نسختي الرمادية

حلقة 23

#نسختي_الرمادية 🖤✍ حلقة 23

بديت وحيدة فالثانوية .. مقعمزة بروحي ،، ونتمشى فالاستراحة بروحي 😌💜 بعد ما فضيتها رفقة السوء ،،
كانت فترة صعبة عليا .. مسد ضغوط امتحانات الشهادة ،، وضغط الحوش لا طلعة لا خشة و لا تفرهيد ،، وضغط عمي مفتاح اللي يبينا نبيعوله المحلات الرئيسية بحجة انهم ضمن قطعتنا اللي خداها مننا ..
وضغط بشير اللي بدي هاملني،، واللي كل مرة يقولي مرة بش يجيبلي هاتف وشفرة ..
متوقعتاش يقولي عايشة ف فيلا ،، و رزق واراضي ،، وصغار عمامك سيارات وخوك دكتور والتاني ملاكم كبير والصغير مهندس ومش قادرين يشرولك تيليفون 💔
قتله وقت كان عندي كاااان الموبايل الاخير لما كنت انت بسامسونج قديم شاشته مكسرة 🤨.. قعد يضحك على اساس يبصر وقالي لسانك طويل ،، اما اني حسيت كلامه قاصده بالحرف 🔥👌🏻
كلامه كله عالسفر .. وصاحبه عنده كدا .. وصحابه هدوكا عندهم كدا ..
نتصل برحمة بالدرقة من تيليفون امي .. تقولي فراس وبشير معش يتكالمو بشير بدا يتجكتر عليه ومتغير ..
قلتلها دار شوية فلوس وانشهر بدا شايف روحه،، قتلي كان مش منك انتي اللي درتيله قصة الصفحة و القناة عالنت راهو ميحلمش ينشهر ..
قلتلها مشكلتي حبيته 💔😭 تعلقت بيه ..😭
قتلي قوليله يديرلك حاجة رسمية عالاقل يعرفك بامه وخواته .. خيره فراس جي عطى فيا كلمة ..
قلتلها حتى ني بندير حد للعوج هذا خلاص 💔
----
------
---------
سكرت منها نزلت للصالة لقيت امي متغششة ،، قلتلها شن الجديد..
قتلي اهو عمك خدا حتى المحلات وخلصنا ..
قلتلها قداش عطاكم 😒
قتلي 240 الف ..
قلتلها مش حقهم المحلين كباااار .. قتلي الارض تبع الملكية هكي ولا هكي حياخدها 😤
قلتلها جايه يوم أغبر 👌🏻 تو تشوفي ،، من الزقوم اللي ياكل فيه .
نسمع ف صوت زيد وسراج خاشين ..
سراج يقول احم احم .. حطيت البرنوص على راسي وخشو..
شبحت بنت سراج ف ايديه .. قاللها بري اجري سلمي ..
اييييه .. 😍 قمتها قعظت نلعب فيها رغم امها متستاهلش لكن البنت ملايكة مدخلهاش ..😌❤
خش معتصم وف يده زرف ..
وقعدو يتناقشو وأني ندير فالقهوة وشادة بنت سراج..
رن الأرضي مدورتش 😌 لين قريب فاجت القهوة عالغاز ☕ شبحت للساعة لقيتها ال6 وقت اتصال بشير 😰 .. نشبح لامي راكبة بش ترد واني نجري زي الطلقة .. امي قامت السماعة تقول الو الووو
جيت وراها وامي تقول الوو الووو .. قلتلها هاتيه اكيدة تسنيم 😣 شبحت للرقم لقيته بشير 😫
قتلي وتيتي سفرة القهوة؟
قلتلها ايه صبيها فالفناجين على طول ..
سكر بشير لما سمعني نكلم ف امي .. واني قعدت نخنس لين ملقيت حد واتصلت بيه ..
قالي وينك😑
قتله خيرك تكشخ؟
قالي امك ردت عليا افرضي حد من خوتك رد هي ..
قتله ماهو متفقين متتكلمش لين تسمع صوتي ..
قالي اني عييت وقت نبي نكلمك ولا مستاحشك نقعد هكي ناكل فروحي ..
قتله خوتي توا اهنايا وعندنا مشكلة عائلية عالمحلات.. وبعتالي تو ندبر كيف نكلمك اصلا اني بروحي نبيك ف موضوع 👌🏻
قالي الناس تواصل ف اقاربها وانتو قاصينهم وديما بمشاكلكم ..
قتله شن قصدك ؟
قالي سكري توا .. خوتك تو يسمعوك تتكلمي
قتله لا شن قصدك !!
قالي باي و سكر عليا ..
اني ماسكة سماعة الارضي ومصدومة 😳
هكي تعايرني بشيء حاكيتهولك وفضفضتلك فيه؟!!!