمسد ف اطراف شعره ويبتسملي ،، باهي هياااا دير لقطة ،، 😁

---------
-----------------
اهو نمشي بالشوية وع اقل من مهلي ، و بروحي 🥺 !!
اهو اني توا قريبة منك و لو ملحقتنيش حتضيع علينا فرصة ان حنتلاقو من جديد!! 💔
وينك معاذ ؟؟!! قصدك حركاتك و رسمتك ليا ،، كان كله شيء عابر 😭 ؟!!!
قصدك لما تمت الرحلة ،، تم معاها كل شيء؟؟!! 😭
قعدت نمشي ونقدم و من داخلي قلبي بيتقطع 😭😭 مش قادرة نعطيه بالضهر نبي نتشجع ونتلفت ونقوله نبيك ف كلمتين ،، تلعثمت فالطريق ،، وخطواتي بدت مهدودة 💔😣
نزلو مني دموع خيبة 🥺 دموووووع قهر
الرسمة اللي كنت متخيلتها ف بالي مكانتش نفسها اللي عالواقع 💔😭
المرة هادي خديت درس عظيم ،، إن مش كل من عيشك لحظات من الجنة معناته حيكمل معاك للآخر ،،،،،،
خنقتني العبرة وبكيت 😭😭
فتحت وحدة من شيشات المية وبلبلت وجهي ،، مسحت دموعي فوشاحي وطلعت للبركيدجو وركبت فالسيارة ،،
الطريق طوووووويلة هلباااااااا ،،،
وكل مطب نمرو عليه ،، كأن يمر على قلبي
نحس ف روحي بنستفرغ ،، نحس كأني كنت ف حلم وفيقوني منه ،،
يا ريتني ما جيت للرحلة 😭 ياريتني ما شفتك يا معاذ 😭
الصبح كنت متضايقة من الجية ومن التعرقيل ،،
بس شوفتك خلتني نحمد ربي ان تأجل كل شيء على خاطر شوفتك ،،🔥👌🏻
بس انت صدمتني 💔😣
يا ريتك قعدت ذكرى حلوة من بوسعيد ومجابتناش الأقدار تاني وتلاقينا فجربة 💔😭😣
حطينا عيلة عمي ،، وهادي سهام كل دقيقة صوت رنة المسج،، والتيليفون ف يدها تكتب ،،
خشينا سلمنا على جداي ،، قلت لبوي روح بينا تاعبة وبنرقد ..
قالي باهي ،، كان حتى هوا ناعس ،، اما عمي مفتاح قاللنا بنروحو غدوة الصبح لليبيا 🇱🇾
قربت من جداي و حضنتها بالقوة قتلي خيرهم عيونك ،، قلتلها من التعب ساهرة ومش راقدة كويس
قتلي بري ارتاحي يا بنتي ..
خشيت بناخد ملابسي ودجاكتي من البنات
لقيت سهام متكية على بطنها وتهدرز بالسماعات تقول احني مأجرين جيهة الحومة فالسوق القديم ..
شبحتني انخلعت وقعدت تهدرز بصوت أوطأ ،،
اني معبرتهاش عارفتها تكلم ف شباب ،، 😒 خديت حاجاتي بعد ما سلبوهم ورديتلها شخشيرها من شعري
وطلعت فالسيارة ...
مقعمزة متدروخة ،، متكسرة ،، مصدومة
كنت ف شيء ،، ولقيت روحي فشيء تاني
الطريق والوقت بطططططييييييييئين لدرجة حسيت روحي كأني مدايرة اثم وبنتعاقب عليه 🥺💔
دوبك ما وصلنا للفندق واني دموعي مرة مررة ينزلو
نتخايل ف معاذ يتبع فيا بالسيارة بش يزبط مكاني ويجيني ..
قعدت نتلفت وراي ونشبح للأشخاص اللي بداخل مرش السيارة لعلي نلقاه ب داخل وحدة منهم .. بس صفعة الخدلان شبعت من وجهي اليوم 💔😭
ركبت ورجليا بيطيحو كنت نمرد مريد لين خشيت للحجرة وتلوحت على سريري بكيت وبكييييت 😭
حطيت يدي على قلبي وقلتله 👈❤
مش ليك هواااا ،، مش ليك 🥺
قعد غالبني الأرق ،، والنعاس
نضت دوشت بش نهدأ ،، وقلت الخيرة فيما اختاره الله
رغم موقفي الصعب ،، بس ديما إيماني ب ربي ميهزاشي ولا موقف 🙏🔥
كنت نبكي ساعة و نرجع بعدها أقوا لساعات 👌🏻
طلعت بالروب صليت الضهر وفتحت مصحفي قريت شوي صفحات وسكرته .. نحيت الروب ولبست بيجامة ورقدت 😴
اليوم هذاكا ولا وحدة من بنات عمي اتصلت ،،
نضت بعد المغرب ضربني الإكتئاب قعدت مقعمزة عالسرير متغطية ونتفرج في فيلم عالشاشة المعلقة ..
بحداي تشبس وشكلاتة وجيلاطي سطل صغير ..
ناكل ونتفرج ،، بش انخفف الوجع اللي بداخلي ..
تم الفيلم وتم معاه كل شيء،،
حاولت نرقد لكن سيناريو اليوم مقدرتش ننساه ..
كل ما نبي نتناسى ،، نتفكر معاذ ويخطر عالبال ،،،!!
و كل ما نسكر عيوني تجي صورته قدامي 🥺 قعد راسي صدااااع حاااااد ،،
فتحت القجر خديت قريب اربع حبوب مهديء
و طلعت مع الفجر كان الجو مصقع ،، قعدت مقعمزة فالبلكونة نتأمل فالسماء السوداء ،، خيوط الفجر يبانو ..
الهدوء طاغي وليه هيبته ،، اتكيت عالحيط و ارتميت بين أحضانه ،، دقايق تفوووت وتفووووت حتى حسيت بدواااااار شديد و غلبني النوم 😴
،،
،،
فقت ومش عارفة حتى كيف رقدت ،، نحس ف جنابي بيطربقو 💔
حاولت نزحف لكن حاسة بشلل .. خفت 😰😱
قعدت نعيط ماااااماااا .. مااااااماااااا 😭😭
مسمعتنيش ..
قعدت نقول ياااا ربييي ... يا ربيييي 😭😭 ونحس بدوخة وحرارة وجتني رعشة قعدت نخض مع بعضي 😰
،،
،،
فقت لقيتهم قايميني عالسرير المتحرك وبيركبوني للإسعاف ،، امي تعيط وبوي وجهه أسود زي ظلام الليل ..
مررة مررررة يهرب عليا النفس ونقعد نخض مع بعضي نبي الهواء فيحطولي جهاز التنفس .. لكن بلغم ف صدري "مخاط" كان كثيف ويخنق فيا ..
نسمع ف صفارة سيارة الإسعاف وهي تجري بأقصى سرعتها .. نشبح ف شريط حياتي يمر بين عيوني و كل ما استصعب عليا النفس نحس بالموت قريب مني.. 💔
حسيت بفقدان التوازن ،، واغمى عليا
،
،
،
،
،
،
فقت وجميع الأسلاك ف صدري وصوابع يديا .. نسمع ف جهاز القلب يدير ف صوت .. حركت راسي بهدوء وقعدت نتأمل عالشاشة و ف نبضي اللي يتحرك ،،
صداع شديد ،، وصدري يحرررق ،، وكحة لدرجة مش قادرة نتنفس ..
نسمع ف جهاز الانذار ،، والدكاترة يخشولي يتجارو وأني نتخبط عالسرير ،، كان النفس هارب عليا .. 😭💔
دارولي جهاز لين رجع تنفسي تدريجيا ..
خشت امي وقعدت تحمدلي بالسلامة ..
قلتلها بابا وين ؟؟
قتلي مشى بيدير اجراءات وبيجي..
قلتلها ساعة كم ..؟
قتلي قريب ال12
قلتلها هذا كله فات وأني منندري على شيء ؟؟ 🥺
اتصلت امي ب يابا اللي بشراته وقاللها نكمل الاوراق ونجي للمصحة ...
خش بابا وقعد يحمدلي بالسلامة ،، وكان وجهه ميتفسرش .. خايف عليا لدرجة المووووت 👌🏻🔥
قعدت خمسة أيام ،، نضرب فالمضادات وبجهاز التنفس لين تحسن صدري ،،
مالك و زيد كل دقيقة يتصلو بيا .. وكلموني باقي لعويلة .. و معتصم كلمني حتى هوا ..